南記粉麵 (謝斐道)

營業中

休息中

今日放飯去咗南記粉麵食午餐，叫咗招牌精選小窩套餐米線，另外叫多咗碟生菜。😎每次食南記都會一定叫招牌春卷，嗰種味道同口感都係出邊食唔到。其他餸菜味道一般，對比其他連鎖式米線差唔多,就唔喺度多講。Total 呢餐$70, 價錢唔係特別平，但久唔久食一餐都可以。

今日早晨留留又要去灣仔工作，要找個地方食早餐才算有一個好開始的一天。上次來工作時，下大雨到紅色signal 。。。南記原本都幾多分店的，看到有將軍澳分店，我都無試過，有機會去試下先。試了個沙嗲肥牛，和平時食開沙嗲汁不同。說是沙嗲汁，不如説是豆瓣醬似d，因為有不小黃豆的。但是沙嗲味，有趣有趣。中式早餐要個豆漿才算數，個豆漿有豆味。不過，我覺得唔錯的是個 croissant 法式牛角包，都幾香的，一定有牛油味。彩蛋了，記得台灣食的牛角包，很中式的。（想看看怎樣是台式牛角包，便要看回台灣的食評了）而且，在香港食速度很快，食完便行，和台灣的有一點似，想起台灣時食的包手 幸福豆漿 在台中的速度。

成日落大雨，所以就決定咗叫外賣，呢一間餐廳喺屋企附近嘅外賣用app叫非常方便，而且好快手就會有！今日就叫咗兩個餸，另外多一個生菜，由於係下午茶時間，所以有豆漿餸同埋生菜，只係需要$5！個生菜份量非常多，一打開嘅時候真係冇諗過咁多，不過我就冇落過任何蠔油又或者腩汁，想食比較清淡啲，整體就好似白灼青菜咁，我冇話太大特別，但係份量就非常多，呢個價錢真係抵到爛🙈佢係春卷，當然係佢嘅招牌菜，入口非常好食，充滿魚味，係我最鍾意食嘅口感，腩肉就非常夠味，辣辣地加埋米線食非常配搭，下次有機會再會叫呢一間餐廳嘅外賣！

Lunch time 諗唔到食咩，最好既選擇就係米線，食南記必食佢既春卷，今次叫咗招牌春卷牛腩酸辣湯米線第一啖食佢啲芽菜同米線，一個字：正👍🏻 好入味，啲芽菜都有酸辣味，叫酸辣湯底最鐘意食佢啲酸菜，酸酸地好開胃啲牛腩算多同埋佢已經預先調咗味，味道剛剛好，又夠淋招牌春卷依然保持到世一水準，同米線超match，浸落米線到唔會太熱氣，亦都唔會有太大罪惡感試過咁多南記餸都係春卷最出色

南記下午茶都算係全香港最抵食 $2x有個麵 仲有野飲 當然凍飲+錢啦今次嗌咗沙嗲牛公仔麵 改春卷 再改右面🤣 改曬 但全部都唔使加錢 額外再加多五件魚片頭 都係+$11 所以搵南記下午茶真係好抵食 講返食物質素 依度嘅春卷我覺得係幾好食嘅 至少厚肉 但因為係下午茶緣故 剩係得兩條 正常餐有四條 沙嗲汁係偏甜 都幾濃 幾杰 雖然睇圖唔係太多沙嗲 但係撈完個湯底都保留到沙嗲味 最緊要咁嘅價錢 魚片頭係跟餐加嘅小食 見着廚房即刻炸 然後加椒鹽粉 小編每次都會叫多粉🤣 如果唔係唔會咁多

提起南記，相信係好多人嘅集體回憶相信最經典嘅一定係佢個招牌河，包兩粒牛丸、兩粒白魚蛋，再加兩條春卷我呢就最鍾意食佢個招牌河餐，除咗包招牌河之外呢，仲包埋蠔油生菜，同個嘢飲，價錢都好實惠清清地，樣樣有，又食到好夠飽南記嘅質素有一定嘅保證牛丸好彈牙，白魚蛋好爽口，春卷有咬口，同一般喺超級市場買到嘅春卷係冇得比嘅佢嗰餐除咗可以揀豆漿，我都好鍾意飲凍檸茶由於南記非常之受歡迎，所以餐廳經常都勁多人🙃🙂🙃🙂

每次嚟到香港仔南記魚蛋粉，必定點招牌河粉，有魚肉春卷，魚蛋，牛丸，價錢平唔再講，味道都非常好食，佢個牛丸唔同出邊嗰啲普通牛丸，咬落去爽口彈牙，好有牛肉嘅味道，配上佢嘅招牌辣椒醬，簡直一流🤤

講起香港仔南記，依碗粉真係由細食到大！😋味道真係無變 都係咁好食👍🏻尤其係春卷 無一間粉面店可以好食過南記。雖然佢越出越多唔同嘅粉面，招牌河真係無可代替🙋🏻‍♀️

今日下晝早咗收工，去咗灣仔附近之後打算食下午茶諗咗好耐究竟食咩好，咁啱經過呢一間南記，又好耐冇食過 就決定入去食一碗佢下午茶都幾抵，$30就有交易，我就叫咗一碗招牌米粉 配料就有兩條春卷兩粒魚蛋同埋兩粒牛丸 下午茶再會送多一杯嘢飲，我就揀咗凍嘅豆漿 米粉嘅份量都算幾多，軟硬亦都適中，唔會話有太林嘅情況出現，算合格 春卷不嬲都係佢嘅招牌，兩條有啲唔夠喉，點埋佢嘅辣椒醬食，味道更佳 牛丸亦都非常爽口彈牙，亦都充滿牛味，下午茶嚟講非常滿足 大份又抵食

lunch既時候最鐘意食南記 前排天氣凍🤣🤣🤣例牌酸辣湯底🤣🤣 好暖身😋😋肥牛 春卷係膽 然後再加個餸 其實都幾貴 都要$6x 不過食得好飽 可以skip一餐🙈🙈🙈

今日同同事食lunch，我嗌咗個蕃茄春卷牛腩米線，牛腩簡直硬到一個點，究竟我食d咩 ?  同事問我做咩唔食牛腩，我話超韌，根本咬唔開!忍唔住返黎寫第1次食評，大家唔好再食佢既牛腩，真心呃錢，成碗嘢要$52，同事嗌咗招牌河先$30，我倒不如叫招牌河，一樣有春卷，魚蛋同牛丸好過佢垃圾牛腩，早知睇咗上面2個評論先嗌，咁就唔會中伏

見今日又凍翻，諗住去南記買個外賣翻屋企開餐(*¯︶¯*)滿心歡喜去餐廳攞外賣，一望張單就發現漏左杯豆漿，咁佢都有補翻比我。終於翻到屋企，拿拿聲去開餐，一打開蓋，明明叫左3個餸，搵哂成兜麵都無左辣豬肉，大佬啊我係想食辣豬肉先會加錢比$9，點知依家要加錢買個餸都無埋，已經心灰意冷⋯⋯一食啲麵同牛腩硬既？？ d麵未整熟就唔好拎出嚟比人食啦！睇上個post話牛腩唔好食，我都唔信，經過今次我都幾肯定唔會再幫襯。依間南記真 係 好 差！！！破壞哂今日個心情，以後都唔會幫襯！

平時食開尖沙嘴南記。今次剛剛好有機會來灣仔分店，叫左招牌春卷加牛腩酸辣。結果真係O晒嘴，酸辣無辣味，酸菜全部係硬根，牛腩韌到完全咬唔到。尖沙嘴食左咁多次，牛腩都燜得好軟身，無唸到港島區的南記咁差。

今日去咗食南記粉麵，叫咗碗肥牛酸辣米線，配料加咗生菜同埋蕃茄。呢間相比起其他餐廳，環境一般，有時啲嘢食都過左好耐先收，而店鋪都唔算好大。我自己都幾鍾意食佢嘅爽辣辣大腸，所以叫多一碟當小食。

今日同老婆去會展睇展覽，去之前就去我同老婆最愛嘅米線舖—南記，醫一醫肚，儲夠體力先。我哋叫咗招牌辣豬肉春卷米線🍜，我叫中酸辣，老婆就叫中麻酸辣。一開始我哋唔係好食得出邊碗打邊碗，因為麻辣個味真係唔太出，要好細味之後先分得到。雖然係咁，但我哋都食都停唔到口，因為湯底實在太香口，太惹味，當然我哋之後好口渴要飲好多水。米線軟硬適中，辣豬肉口感爽口彈牙，甜甜哋好好食😋。春卷都係我哋嘅最愛，酥炸同魚味好香，口感都係好Q彈。掂呀！