台灣ET鹽水雞

營業中

休息中

本身個人認為$44 半個方形盒份量已經好唔值 奈何自己又想食鹽水雞。。。A餐 $44 雞胸肉/雞腿肉 + 3款餸 我就揀雞腿肉 (其實諗過雞腿肉會不比雞胸肉份量少(不知))雞腿肉+木耳+雞腎+豬耳我係外賣拎走的 點知就係外賣拎走嘅壞處！反到去打開 一望少左份量 本身已經少。。。之後發現一舊雞腎都冇！！ 真係無奈左。。姐係我用$44買左個只需要$37嘅重點佢唔係冇雞腎架喎！(我係望清楚有咩先落)。。。 係咪我之後每次都要當場係到抄清楚齊唔齊野食先走？！ 經常都中伏外賣俾少餸嘅鋪。

行過旺角中心買野，肚餓想食少少野😊 經過見到E.T鹽水雞，就忍唔住叫左🙈佢有好多選擇，我之前食開水果餐 （好平！）但唔夠食，所以今次叫一人餐分量，叫左雞腿，小黃瓜，薯仔同鳳梨✌🏻✌🏻整過程好快，但因為單太多，所以我都要等20分鐘先有得食🙈🙈 一人餐真係大份好多，雞腿分量多好多，雞腿好滑好嫩😍 醬汁冇得頂😍 配小黃瓜食好清新，又飽肚，因為薯仔都俾得幾多，所以好full！鳳梨就唔洗講，又fresh又甜，呢4個組合既味道好夾😍😍

其實喺台灣食過幾鹽水雞，真係好正，跟住喺香港葵芳見到有就諗住試吓，試過葵芳嗰間啲味好淡，有小小失望。但係琴日放假係旺中一樓比我見到有鹽水雞，心諗好怕同葵芳嗰間一樣啲味唔好食，但係心思思想試吓，就靶心試吓啦！但係見到成30款餸唔知揀乜好，就問店員有咩好推介，個兩位女店員都好nice推介比我，💖之前一路食開雞腿，因為覺得啲肉好滑，但係今次就想試吓雞胸，咁就揀咗個A餐再加三款餸，小辣多蒜，竟然出乎意料，啲雞胸肉一啲都唔鞋😱而且比雞腿多，所以以後都會揀食雞胸，減肥嘅女仔真係可以食雞胸，同埋經開旺角中心真係可以嚟試一試👍👍

其實我應該算是一個很厚道的人，寫了不多不少都一百幾十個食評，俾劣評既次數應該一隻手數得完。無他因為我不想抹殺餐廳的心血，很少成餐都沒有值得欣賞的地方。-作為一個準台灣新娘想念鹽水雞，買來當午餐，價錢對比台灣好貴。明白的店租及人力成本差距很大。出來份量好大盒，其實可以接受。-先不論衛生情況以及食材新鮮度，（真係麻麻，望上去食物吽乾左）選雞胸因卡路里低但鞋過呀婆肉。在台灣起碼食過十幾廿間鹽水雞，即使雞胸絕不會如此而會經處理，打鬆雞肉或以撕肉方式而非亂切。配料選了招牌洋蔥以為實無死啦，點知洋蔥又係未處理生勾勾切塊，生洋蔥只有嗆辣無煮無味叫招牌。食完個口臭足一日唔敢同人講嘢。-劃單客製即叫即做原本值得欣賞，重點係明明寫小辣兼只食倒小辣，結果同前面叫中辣位仁兄一樣紅。愈食到底愈辣加埋洋蔥就更加辣，肚餓所以勉強食完結果就是胃痛。超級重口味極多味精口渴足成日，真係好嬲只能破戒劣評警惕同好。認真經營不要影衰台灣美食好嗎？

被喻為台中逢甲夜市必食的「台灣ET鹽水雞」，短短兩年間已經做到街知20間遍布桃園苗粟等各區外加盟店最近登陸香港！鍾情於台灣街頭小食的港人老闆，今次為了這款鹽水雞的味道做得傳神，所有雞隻，調味也是藝自有一套。，店子暫時只有蔥燒，麻辣2種口味，可以選全隻，半隻雞或分開雞胸，雞翼，雞腿不同部位購買，再跟不同配菜店舖選用的台灣溫體雞較嫩身，十幾款蔬果配料則在店舖附近的街市入貨即日買即日清夠新鮮，也揀選豬皮，麵筋等港人熟悉的款式。鹽水雞以鮮雞高湯浸煮去油膩，跟混合了香葉和多款藥材的胡椒粉，麻油和自製的醃漬高湯洋葱拌起來。百味交雜！

鹽水雞每次去台灣第一樣必食都係 鹽水雞 因為真係好好食又好好味 收工甘啱要去旺中 行行下見到呢間就即刻停低 要買黎食嗌左雞脾 會送三個配菜 我就揀小黃瓜 玉米荀同海帶 我覺得個口感好豐富 脆卜卜甘加埋啲香料好惹味 好夠蒜味 盛惠44蚊 平d就好啦 可能因為就收工加1蚊就俾隻雞全翼有台灣的味道 可以唔洗去台灣 同埋原來呢個野有幾間分店 尖沙咀 大圍 北角 荃灣 葵芳 太古都有個到有啲企位可以堂食架 唔錯唔錯既 下次可以買盒番屋企煮個米粉黎食 好味又快捷

今日去咗俾啲野個朋友，喺旺角中心行住等朋友到，竟然俾我發現呢間台灣ET鹽水雞😳😱 好驚喜，之前已經食過尖沙咀星光行嗰間，好想再食，竟然再比我撞到，梗係唔執輸啦！估唔到旺角中心呢個地方都有咁岀名既小店🤣😍👍🏻我都係同上次一樣，叫咗A set✌🏻 本來想叫水果餐健康少少，但係都係受唔住誘惑，揀咗雞腿，配小黃瓜，鳳梨同豆腐~ 我係唔食辣嘅，所以走辣✌🏻 其實之前都有食過，所以特別有好感，佢雞腿嘅肉都有10幾件，好豐富，我第一次見到嘅時候都嚇親，真係大大盆都好似成隻雞咁多。最好食係佢嘅特製醬料，好食到停唔到口🤣 小黃瓜同鳳梨我之前都有食過，又甜又清爽，豆腐就第一次食，淡淡地配合埋醬汁，真係好好味😍👍🏻

聽個名就多，食就第一次，今次嚟到旺中，終於要見識下佢廬山真面目order紙獨沽一味淨係賣鹽水雞，連想加個嘢飲都冇價錢比起台灣真係貴，不過如果細食嘅，當lunch嘅話都OK，$44小食就有點奢侈叫咗一人餐，雞腿肉配3個餸：雞腎，皮蛋同埋蘆筍辣度叫咗少辣，重口味嘅我當然冇走蔥/蒜可以見住店員係度撈，幫你整好成兜雞買相冇咩特別，食落先知咩叫不可以貌相醬汁好惹味唔會太辣，鹽水雞本身嘅鹹味好夠，配搭整體令我食唔停口朋友同我講過話叫雞腿啲肉會少啲，雞胸會多啲，但係食落又唔係！雞腿肉都一樣好多，有十幾件已經去骨嘅肉好滑，雖然連皮食但係一啲到唔油膩雞腎，皮蛋同蘆筍都好食，蘆筍大都幾幼嫩，不過食到一小舊有渣食完先兜好滿足！咩都清哂，差啲連啲醬汁都飲埋下次嚟食會考慮叫吓啲索汁嘅材料

喺公司返返吓工，成班同事想揾D嘢食吓，就走左去旺中呢間鹽水鷄買返公司一齊食，大約一百四十幾蚊就有一隻雞，再加六款配料，有雞腎，豬耳，青瓜，海帶等等，佢加左D醬料撈埋一齊食，都算幾香架，不過可惜嘅係D雞有少少雪味，破壞晒成盒嘢

行開旺中一定會搵野食下～咁岩行過哩間黎自台灣既鹽水雞所以試下佢有好多款餸可以配搭，今次就叫左一個餐可配三個餸。揀左雞胸，皮蛋，芋絲同豬耳，重加$10加左冷麵同加$1多隻全翼～講下味道方面，小編叫左唔辣，佢會撈好之後比你～食落第一啖味道已經好濃烈，基本有蒜頭同胡椒味，撈好之後啖啖都好入味～口感唔錯，唔會太乾或太硬～而且好細心將全翼剪好左，方便食～不過如果少啲雞皮會好啲，因為食落感覺怪怪的小編比較大食既關係，本身望到個盒唔係好大，都擔心唔飽，但食完之後唔好睇份量少少，係夠飽咖下次行開旺中既你可以一嚐

旺中多左好多好野食 以前就去shopping 宣家就去搵食多今次去左試鹽水雞 去台灣成日食 好想起香港回味吃嗌左個一人餐 $44可以揀雞胸 雞脾同雞翼 再加3款配料我揀左雞脾 木耳青瓜同豬耳分量唔少架 兩個人share食都okay雞脾超嫰滑呀 仲去唒骨 啖啖肉 不得了呀木耳青瓜同豬耳都好爽口 同雞肉一齊食 口感醬汁方面 嗌左少辣 咸左少少 幾重口味整體不錯的即叫即整嘅關係 都等左一陣 企位唔算多 可以選擇一路行街一路食

聽同事講旺角有一間好好味嘅鹽水雞 咁啱今日行街行過 就決定試下 餐牌都好多配搭岩岩放工唔係太肚餓 向店員查詢之後 發現原來可以唔一定要配菜嘅 可以就咁要雞肉可以選擇要雞胸 雞髀 或者係 雞翼最後我決定咗要雞髀肉可以揀唔辣 小辣 中辣 同 大辣我就決定咗要小辣雞肉切到好細舊 岩岩好一啖一舊 好貼心未食見到已經開始流口水雞肉嫩口 調味粉好香 不過等野食就耐左少少只有一個客order在我前面 但都等左15-20分鐘才有食物

幾年前喺台灣食過鹽水雞，勁鍾意食，成日都會心掛掛，呢兩年香港開咗少唔少鹽水雞鋪頭，呢間係其中一間。其實我覺得個味道同台灣嗰啲一啲都唔同，不過當係另外一種食法都可以嘅，今日經過，心掛掛好想食就買咗外賣！＄42可以揀三樣餸，我揀咗西蘭花、金菇同雞腎，加入1蚊仲有多隻雞翼，要咗小辣，好惹味，雞肉都好嫩滑但有d 就有d 肥！金菇索左d 汁好正！雖然始終冇台灣嗰啲咁好食，但冇得去台灣，用嚟頂住檔都係一個唔錯嘅選擇！

與其凍呢一份係一個小食，我直情會當鹽水雞係我嘅午餐！喺旺角區返工周圍茶餐廳食店雖然好多，但係對於想減肥嘅女仔來講，真係好難搵到一間餐廳嘅嘢食係瘦身得來又好味！我發現到旺角中心有鹽水雞買，真係唔錯。因為可以做我嘅減肥午餐！今日揀咗青瓜皮蛋青蘋果！呢排天氣真係好熱，一個組合加埋雞肉就好似沙律咁，當然本身我好鍾意食辣，加左兩蚊麻辣，只不過講真麻辣唔夠麻。。似係普通辣椒漿撈埋一齊，如果可以麻小小咁就好。肉係我最鍾意嘅雞胸肉，唔錯。下次試吓其他配料。。

好耐無行旺中啦，仲記得以前中學會著住校服黎周圍行，周圍食野。成個MK妹咁！唔黎唔知，原來呢度開左好多小食店，有珍珠奶茶，炸雞，台灣小食，可麗餅，真係乜都有呀！我同frd兜下兜下覺得口渴，就決定買杯野飲順便食小食。特別比呢間野吸引左！好香啊經過！一睇原來係台灣鹽水雞～聽過好多次但真係未食過。原來好多雜誌同報紙都有介紹！好啦就試下啦！我地叫左1人份量share食，選左雞翅同冷面底，真係好多人買，起碼等左20分鐘先有得食，我地就係隔離d台度企住食，又有一番風味啊！滿滿的一大盤啊！好多配料而且好多香粉！雞好夠味，而且起碼有3隻雞翅，仲係去骨既，冷面都撈到索曬d汁，真係一啖食完又想食第二啖啊！好似上癮咁啊！呢度都係$42，呢個質素抵啊！