味工房

營業中

休息中

經過觀塘道巴士站落車最便利位置，諗住試下呢間味工房嘅早餐。買左沙爹牛肉米線返公司食。返到去發現啲沙嗲牛肉居然係酸嘅，諗住搵電話打返去至少唔好再賣俾其他食客，無電話提供已經覺得伏 。下晝食完午飯再返去同佢地收銀講返呢件事。佢第一下就叫入廚房話俾我試下啲牛肉。佢自己去試完一啖後話：「哦唔係壞呀，有喼汁嘛係咁㗎」。咁我都無野好講喇，大家都唔係第一次食沙嗲牛肉呢咪香港經典食物呀嗎？請大家唔好以身犯險試呢間不負責任嘅無良飲食 。

貪佢唔駛排長龍， 咁就過去買， 好明顯係自己攞嚟衰⋯⋯個收銀一開始已經呼呼喝喝勁冇禮貌， 問多一聲， 講究竟你有冇睇清楚， 我又唔係喺度做， 第一次買問下都唔得咩…當左自己係自動售賣機呀⋯⋯啲食燒賣又l乾又腥， 粉果又淋化l到爆，以後我都唔會再買， 冇下一次😡

由於見附近無咩小食店先想試下，當日購買$15 4條腸粉，第一次買，不清楚係咪當落單時需要提出走醬，禮貌地問收銀姐姐，而收銀不耐煩，態度極差表示：咪有全醬，答人態度差都算，而唔聽清楚人地問咩先答，我真係感到無奈。收錢時用八達通付款，我奇怪地見到八達通機上顯示負錢，我準備行開時即睇單，收據金額$90，我即向收銀提出收多錢，收銀態度冷淡，似有點質疑，亦無回覆過我一句，同時廚房出單另一名員工即睇單，向收銀講你收左6份錢，收銀先肯理會，慢慢同輕挑表示：咁咪找$75，一句唔好意思都無，當我無睇清楚價錢拍卡，其實真係有需要用呢種態度對顧客？各位仲想幫襯，請一定要記得睇清楚八達通金額同即時睇收據，而現金找續都要小心。首次寫食評，因此收銀員態度極為趕客，真心為極品員工。

我去咗牛頭角附近做嘢，落街買lunch，而最近就係佢！見佢menu超多選擇，海南雞飯、雞扒飯、通通都有！但係我平時最鍾意就係食常餐！因為感覺好多嘢食！所以我就嗌咗個常餐D：雞中翼公仔麵全日常餐 $36， +$3 轉出前一丁。好彩好快就有得攞。有一塊白麵包、三隻雞翼、火腿俺列、出前一丁、熱飲。味道好普通，呢個價錢差唔多啦，無乜期望，佢哋將個俺列放入個麵度，好似一舊爛布咁。賣相真係差，味道都不值一提，無heart嘅一間外賣店！

俾依間快餐店激到第一次寫食評!!!!本人叫左個"奶醬多+熱咖啡", 等左7分鐘都唔見有, 身邊遲過我落order既打工仔都紛紛拎晒d早餐走~ 我走去問個職員,佢答我話:烘緊!然後我等到10分鐘,仍然都冇, 我再走去問佢, 另一個職員先答話:我冇依張單,你再等等!然後到15分鐘,仍然都冇,我再去問佢:不如我退錢啦~ 個職員先問我:你係要奶醬定奶油??我都同佢地表示,我等到遲到, 佢地一句唔好意思,道歉都冇!!!!我等一份早餐, 等到返工遲到!!!!返到公司, 打開杯野飲, 然後發現佢俾錯杯熱奶茶我我勸大家打工仔, 千祈唔好幫襯依間快餐店!!!! 俾錢買難受

首先，本身我係從來無寫過食評的。但係因為呢碗米線！我要提醒大家千其唔好幫襯呢間野！我買海南雞米線佢俾左清水煮白烚雞胸米線的，仲要拎返去換佢話不嬲海南雞米線都係咁（但我之前都買過呢間海南雞飯，之前最少真係俾有雞皮嘅雞）我企硬呢換擺明唔係海南雞米線！佢打開黎睇見到碗野咁...佢自己都無辦法要換返有皮嘅雞俾我，但係全程啲大陸口音姐姐啤住我，又態度極差！唔會再幫襯！浪費左我半個鐘由公司來回拎去換，慘痛經歷！

第一次食到一個咁難食嘅泰式豬肶飯，唔計個可怕嘅啡色芡汁，咬埋啲肉，飄出淡淡廚房條爛毛巾嘅up味，其實外賣檔無力，唔好攪咁多啦，正正經經賣扒，腿，腸，蛋就算啦，相都懶得影

本身打算叫海南雞飯，點知賣曬😨我都係第一次遇到！臨時轉左叫咖哩雞扒飯，$40連熱飲一杯份量充足，白飯一大盒，雞扒有一塊半，咖哩汁足夠撈成兜飯，而且仲有少少耶菜，算係有菜有肉嘅午餐！【咖哩雞扒飯】咖哩汁好重耶香味，好好味，不知不覺令我食曬所有飯🤣 雞扒有輕輕煎香，唔錯！ 咖哩雞扒飯將會係我嘅放飯list中佔一席位😝

喺牛頭角返工嘅人都知道，雖然牛頭角好多工業同埋商業大廈，但係牛頭角依然係一個美食沙漠😂 （即使已經開咗好多樓上餐廳，但樓上餐廳好多時都好貴）呢間海南雞飯已經開咗一段日子，係我無數次放返嘅頭兩位選擇！因為佢嘅價錢相宜，而且味道都唔錯！【海南雞飯】佢哋嘅招牌海南雞飯最出色！ $42連野飲，一大盒黃油飯，仲有幾滑嘅海南雞😋😋鋪頭會送多一包醬料俾我哋，呢一包醬料就係成盒飯嘅精髓！酸酸辣辣，又甜甜地😋每一次都覺得一包醬唔夠點，好想叫老闆比多一包我😂雖然佢哋嘅醬料好好食，但係我每次食完佢哋嘅海南雞，都會超級口渴！ 🙈