四季常餐 (德輔道中)

營業中

休息中

中環除咗雙餸飯之外 都比較難搵到$50左右嘅午餐選擇 咁岩同事想食常餐我地就去咗呢間係中環街市隔離 長期好多人排隊嘅茶餐廳 四季常餐～ ☕️• 特濃沙嗲牛肉麵配炒蛋多士 $50 🐂 3.2/5常餐配嘅炒蛋多士份量唔算大 但見到牛油多士烘得香脆 沙嗲牛肉麵正常水準 一般茶記味道 呢個價錢係中環OK啦• 南洋咖喱豬扒飯 $62 🐖 3.5/5帶骨豬扒厚身 睇相都知道好juicy 有啲半煎炸嘅感覺 完全唔會韌 配埋有層次嘅咖喱汁（入面嘅薯仔都好淋好入味）輕鬆K.O.成個飯！總結：以中環嘅lunch黎講 跟熱飲都係$50-65 性價比OK 送餐速度快 味道唔錯 難怪lunch time成日大排長龍🚶🚶‍♂️🚶‍♀️

見大家推介這間炒蛋，路過去試試，看看孰真孰假。叫了常餐（炒蛋、多士、沙嗲牛肉麵、熱奶茶）炒蛋還算可以，但用上好多油（可說是用油浸出來）。比較下，澳牛的炒蛋香濃好多。見吃剩大半個麵，不想浪費，取一個外賣盒取走。沒想過，一個外賣細紙盒價值$3⋯⋯不是付不起，只係覺得不值。

中環食餐飯都真係唔容易，尤其係食飯時間🙊🙊之前已經成日見到依間「四季常餐」一到午飯時間就成日都要排隊，今次下午茶時段嚟到，都見到近乎滿座，可見人氣可以選擇的款式不多，不過最出名的就是他們的沙嗲牛肉麵和叉燒炒蛋飯，今次就試吓他們的叉燒炒蛋飯叉燒炒蛋飯配秘製豉油汁 $60 推薦指數🗯️：🌟🌟🌟🌟由落單到上枱，用咗大概十分鐘左右，真係好適合中環這種快節奏，而且基本上十張枱有九張枱都有人叫依個，真係唔快啲都唔得炒蛋食落冇咩蛋咩，但係食落都算滑，但係配上秘製豉油汁真的好下飯，不過飯就少咗啲，食到最後會有點鹹以上均是我個人觀感，每個人嘅口味各有不同，所以末必同每個人嘅用餐感覺一樣，如有不同，敬請見諒。

見好耐冇食，點知第一啖就出事，油炒蛋！成口油，啲油由上而下滲到落低，啖啖油！個底直情油浸飯！這是滑蛋的唯一做法嗎？以前食唔係咁。拜拜喇，四季义蛋飯！留返俾遊客食🫠

以前番中環自從同事帶過我嚟食之後就愛上今次路過當然要一懷緬下常餐真 · 忌廉雞湯通配叉燒配招牌炒蛋+多士 連熱飲$52 呢個忌廉雞湯應該都有味精成分但我每次食呢款通粉嘅時候都忍唔住差唔多邊食邊飲曬個湯今次相對印象中好似淡身咗少少 但作為通粉嘅湯底都依然出色不得不提嘅一定係招牌炒蛋半熟嘅炒蛋嫩滑香口 令人一試愛上 水準依然保持特濃沙嗲牛肉公仔麵配招牌炒蛋+多士 連熱飲$52注意公仔麵非出前一丁 相對上略遜但有濃郁沙嗲醬補救另外都加點咗一份奶油豬餐廳選用嘅麵包屬於厚身餐包款做唔到奶油豬香脆嘅口感

「常餐」茶餐廳文化 即係全日供應入茶餐廳食得最多就係沙嗲牛肉麵🍜一個餐有齊湯麵 炒蛋 多士 飲品🥤唔駛諗 又飽肚 「常餐」真係最快捷嘅選擇🤭特濃沙嗲牛肉公仔麵🍜 $52配招牌炒蛋+多士🍞厚厚既西多士烘到外脆內軟 仲有好香既牛油味滑蛋有蛋汁 好嫩滑 沙嗲牛肉麵好香濃不過花生味唔算太特出 牛肉唔會韌麵煮得啱啱好 夠爽口 整體算唔錯😋 💛 四季常餐 @cafe_seasonshk 📍 中環德輔道中88號地舖📍 灣仔軒尼詩道156-162號利榮大樓地下B號舖#四季常餐 #中環黃店 #灣仔黃店 #黃店 #中環美食 #常餐 #沙嗲牛肉麵 #相機食先 #食好西 #hkig #central #food #hkfoodie #foodie #foodieblogger #foodiehk #foodblog #hkfood #foodstagram #hkfoodblogger

Lunch諗極都唔知食咩好，又冇friend子陪我食飯，所以就叫咗四季常餐嘅lunch 外賣拎返公司食咁我今次就揀咗佢哋全日供應嘅常餐，我就叫咗個特濃沙嗲牛肉公仔麵，配招牌炒蛋，再加多士！咁個沙嗲牛肉公仔麵，坦白講就唔係話沙嗲味好濃，咁就係正正常常嘅一個沙嗲牛肉公仔麵啦，但係啲牛肉都係幾嫩嘅！炒蛋亦都非常之嫩滑香口！出奇地我最欣賞係佢個多士，烘得相當之香脆啦！再配合埋牛油嘅香味，食落去勁脆口，超欣賞呢個多士！

在中環找早餐吃，路過見到這間有厚蛋治好似幾吸引，食落都真係唔錯，黑松露非常澎湃㗎！中環電車路旁邊，中環街市前少少，非常就腳的一間茶餐廳。入面都幾闊落舒服，平時都幾熱鬧有需要搭檯，服務員幾好禮貌又周到，用餐經驗唔錯。唔同時段有唔同餐，早餐和下午茶其實差唔多，蛋奶素可以食蛋治。黑松露芝士厚蛋治 HK$45這裡的厚蛋治用蛋包又幾特別，不過如果你想食多士的話都可以轉，用QR Code手機點餐好多客製化選擇。餐包有烘過，酥脆與鬆軟兼備，滑蛋真係幾厚又幾滑，黑松露醬仲有厚厚一層，都幾浮誇啊！

我好鐘意白湯，所以特登試常餐嘅白汁通粉，不過真係有d失望，白汁聞落都香，可惜食落就冇乜味…唯一係佢推薦嘅炒蛋真係幾好食嘅唔想咁熱氣就普普通通order個冇烘底嘅牛油麵包，而唔係食多士

去離島玩之前食返個早餐先，難得依間早餐時段去到11半。成個menu都淨係得幾款嘢揀，所以冇乜選擇困難😂我哋都叫咗特濃沙嗲牛面，但原來要再加錢先有多士同炒蛋🤦🏻‍♂️仲要加$13因為唔知係分開所以冇多士食沙嗲牛麵啲醬好多，唔同一般既沙嗲牛。沙嗲味好濃好好味撈埋落公仔麵一流，但牛肉就冇乜特別。overall比一般茶記好味既

今個星期已經食第二次🤣每次lunch都大排長龍，閒閒地都10幾人等緊，不過速度算快，等十分鐘左右。落單係用qr code，我都係叫番最愛叉燒炒蛋飯，上菜速度好快。首先，叉燒薄切，食落唔會乾，味道岩岩好！再配上秘製豉油，靈魂所在，甜甜地唔會咸，再加上有少少黑椒，食落更加惹味。至於個蛋就好滑，有蛋香味。另外，叫左凍檸茶，茶味都好重，唔會澀。至於性價比就正常，中環lunch 一個飯$60，凍飲加3蚊，冇得挑剔。

嚟到新一年，食個常餐先！今日去開中環，就諗起呢間四季常餐～餐廳平時應該都幾多打工仔幫襯，但因為公眾假期，所以唔算特別多人～我叫咗呢個四季茄牛通配招牌炒蛋多士 ($52)～呢個茄牛通嘅湯真係好濃，濃到直頭係似撈通粉，不過我覺得幾好食，味道帶酸，牛肉份量亦都唔少～而炒蛋真係幾滑，不過略嫌調味重手咗少少～男朋友叫呢個真·忌廉雞湯通配叉燒 ($52)，個湯好香，直頭有少少似罐頭忌廉湯咁濃，叉燒就正正常常，整體嚟講都ok😌喺中環呢個地段，嚟呢度食個常餐我覺得價錢都合理😀

四季常餐早前係中環好想食茄牛通，openrice 咗陣就搵到呢間，原來呢間平時lunch都好多排隊，今次去到冇咩人等位就入咗去啦~四季茄牛通配招牌炒蛋+多士 HK$50蕃茄湯好濃嘅，味道唔會太酸，剛剛好；牛肉亦都唔會好鞋好韌，荼餐廳水準黎講算唔錯；佢嘅招牌炒蛋加多士好有驚喜，炒蛋炒得好滑溜，配埋香脆嘅牛油多士食，勁正~南洋咖哩豬扒飯 HK$62豬排輕輕咗炸過，但油膩感唔重之餘豬排亦都好鬆軟；咖哩好香但冇辣味，薯仔都有兩大件；呢個茶記午餐黎講算好食整體感覺中環少有嘅平價餐廳，質素貞都唔錯；佢嘅招牌炒蛋+多士絕對會再想encore多次

一早就下單 外賣自取 拎到番公司先知出事 炒旦多士 凍冰冰 佢仲出名炒旦 叉燒通正常 暖暖地 但一啲都唔熱 當日過左幾個鐘打去餐廳 佢話你而家先打黎 口同鼻拗 無乜意思 又話發現凍 做乜唔即刻拎番去 大佬 來回兩次 我打工嫁 邊會咁得閒 下次真係送都唔食

🔅四季常餐🔅中環🔅茶餐廳🔅週末食個好滿足嘅早餐，就同男朋友去咗中環食過蕃茄牛肉通粉一口公仔麵，同埋佢嘅招牌炒蛋配多士！呢間茶餐廳好出名～「我去四季食早餐」，好威😂最重要係黃店～我好中意食佢個炒蛋，滑蛋有流心～有牛油香又唔會太膩～ 多士係厚多士！沙嗲牛公仔麵，個沙爹有花生粒粒，但唔係太重花生味～配公仔麵一流！呢個就視乎你中意食邊隻(o^^o) 蕃茄湯都好濃厚～通粉有質感～兩個都係用鮮牛肉去烹調～ 佢冇鴛鴦同茶走～但一杯熱奶茶都好滿足！嚟緊茶餐廳都會喺灣仔開分店，係渣打銀行附近！好期待！四季常餐 網址: https://s.openrice.com/QrbS0UFO900~uZ5MGAA地址: 中環德輔道中88號地舖電話: 26502088=====================#黃店 #中環黃店 #黃色經濟圈 #茶餐廳美食 #茶餐廳 #早餐 #炒蛋 #香港炒蛋 #炒蛋多士 #沙爹牛肉麵 #沙爹牛肉麵關注組