大快活 (已結業)

午休因事忙，只有十五分鐘進食，跑到這兒。中午一點九，近八成滿，但大部份都係吃飽等開工係度吹水的上班族。所以，好易搵位。晏晝要開會，唔可以吃阿活咖哩，唯有學女生吃肉醬意粉！點了份午餐（$28），有一個脆皮麵包、一大碗蕃茄薯仔薯蓉湯（西式creamy 作法，好好味！）、阿活肉醬意粉（輕盈版，配菜veggie 豐富，肉醬調味香濃惹味，正！）、凍蜂蜜綠茶（唔太甜，幾好！）呢份lunch 比想像中好味，絕對有下次。

十年前去大快活食飯, 當時佢搞大賤賣, 十幾廿蚊食到好飽, 但口裡面沒有一點味道, 細過唔識講「味如嚼蠟」, 我只係同朋友講: 「嘩, 好似食膠」. 點不知, 十年人事幾翻新. 3個月來, 去左幾次大快活, 味道365 度大改變. 咖喱幾好食, 而且好體貼有加辣服務, 奶茶水準拍得住一間好既茶餐廳. 佢地洗心革面, 仲要改得咁徹底, 值得讚讚. 灣仔呢一間, 夜晚咁多人, 應該營業到零晨後先係正路.

喜歡吃通粉早餐，但怕了M 記薯餅，不得不另找店子。當然不會放過連鎖快餐店！點了早餐（$17.5），有兩片火腿/ 餐肉/ 雞肉腸、兩隻煎蛋、半件厚多士、火腿通粉，飲品選了熱鴛鴦。火腿略煎，蛋頗細隻但脆邊，厚多士是鉄板煎成唔掂。火腿通粉火腿絲頗多，通粉係有坑紋彈牙爽口，好！熱鴛鴦好順滑，唔差！早上八點二，店裡擠滿食客，外賣的logistics 超慢，起份超普通的早餐都摸成十分鐘，要改善！

佢地既阿活豬扒飯真係唔錯汁好食，　而且豬扒又鞋鞋（我ｌｉｋｅ鞋既肉）價錢ｏｋ啦不過飲品就麻麻啦唔會ｐｅｒｆｅｒ佢好不過好飽肚既

對於大快活的回憶是可怕多於可愛不過難得佢洗心革面脫胎換骨加上口碑收復了不少失地就食吓啦兩點鐘來食雙拼久違的叉燒售罄又唔想食鵝一於就油雞加切雞加檸茶燒味一向都係美心的強項不過大快活的都不差油雞又真係幾油鼓油汁同最愛的薑蓉都不夠這些都是個人喜好問題乾脆自助吧要我討完又再討每次俾少少好樣衰整體算幾好與大家樂相差無幾果然臥膽嘗薪

近三十一度的中午，托同事幫我買外賣午餐，在公司開餐。同事到「大快活」買來「鮮原茄魚柳」午餐（$25）。那「意大利香草燴原隻鮮蕃茄」的水準跟上週在荃灣吃的沒兩樣。那五件「一口鱈魚柳」，炸得幾油，咬一口，即滿口油，唔係幾得…。伴菜的車厘茄、甘筍、西蘭花都相當恐怖。跟上次在荃灣買的，壓根兒是兩個世界！至於那「香草橄欖油意大利麵」還可以。呢間野的食物質素，比其他差！

最近幾次來吃晚飯，都點了焗豬排飯餐。包餐湯及飲品。我覺得這兒的無骨焗豬排飯好味過大家樂好多。淨係佢哋用個瓦碟就已經好過大家樂嘅錫紙兜啦！而且豬排Ｄ肉冇咁肥，都唔錯。

有日去買午餐時竟然撞到好耐無見o既舊同學, 就一齊去食午餐. 午飯時間度度都好多人, 所以選擇左座位較多o既大快活. 要左個肉醬意粉輕怡午餐配即磨咖啡. 意粉份量較平時少, 但係肉醬都幾油, 唔係好輕盈播! 咖啡較以往稀左d, 唔夠香.雖然食物麻麻, 不過嘻嘻鬧鬧就過左一個愉快o既午休時間!

今日同好友嘆完一頓豐富既早餐先返工.- 吉烈豬柳拼腸仔炒蛋: 原來唔係吉烈豬柳咁簡單, 係用火腿加豬柳一齊炸, 食落更加有口感, 另外, 本來腸仔炒蛋應該會幾好, 但係夾埋薯蓉一齊煎出黎既效果唔係咁好食! - 鮮奶麥皮: 以前牛奶麥皮好食D, 因為而家自己要另外加沙糖先有味道. - 超軟蛋糕x 1件(嘉頓出品): 無咩特別! 因為超級市場都有得賣.- 即磨咖啡: 未飲已經聞到陣陣香濃咖啡味, 又唔會太濃或太淡……正!

22/7 (Fri)Lunch行0左去恩平道間大快活買四寶飯。因為外賣0既關係，由頭到尾都無見過盒飯，直至返到公司，打開先見到原來飯0既份量比其他快餐店少0左一半，不過就多0左節瓜做配菜，反而覺得幾好。四寶包括咸蛋、紅腸，叉燒同埋雞，樣樣味道都好平均，係奇怪在點解叉燒係成舊上0既？成半個BB拳頭咁大點食？？節瓜好爽口，唔係烚到淋晒果Ｄ，加分！

此店近期推介番茄系列，聽聞說不錯。試過番茄雞扒意粉，其實個意粉和雞扒沒有什麼特別，但分開盛載的番茄汁，香濃而且味道不錯，但最特別的是當中居然真的有一大個已去皮的番茄，這即時令我想起「囍宴」的「胡麻溫室茄」。

收工已經七點幾, 行過灣仔最多人的天橋見到大快活, 又再去試試其他食品。大長今熱潮搞到我都忍不住叫了個泡菜肥牛石頭窩飯套餐, 落單等了約七分鐘就有。石頭窩唔算大, 不過都有一碗飯, 飯面一堆肥牛, 一些泡菜, 一些海帶同一些菜葉, 仲有一隻荷包蛋, 熱辣辣入咀都覺有點燙, 味道都幾好。個湯話係人參雞湯, 都見到有些好幼的參, 一飲下去, 出乎意料的好香參味。雖然湯中有隻雞髀, 但係個湯唔肥膩, 隻髀雪味又唔覺, 相信係參味蓋過了。吃了個飯飲埋個湯, 成肚脹了, 因為過湯都差不多兩碗水, 再加埋杯汽水, 真係無言。很難得有公司轉型像轉頭咁好, 食物質素同環境都咁好。

叫了個黑椒汁雞扒什扒飯, 其實雞扒只係兩小塊, 不過仲有一小塊火腿, 一隻雞全翼, 同一條粗身大力腸。個汁分開用野裝, 吃幾多黑椒汁隨便自己淋, 呢個安排唔錯。平時見到雞全翼都好驚, 因為用刀叉吃非常不便, 不過呢處用竹籤串直隻雞翼, 吃起來非常方便, 正合我這種懶人。仲有, 隻雞翼唔油膩, 唔似拿去炸出來的。回想以前的大快活, 這個飯只會求其放上碟, 但現在一個飯都好有心機咁擺上碟先俾個客, 或許星期六唔係忙, 不過整體都覺得有花心思去改好個型像, 真係值得嘉許的。

上個week去試咗個韓式石頭鍋飯, 等咗十分鐘, 見到一鍋熱辣辣香噴噴o既鍋飯同埋煎蝦餅(仲有少少酸菜),覺得佢o既味道應該唔錯. 將d飯撈勻見到d飯有好多料, 有海帶, 芽菜, 蘿蔔絲, 雞肉, ... d 汁都唔少, 所以食起上嚟真係好好味, 一定唔會飯多過料, 份量幾多, 相信一個細食既女仔應該食唔哂. 仲有個蝦餅, 佢只係得一隻完整o既蝦, 確實係少咗d, 但係食落都幾煙韌, 不過如果有多d蝦先稱得上係蝦餅, 得一隻蝦未免太少喇.overall嚟講, $29 一個韓式晚餐真係好抵(仲包埋一杯百事可樂), 我諗一試無妨o既