宙串燒日式食堂

營業中

休息中

係青衣運動跑完步之後跟左地膽去搵食，帶左我地黎呢間隱世既日式串燒店，平時真係唔會經過呢度，更加搵唔到呢間咁高質既串燒店😍叫左好多款串燒一齊share黎食，當中最最最推介既係豬肉釀雞皮餃子，真係必食，表皮燒到脆卜卜入面就鎖住左啲肉汁；另外就係燒粟米🌽，老闆話佢地用左隻靚既牛油黎燒，聽完唔記得左，但最緊要好食😋仲有一個推介既係秋葵蝦滑，因為好少蔬菜類，所以都好推介要食呢個😋牛舌就好大塊但係一啲都唔韌，我本身麻麻地食牛舌都覺得唔錯，其他串燒正常發揮，係雞皮餃子同粟米太好食，所以唔記得咗其他既味啦🤣

喺街坊群都有聽聞涌美有間日式食店風評唔錯，今日終於去試吓了。6pm 去到見落左閘，以為摸門釘。唔甘心行埋去睇，原來入面有燈同有個似老闆嘅人坐左喺度，再等多一等就真係開門了。兩個人叫左咖哩吉列豬扒飯、串燒牛脷、三文魚鰭同白鱔。吉列豬扒當然無日本專門店嗰啲咁 juicy，但唔硬唔柴，我覺得唔錯，而最欣賞係咖哩飯入面有蔬菜，十分平衡，飯量也多，仲送凍綠茶一杯。呢間店串燒多數係醬燒（不過我後來聽到隔離枱落 order 時有強調要鹽燒，唔知係咪可以選擇呢），個醬我覺得偏咸，可能為左送酒，所以個白鱔咸左少少，同份量較少，不過肉質非常好，有彈性，如果可以大件少少就好啦。牛脷同三文魚鰭都疑似老闆送多件比我地食（唔通因為我等開門？）牛脷好食！燒得啱啱好，好淋有肉汁，無奇怪味。三文魚鰭就正常，用同一隻醬黎燒但無白鱔咁咸，可能因為肥份多啲。食完晒其實夠飽，不過仲有啲為食，所以叫埋個 Set A 試吓。樣樣都好食，尤其係個雞腎，好 juicy。

滑蛋吉列豬扒丼配蕃茄汁（$60）滑蛋頗滑但無咩蛋味；吉豬炸粉脆身唔硬實，豬扒算厚身，有口感，少少嚡但可接受；蕃茄汁微酸少甜，味道不錯；飯係珍珠米，較黏身；仲有啲椰菜絲。丼飯會附送一杯凍綠茶。薯條（$18）加肉醬（+$10）即炸，粗薯條，除咗肉醬，仲有芝士。肉醬係牛肉碎，味濃。薯條同肉醬份量都多，食到最後一條薯條都仲有芝士肉醬。串燒套餐 B（$73）・醬燒豬腩肉，有三件，醬汁微甜，豬腩肉有咬口。・醬燒煙肉芝士，有三件，微咸煙肉卷住芝士。・醬燒豬大腸，無豬臭味，有𡁻口，味道不錯。・燒牛油粟米條，有三條，普通。雞軟骨肉棒串配泡菜（$23）雞軟骨棒係來貨嗰款，無咩特別，但夾埋泡菜一齊食又幾特別。厚燒牛脷（$25）有三片，唔係爽口嗰款嘅牛舌，係炆過嘅牛脷再燒，口感偏腍，味道正常。小店家庭式經營，一位樓面一位廚師，坐位唔多，收費合理。如果要比意見，我覺得串燒嘅火喉仲差啲，可以提升一吓。

新開嘅小店，老細十分友善有禮貌，會主動溝通拎食客意見。住青衣嘅人都知過左夜晚9點之後，除左連鎖快餐店，其實選擇唔多。難得有鋪頭肯開到咁夜，一定要試下。主食方面，丼飯塊豬排炸得薄皮又juicy，唔係果種淨係食到成口油。加埋滑蛋蕃茄醬，個醬調配得岩岩好，味道再有加乘。再叫左啲炸物同串燒，整體都做到皮薄多汁。我個人偏好醬汁唔會過濃而蓋過食物原有嘅味道，老細係味道平衡感方面處理得頗為出色。小食推介：玉子燒 - 即叫即整，濕潤鬆軟炸雞塊 - 酥脆多汁肉醬薯條 - 份量抵食燒魚鰭 - 最有驚喜，必試！整體性價比十分高！

上次食完後念念不忘佢哋啲串燒今日同另一班朋友再去幫襯，咁啱遇着大廚試緊新菜，我哋梗係唔執輸樣樣都試啲啦印象最深刻嘅係泡菜雞肉棒，估唔到兩樣嘢加埋一齊做串燒會咁夾。另外仲有前菜茄子漬都非常推介，清新開胃，估唔到呢個價錢可以份量比咁大碗。見到隔籬枱有碟蛋沙律幾得意，我哋都即刻點咗嚟試，佢係滷水蛋中間釀咗蛋黃撈沙律醬，鹹鹹地又甜甜地滷水好入味好耐冇試過一間小店食完會咁有驚喜，價錢質素同份量真係超值冇得輸，希望佢哋繼續努力，香港人撐返香港小店

青衣近排開左間新日本串燒店，已經去左兩次。今次就試左個牛肚丼，上菜時因為用金屬碗，所以好熱，醬汁同牛肚撈勻之後食，醬汁幾濃幾好味。牛肚可能因為細條，份量如果再多少少會更好。薯條新鮮炸起夠曬熱，好好味，同埋18蚊都幾大份，感覺好抵。枝豆反而比想象中份量少，同埋係凍食，個人比較鍾意熱食的枝豆。串燒反而好似無咁吸引，試左串小蕃薯，細細粒甜甜地都幾好味。整體上呢間日式店食物質素唔差，可以再去。

我同我老公成日喺青衣搵食，見到涌美開咗呢間日式丼飯串燒小店，當然要試吓佢啦，我哋揀咗牛肉牛肚同味噌豚肉丼，每人再加$5要隻溫泉蛋，將每人嗌多罐可樂都係一人50幾蚊，好平不過串燒要夜晚先有牛肉牛肚飯，個汁好濃，牛肉同牛肚都好入味，好味呀味噌豚肉都好入味又好啱味，不過個飯嘅個汁就淡咗啲，個汁透明色，入面有啲紅蘿蔔粒粒，但係略嫌個汁淡咗啲，可以再改善一下個汁濃返少少配合返個味噌豚肉，咁就完美喇食飯期間同食完飯之後臨走老闆娘都同我哋傾偈好友善，仲問我哋啲嘢食好唔好食，話遲啲會改 menu 加食物，好期待有新嘅食物，下次再幫襯呢間小店

見open rice 評論唔多一開始都小驚 但又想食日本野所以一試 點知食完真係俾佢驚艷到係有位姨姨同類似仔仔經營嘅小店 十分有禮貌 見我地熱都即刻開冷氣 十分貼心我地揀左牛肚牛肉飯同吉列豬扒飯牛肚牛肉飯煮得好入味 牛肚處理得好好 好送飯好好味💕吉列豬扒粉好薄之餘豬扒又鬆軟，好味過出面賣80-90蚊個啲餐廳價錢真係超平 仲有50蚊嘅日本野食🥺總結黎講我真係好開心可以係香港依個鋪租貴嘅地方 食到廚師特登為我地而煮嘅個份心機同心血 而唔係機械式食譜煮出嚟嘅野食啊 多謝你地希望大家可以支持多啲小店🩵

今日去青衣探朋友，見到有間新開嘅日式小店，見到Menu嘅食物幾吸引，而且價錢非常超值，所以就坐低試試舖頭唔算特別大，不過坐得幾舒服，而且環境非常乾淨，有日式佈置風格，感覺都真係有啲似日本嘅街頭小店。試咗佢哋唔同嘅串燒，冇諗過呢個價錢可以有呢個質素😍😍😍 每一款都非常足料，調味剛剛好，份量亦都非常合理。有好多醬汁同埋調味都係出邊未試過，食得出大廚落足心機思考菜單同埋試味，無可否認係心機之作。我同朋友都覺得食物質素同坊間高價日式餐廳有得揮個人特別鍾意：🔺炸豆腐粒🔺自家製玉子燒🔺醬燒豬大腸🔺炸芝士年糕配焦糖醬🤤

路過呢間新開小店試業，即管入去試吓！ 見餐牌有味「味增豬腸牛蒡丼」，好有興趣一試！ 老公就點左照燒雞扒飯！ 兩個丼來到，賣相平實討好，急不及待要馬上開動！ 果然豬腸牛蒡飯做得好好味，豬腸好乾淨，食得出落過功課清洗，亦都好夠腍，個芡汁味道亦恰到好處，每一啖都要好好品嘗，出面真係少有食到呢味菜！ 同年青老闆傾落，原來佢話呢味菜，好花功夫同時間架⋯⋯😜照燒雞扒飯，亦無得挑剔，雞扒燒得嫩滑，照燒汁味道剛好，唔會太甜太稠！ 整體來講，我覺得值得支持，希望做落可加入更多新款式！ 💪🏻💪🏻