無腳雀仔不作停留 ﹗

奧志雷等級4 2017-08-25

592 瀏覽

晚晚外賣已經食到唔知食咩好喇，而且富園選擇有限呢。屋企樓下得富園一間麵檔，獨市生意唔休做，無選擇。尊登走去金源睇睇有無粉麵食，但全部係泰式湯粉，好失望啊 ﹗萬二分抱歉，我都唔想向四眼哥哥發脾氣架，但實在等得太耐 ﹗排我後面班等外賣既都走晒喇，等左半粒鍾都未有，點會唔上火 ﹗已經唔係第一次成檯單，又唔去排單，隨意亂掉。師傅求其見什麼就做什麼，完全無理會過先後次序，吼 ﹗價錢昂貴，又唔係好食，服務又差，根本無必要幫襯，只係貪您夠近，貪您收得夜乍 ﹗最多花多點時間，行去大埔廣場買外賣囉。蠔油菜芯走油，粗粗菜莖生水味重，欠缺天然菜甜味，略老帶點渣，試兩條較幼，最後都要放棄。菜葉合格啦，配埋蠔油入得口。蠔油芥蘭走油，外賣返到屋企已侷芥蘭有點變黃，幸好依然清甜爽嫩卜卜脆，無渣又可口，Good ﹗紫菜湯走蔥，紫菜爽爽的，跟清湯融合變成紫菜湯，美味啊 ﹗淨水餃魚蛋走蔥，富園自稱招牌水餃，真係有料到，好好好食。淨水餃門口廣告燈箱寫住招牌順德水餃喎，順德即是如何呢？梗係試試啦。師傅將每日新鮮包起既水餃落湯烚熟備用，每隻水餃形狀及大細都一緻，外形美觀脹卜卜又飽滿，極為吸引。包得結實不散，一趙爆汁，滲透齒縫之間 ﹗蝦仁非常爽口混埋甜美豬肉鬆、脆脆木耳，前後呼應，多種享受。醃味溫和不過太咸，蜻蜓點水剛剛好。意料之外的驚喜，滿意的出品 ﹗最後送贈鮮爽生菜作結，完美。淨雲吞，勁大粒呀 ﹗都可以說是一口雲吞既，不過一粒已經塞爆左我個嘴仔呢。好熱好熱啊，成粒啪入口熱到流眼水呀，好采無灼傷甩皮乍，貪吃之過 ﹗大大隻蝦仁捲上大大舊豬肉，醃味重重的，啤水假爽蝦偏咸呢，沾上辣椒油好味多了，哈哈。嗜咸嗜濃味的食家們應該得好滿足的，其實味道不錯的，只是我個人受不了。淨紫菜四寶走蔥，加紫菜就沒有生菜底的嗎？蝕左添 ﹗魚札味道勁差，超級難食 ﹗魚肉硬鞋兼備，捲住紅蘿蔔及芹菜，依兩樣都係我最討厭，而且芹菜有渣囉。魚皮餃麻麻地，腥腥地又滑潺潺，四州魚皮餃更好食。魚蛋，咸咸地又鞋鞋地，微彈。肉丸，平凡普通得可以，無異味有豬肉味，及格。淨牛丸墨丸走蔥，牛丸熱燙燙夠大粒，外滑內彈帶點嚥韌，肉汁豐富濃濃肉香。但緊記趁熱食，放涼後變得過咸啊。墨魚丸，實淨黏口，粉多肉少，微弱墨魚味道，一般。淨魚蛋走蔥，魚蛋表面鞋烚烚的，咬落彈彈的，爆開味道咸咸的，欠點清新鮮甜味道，大路質素唔難食亦沒有任何驚喜可言。魚片，炸過的外皮香口嚥韌，咸香出眾，魚片跟魚蛋同一情況，表面鞋烚烚的，咬落彈彈的，都是欠點清新鮮甜味道。魚蛋水餃米線走蔥，我係要淨魚蛋水餃呀，唔係米線 ﹗我一向最憎食米線架，收左我 $44 蚊架，回水 ﹗侍應哥哥見張單寫得唔清楚問係咪米線黎架？我答係淨魚蛋水餃。但到最後煮麵師傅都係整左碗米線外賣，激鬼死呀 ﹗米線滑中帶咬口，不太腍又幾好食喎，連湯帶麵線三扒兩撥消滅。淨牛腩牛肚跟湯走蔥，如果有清湯送會開心好多囉，想將牛腩牛肚掉落清湯度過一過，太過多油喇 ﹗肥牛腩黏著肥膏處處，幸好不太過份，還能接受不用咬掉。每條肉絲已吸得香料滷水透徹，啖啖清新香濃味道，脂肪位非常滑溜而不油膩，瘦肉鬆化軟棉，奇蹟的高水準啊 ﹗全部我一個自私食，一件都無得剩，到最後用來洗身碗清湯油到不得了啊 ﹗金錢肚勁腍不爽彈，滷水味道濃厚略咸，不喜歡。牛什撈粗走蔥，都話走蔥咯，何解話極都唔聽，好聞塞囉。侍應阿叔我叫您換過碗新既，您就求期挑走晒就算 ﹗挑走都有味架，突然咁慳呀？成碗無飲過 ﹗將粗麵跟蠔油撈勻，大口大口地吸啜，蠔油太咸呢，可能落得太多喇。粗麵腍腍黏黏太多水份，還可以啦。最初我想食炒菜芯架，但收銀阿姐話炒菜要 $40 蚊架喎，不如食烚菜啦。您覺得我無錢比嗎？我喜歡炒菜多過烚菜麻。無緊要，烚菜就烚菜啦。牛雜麵走蔥，牛腸好硬喎，不滑不彈牙，用多點牙力都趙得到，好采不苦不澀。牛膀最好食，棉棉滑滑又富彈性，肉味香甜十分滋味。湯底濃郁偏咸重口味，混埋辣椒油好惹味呢，忍不住飲多幾口，之後喝到半死呀 ﹗飲左一支綠茶加一大杯水都清唔到，以前無咁咸架喎，仲層經好食過添呢。椒絲腐乳通菜炒牛肉，炒得好香兼好有鑊氣喎 ﹗聞到即刻食指大動，首次品嚐富園小炒。旱通略硬帶爽脆，索索聲嘴嚼著，夾雜椒絲腐乳夠惹味。勁鬆牛肉軟腍腍，不自然的滑嘟嘟感覺，醃味頗咸，跟通菜一齊食可以輕輕減低咸度，不過不失。西蘭花炒鮮魷，突然想食西蘭花，富園無帶子，唯有食鮮魷囉 ﹗鮮魷雖然爽口，但好咸呢 ﹗西蘭花焗到變黃，腍劈劈唔好食。見到師傅一早已炒好放係檯面，但我個淨魚蛋遲遲未出，眼見我後面幾位食家已提取外賣離開左喇。兩個小炒套餐，走左 ﹗油菜加水餃麵，走埋 ﹗油菜加牛什麵都走埋 ﹗最後先到我個淨魚蛋，有無搞錯呀 ﹗好唔高興，我最先到架，點解做其他先？佛都有火 ﹗生炒排骨，突然好想食酸酸甜甜啖啖肉既咕嚕肉，係無骨既咕嚕肉囉 ﹗不幸地富園只供應有骨生炒骨。炸得乾身又香脆，不過無咩肉食。濃濃的甜酸味道夠醒，不過有點嗆喉，整體味道真的不谷，食完勁勁勁頸渴啊 ﹗菜芯炒牛肉，非常渴望食蒜蓉炒菠菜啊，竟然無菠菜供應呢。其實我以前係唔食菠菜架，忘記那一年、忘記吃了什麼，突然愛上菠菜。勁鬆牛肉滑嘟嘟腍劈劈，阿公阿婆無牙都食到又易消化，醃味濃濃重口味，還可以既。大大碌菜芯鮮嫩多汁亦無渣，只是菜甜味欠奉，沾上濃味芡汁算可口。繼續閱讀