一般住宅區的茶餐廳，相信它的目標群組大都是街坊食客。這間也不例外，開業大約半年，相信係「頂上一手」，餐廳名稱只加了個「新」字，陳設作少量翻新，菜式大多照舊。
食品比上一手稍為遜色，略微偏油，但以街坊茶餐廳來說，尚可接受。以往通常會食佢個「車仔麵」下午茶餐，因為夠飽，個別有D餸會分碟上，唔洗咩都浸落個湯，轉「新」後，都與上手一樣。
但自頂手後已少去食！原因係「貨不對版」、阿姐服務態度差劣(如題)！之前已有幾次不快經歷，但見幾個月也無幫襯又唔知食乜好，先諗住比多次機會佢啦！點知……
首先，佢個「車仔麵」下午茶餐係寫明有3餸1麵、配餐包、配茶/啡。(店鋪內的牆身都係咁寫！)
正路應該會出現的食品會有︰1)3餸1麵、2)一杯飲品、3)個包。即係是但一樣無，作為食客，係咪會expect 落單嗰個人會同返你講某樣嘢賣哂，叫你轉過另一款或用另一樣差不多的食品代替？這都是常識吧！
不快經歷一(好多個月前的weekend)︰叫咗呢個餐，碗麵都食完的時候，發現個包仲未有，便問個伙記(阿姐一號)，佢一邊抹枱，一邊回答說：「無呀，送哂！」跟手閃走咗，不了了之，我心想︰「送哂？乜唔係話配架咩？可以送哂？又唔早講？」正當因為個肚好空虛而灰緊的時候(因為expect有，但突然發覺無咗……)，阿姐一號同我後面枱的中年男士落單，他也叫這個餐，個阿姐一號今次有同佢講個包賣哂，仲提議可加1元轉多士烘底！ 我心諗︰「What?可以咁架咩？做咩1分鐘前唔係同我講呢D對白嘅？」咁我當然第一時間問返阿姐一號︰「係咪可以轉多士？」佢猶豫咗一秒，帶點不肖地話︰「…係，要加1蚊喎！」我秒回︰「加1蚊囉！」
--->點解無包唔早出聲？我要行量我自己的食量而叫咩食架！同埋點解男性食客同女性食客會有唔同服務&待遇？食個Tea都要性別歧視？
不快經歷二(幾個月前的weekend)︰今次早咗起身，諗住食個lunch。去到門口，好似無位，因為舖位細細，在門口睇睇情況先入去。有個女伙記在門口位置(阿姐二號)見到我「莊下莊下」問我︰「你多幾個？」我話1個，佢即刻話︰「無位呀！」完！佢眼裏帶有不肖，完全係趕客的態度。我也二話不說、頭也不回地走了！ ----->我真係唔係好明，黎食嘢姐，好似黎貼錢買氣受咁… 所以之後都無去該店食嘢。
不快經歷三(就係上星期日[10/1])︰諗住比多次機會佢，睇下服務水準有無提升。我都係叫咗嗰個餐，今次係阿姐一號落單。同一時間又有一個中年男士同枱，所以一齊落單。佢都係叫麵餐但同我嗰個有D唔同，落單時大約2:45pm(注意︰下午茶時間2:30pm才開始、阿姐一號無同我講係無包！！)。好快阿姐一號攞咗碗沙嗲牛肉米線放低，我同中年男人都諗緊孰誰，(因為我叫3餸，之前有講有時D餸會分碟上，我唔確定我D餸係會一齊上定分碟上，更加無為意中年男士叫了咩餸)，個阿姐一號又唔講係咩餐，只講係沙嗲牛肉米線(其實有用眼看都會知囉！)，跟住中年男士用糊疑的口吻回應︰「應該唔係我地嘅。」我估他都知我叫3餸麵，而嗰個麵連3歲小朋友都知係1餸的。跟住個阿姐一號攞返去，應該係check單。期間，阿姐二號問佢做咩，個阿姐一號就好勞氣，並大大聲說︰「佢話唔係佢架喎！3餸咪係佢架囉！」跟住拎返碗麵過黎，又大大聲+不耐煩地說︰「你叫3餸！其他分開上囉！」我忍無可忍回佢話︰「你都無講！！」之後剩下嗰碟兩餸黎咗，又見無咗個包，我就即刻話還欠一個包，佢又話「送」哂。我又忍不住話︰「送哂？」心諗︰「早又送哂、遲又送哂？係咪根本係無呢樣嘢？」我話︰「我要轉方包！」佢行開扮問得唔得(其實之前試過有個男伙記轉比我，我知係得嘅，但共通點係都無事先話比我知已「送」哂！)，咁最後當然有轉比我！阿姐一號問我會否加1元轉多士，因為氣上心頭之下，我1蚊都唔豪比佢！
------->正常攞個餐去個食客度係咪都會講下係乜嘢黎呀？何況係搭枱客？仲要嗰張單係佢自己落嘅！
總結，呢D咁嘅服務態度，我真係吃不消。仲有，我唔知這間茶餐廳有沒有違反商品說明條例！嗰個餐根本就寫明個餐包係配個3餸麵，而唔係「送」的！正常茶餐廳係寫「送例湯」大家都知這個例湯送完就止。有冇人接受到你叫個早餐︰雪菜肉絲米配火腿奄列、配茶/啡，原來火腿奄列「送」哂，跟住又唔早講，等你不了了之，或者等你出口問嗰時先話「火腿奄列送哂啦」，仲要好似係你作為食客嘅問題？
這間茶餐廳就咁成為我的頭號 食肆！
題外話/補充資料：
我唔知係咁啱，定係文化差異，阿姐一號和阿姐二號都操帶口音的廣東話(但我遇過好多正常的)。其實店內其他伙記係態度正常的，但奈何，一牚粥就咁俾兩粒老鼠X破壞了！
(以上食評乃用戶個人意見 , 並不代表OpenRice之觀點。)
影片
