新明苑園林海鮮酒家

營業中

休息中

去左間餐廳食下午茶，起身叫咗一輪香片茶同蝦餃、燒賣、腸粉等點心。來碟濃香片茶，先斟一杯暖笠笠嘅，畫開美妙旅程！🍵 蝦餃實在唔錯，果然冇令人失望，鮮蝦彈牙，薄皮爽口；燒賣蒸得啱啱好，肥嘟嘟嘅豬肉同菇好滋味。腸粉滑嫩得滑，蝦仔反彈得嚟，咬落去夠晒Q彈～ 意外之喜係嗰蒜蓉蝦春卷，出奇好食！輕輕一咬，蒜香四溢，蝦肉彈牙香口！當然，重頭戲係咕嚕肉。外皮脆得嚟唔油膩，裏面嘅肉滑溜溜，啖啖肉味，醬汁酸酸甜甜，真係「結」晒！🤤 你想點都想埋碟。另一邊，鱔魚粉果味道正宗，煎餅亦係又薄又香，少少肉末提味咁。咕嚕肉又香又脆，真係頂級享受😋，食個飽之餘仲要打包返屋企慢慢享受，呢度嘅食物真係香到飄三街！有得食，有得回味，相信日日都會掛住嗰種味！希望下次再試其他新嘢！

呢間酒樓好近錦繡花園，揸車人士去酒樓食嘢旁邊有得免費泊車，好方便。我其實食過呢間酒樓幾次，質素好有保證👍🏻叉燒，燒鵝同菠蘿咕嚕肉係必食，差唔多次次都叫。今次我哋叫左個六人餐加菠蘿咕嚕肉同四川麻辣雞鍋。頭盤有個燒味拼盤，不過大家太肚餓，差唔多食晒先唔醒起要影相😂我都唔係個個餸有影🤪其實每味餸都唔差，菠蘿咕嚕肉，蒸魚同埋個炸子雞尤其好食，估唔到個雞做得咁好，好滑。如果要揀呢間酒樓做得比較遜色，我諗係甜品，最後佢有個好似蒸馬拉盞咁甜食，係呢樣麻麻地，比較淡啲。堂食食飯無叫餐都會有糖水送如果未賣哂，佢嘅糖水如紅豆沙，西米露都係偏淡，啱哂老人家😁

同屋企人出黎食個點心飲個茶，錦繡花園出面呢間長期都好多人食，突特揸車入嚟試試去～價錢黎講呢間都幾平，我地叫左12款點心，總共$500左右，食到好飽😂整體CP值幾高，試得一試，會再encore👍🏻首先要推薦既係：燒賣，春卷，紫薯煎堆仔，流沙奶黃包。燒賣勁足料，足足有兩隻中型蝦仔，春卷炸得卜卜脆，加埋啲沙律醬，成個感覺昇華咗，紫薯煎堆仔甜度適中，香脆爽口，明顯係即炸，流沙奶黃包包體好軟熟，奶黃亦都好流心，但有少少甜。中般可食/唔食：腐皮卷，天鵝酥，沙礓雞腳，紅油抄手。腐皮卷好脆口，但食落感覺偏油。砂礓雞腳唔夠軟，不過份量幾多，都算抵食。天鵝酥酥皮做得好好脆，但由油膩味有啲重。紅油抄手中規中矩，冇乜特別。唔好食：蝦餃，香芒煎餅，蛋散。蝦餃好足料，大大粒入邊亦都有好多蝦仔，但個皮好軟，冇咬口😢香芒煎餅好油，完全食唔到香芒味。蛋散其實口感係唔錯，但超級無敵甜！佢應該係炸完之後再用糖有炒過，啲糖完全融合咗，好甜😢

新明苑吃過不下10次了，質素一直冇問題，大年初一不想煮，又想食中菜便想起新明苑了，貪佢有得泊車，而且即日又俾我地訂到位。職員很好，原本安排樓上，我們有老人家不方便上樓梯，佢都立即安排返樓下的枱給我們。大年初一只有套餐：4人6人12人 完全沒有散叫餐牌。一行4人，我不吃魚翅，便叫了沒有魚翅的4人餐。叉燒好吃燉湯有點過咸，足料的。龍蝦新鮮多肉彈牙，好吃！有提供蝦醬，加分！ 現在有些連鎖酒家都不提供了。甜品原本聽個名以為是湯丸，原來是清雞蛋糕，這個叫起甜品之後都等了很久，等到想放棄。要扣分。另外餐廳今天完全沒有散點，但菜單連甜品是7個菜都唔知可以點做，想加個咕嚕肉集齊8樣都冇計，希望老細留意返，我心中知就算了都費時講出嚟俾老人家知道，博佢地冇咁心水清。呢個真係要改善！話曬大年初一！食物質數同服務都可以，埋單連加一茶位$1400 左右，4人吃有餘有剩！

一家人在錦綉搵地方晚飯，朋友推介到此。是日6:30pm到,樓上雅座任選。侍應全程招呼很周到。第一推介是鮮菠蘿咕嚕肉。看圖便令人垂涎了。炸漿掛住醬汁，鬆脆包著啖啖帶肥甘的豬肉，成為此店的名物。我不吃羊,只吃生菜，筍和枝竹。如能像別家多加筍子，將會更受歡迎。小炒王原來是客家菜。碟中見有韮菜、芽菜、白飯魚乾、魷魚等，加埋腰果, 令整碟菜很香口惹味。例牌燒鵝和金銀旦豆苗亦是合格。但此家的糖水可以免了。

餐廳環境不錯，星期日都唔需要等位，但係某些員工對服務有待改進，自己對點餐內容唔清晰，落錯單之後，走去鬧客人，大家去嘅時候都要預左俾人鬧嘅心理準備，如果唔係，大家唔需要再去幫襯

早幾日同屋企人黎飲茶，覺得佢d 點心同出面唔同， 例如香煎小米糕、韭菜脆餅、炸鮮奶、懷舊芒果布甸。。。等等都唔係度度有得食今次就試下嗌下新野，不得了，食茄子既人一定要試下嗌佢個蜜汁脆茄子小食，姐姐話係新野，勁脆勁香口上面淋左d 甜甜地咸咸地既汁，我地全家都覺得佢係當日最好食既食物。乾炒牛河味道正常，鮑汁鳳爪今次就麻麻啦，上次食明明好入味，今次唔入味之餘，仲有浸雞蘇味，怪怪的。其他點心味道都幾好，同埋佢既叉燒都係好出名，肉質好淋易咬又入味👍

聽到公佈話禁晚市堂食，趁住仲有三晚，盡情搵一啲想去而又未去試嘅餐廳。餐廳附近有一個空地可以泊車。店入邊嘅姐姐好好人，知道我將車泊咗喺街，就叫我泊去空地唔使俾人抄牌。餐廳嘅選擇好多，除咗小炒之外，仲有燒味，同埋海鮮。蒜蓉粉絲蒸扇貝好大隻，亦都唔會話太多油，好味。砂薑豬手就略嫌唔夠淋，有部份有啲豬毛。呢個菠蘿咕嚕肉似乎係招牌菜，見到每一枱都有食，佢個咕嚕肉真係整得好鬆化。呢碟例牌叉燒，真係估佢唔到，有成條叉燒咁多。唔單只係份量大，重點係好好味，半肥瘦，兩邊尖位燶得剛好，中間夠淋，好得。呢個淮山豬肚雞煲，太飽了，要帶走。兩個人食咗咁多樣嘢， $570，其實三個人都夠食。總結：呢間有下次，其實寫緊呢篇食評嘅時候已經去咗第二次，食午市。

今天訂了枱吃晚飯，點了蒜蓉粉絲蒸扇貝，清蒸大海斑和選了一隻阿拉斯加長腳蟹😋 扇貝鮮甜配搭粉絲一流！海斑蒸得恰到好處，肉質鮮嫩！ 長腳蟹也是鮮甜好味，絕對沒有令大家失望！🥰酒家服務也很好對食客照顧周到！

早前聽朋友講話喺元朗錦繡大道有間酒家叫「新明苑園林海鮮酒家」有道招牌菜非常好食同出名，所以我們今日下午就特意去飲個下午茶！一去到見到門口有超多人排隊等位飲茶，我們都等咗一段時間先有位，心諗咁多人都嚟幫襯，啲食物出品都應該幾好！一坐低我們分別叫咗一啲點心同朋友重點推介嘅鮮菠蘿咕嚕肉，等咗一陣我們充滿期待嘅鮮菠蘿咕嚕肉終於嚟喇！一上碟店員就同我們講話啲菠蘿係新鮮即開，他們絕對唔會選用罐頭菠蘿，所以食落特別清甜，賣相亦十分吸引，食第一啖咕嚕肉就已經令我們覺得相當興奮，因外層炸得極之酥脆薄身，唔會係厚厚嘅炸粉，肉質非常鬆化軟滑，醬汁嘅酸甜度亦調教得恰到好處，唔會過甜或過酸，值得一讚！但最令我們更加讚賞嘅係，我們同朋友閒聊咗一陣同分別食吓其他點心，都差唔多有一個鐘多啲，本來以為啲咕嚕肉嘅外層會變到諗晒，點知一咬落去都仲係咁鬆脆，真係令我們覺得驚喜萬分，而且本人係超級鍾意食咕嚕肉，所以就更加覺得滿意，而且份量十足，係本人重點必食推介！

星期六1點鐘到 好快有位 難得有黑椒大腸 出面酒樓比較少有 就算有味道都一般般 所以試下, 點知超好食 味道方面調教得好好 啲酸菜亦都好好食 豬大腸 我畀10分燒鵝例牌 平時食濃味嘅我 都頂唔順 碟底個汁咸到要避開啲豉油唔好畀隻鵝肉掂到，但鵝肉又冇乜味但豉油就超鹹😵4分， 算係最太唔滿意嘅一碟鳳爪夠淋夠入味都好食8.5分乳鴿普普通通不過不失7分叉燒包 汁ok，叉燒少許乾硬7分金銀蛋菜 足料煲到湯都好味 8.5分豉椒肉片炒河佢用咗黃椒紅椒同埋紫洋蔥 普普通通 肉片亦比較乾 7分呢間一定會 再次光臨 為咗暫時喺香港食到好味豬大腸！😆

之前一直都係飲早茶，點心都是很傳統的粵式茶點，錦繡附近這家味道比較好了；疫情下，難得可以六人一檯，今晚請朋友們吃飯，個個都贊👍，翅湯味道濃厚，咸咗少少，燒鵝同叉燒正，最愛就係咕嚕肉了！

1.一個月平均食2，3次晚飯同外賣燒味，昨睌同家人食飯,燒餓凍同肉質硬，本身佢有火在碟下的，但送上來無點着，叫多次都無人處理。2.晚飯食完一直都有糖水送的，昨晩剛食完又聽到侍應主動問後面台2位食客要邊款糖水，跟住我要求2位糖水，侍應對住我揮手一直行開,我不太理解意,我見到她比二碗糖水後面客，我再次問她要2碗糖水，跟住她不禮貌說無呀無呀一直走,跟住我同她說後面枱你比款選擇，我說現在妳即刻話無,完全不合邏輯。跟住我家人再問另一位侍應,侍應說4位先有,吓後面都是二位人客來。同所謂鄭經理反映都無反應。 。你做超級熟客不更要,,不好講大話啦,,疫情高峰期間都成日光顧，現在多客返就咁對人客，什麼服務質素，不知所謂,請檢討下。

今日踩單車行程，由沙田踩去上水，最後上水經新單車徑入元朗錦繡花園，再去南生圍來回今日天陰陰，冇乜太陽，以為個天都會落雨點知天公作美，唔係好曬，有少少風，仲要冇落雨，不過由沙田踩到錦繡花園大家都體力透支，諗住快食個碟頭飯，大家都唔熟元朗，不過見到錦繡花園附近呢間新明苑，都好多單車車友停低喺度食飯，咁我哋一行四人泊好部車準備喺度開餐本來我哋諗住一人嗌個飯自己食自己，咁其中一個朋友就話想食點心，有一個朋友話「想食就嗌啦我請」，咁我哋就唔客氣帶咗六七籠點心，最後三個人嗌咗乾炒牛河，我就叫咗個海鮮湯飯都幾抵食，咁大個飯同咁大個牛河都係40蚊，仲要係個份量係好多，我哋仲叫咗蝦餃，燒賣，牛肉，腸粉，出色好味，真係喜出望外不過一定要一枱四個或者以上先至食得開心最後個朋友，真係拎咗張單去埋單，最後餐飯幾多錢我哋就唔知喇不過可惜嘅就係坐室外，風扇追唔到我哋張枱如果唔係要睇住部單車，坐室內嘆冷氣做very good

這間酒樓一直是我們的長期飯堂，食物質素高，職員有禮服務好，免費車位，價錢又不貴。今晚不太肚餓，所以點了5道菜，XO醬海蜇頭、口水雞、海味雜菜煲、叉燒併燒腩仔和一碟帶子櫻花蝦炒飯$48 海蜇頭大塊又入味， XO醬香而不辣，非常抵食叉燒多汁，半肥瘦，肉質鬆化。燒腩仔香脆，齒頰留香，吃了一口再一口，必食推介！$48 口水雞，香而不辣，份量多，雞肉嫩滑。這個櫻花蝦帶子炒飯是第一次吃，飯炒得乾身不油，帶子彈牙，整體都不錯。這裏的侍應比其他酒樓好得多，非常殷勤有禮，而且環境舒服乾淨！