新華源茶餐廳

營業中

休息中

今日特登去食，叫左個牛扒餐肉麵+茶走先黎茶走，茶走夠香濃幼滑，飲落口唔會澀牛扒餐肉麵，牛扒大大塊，腌得夠入味，餐肉都唔錯麵底同湯清爽唔油膩成個餐只係２１蚊，實在抵到爆！

住係呢區好耐都未食過新華源，見佢之前裝修左，望落幾乾淨企理，都黎食過一次早餐，覺得唔錯，今日下晝再黎醫肚。下午茶雖然都有幾多款，但唔太o岩食，好在呢間餐廳選擇夠多，飯/意粉/炒粉麵一應俱全，幾本上嗌得出都有。不過如果唔食lunch/dinner set就無咁抵，無記錯的話咖哩飯類要$33，炒粉麵要$35，小菜送白飯要$38，焗飯/意粉要$40。問下阿姐，原來3pm都可以叫午餐，$29仲送例湯，一於試下。叫左個鮑魚汁肉絲斑腩意粉，本來純粹貪得意，見個配搭幾創新先叫，唔洗食西冷扒咁悶，點知好有驚喜，鮑魚汁好惹味，斑腩有六舊好大舊，除左有肉絲做配料，仲有餐牌無寫的冬菇絲、草菇粒，送埋成碗湯渣十足的紅蘿蔔霸王花例湯加一杯熱飲，$29呢個價錢既好味又童叟無欺，非常滿意！呢個價錢同質素，絕對比幫襯連鎖式快餐店好得多啦～

我係呢度既熟客仔，一個禮拜閒閒地係度開幾餐!!先推介早餐：每次都係 B 餐沙嗲牛肉麵，腸仔炒蛋(注意：呢個係可以自由配搭，即係你可以轉為火腿煎蛋，餐肉煎魚)，加埋杯極香茶味既凍檸茶 午餐每日都會轉款，通常一中一西!! 今日試左 B 餐：咖哩牛肉飯，咖哩汁香濃，牛肉又夠新鮮，唔會"那"到林晒，例湯好好味，完全飲唔到味精!! 晚餐每日都有 3 款，有一次試左個帶子配肉眼牛扒，跟既係炒飯，個肉眼牛扒絕對拍得住某 D 以鋸扒出名既西餐廳!!

下午有點肚餓，隨便入間茶餐廳，要個下午茶餐，估唔到有驚喜！叫咗個魚柳飽加杯熱檸茶。檸檬茶香，魚柳飽味美。吉烈魚柳雖然油炸，但唔油淰淰，乾身，加兩片鮮蕃茄同沙律，麵包焗過外脆內軟。好味！

無論門面同裝修都唔會令人覺得有乜特別，只有食開嘅人至知，其實同區之中呢度食物嘅質素實在係高，尤其係佢哋嘅煎豬扒。今日睇完醫生同老母、二嫂嚟食lunch。由於份量唔少，而三個人入面有兩個食量都唔大，於是叫晒兩個午餐就算。一個係淡黑椒汁煎豬扒，另一個係紅酒燴牛尾。雖然叫兩個餐，見我哋三個人都照俾三碗湯，仲係大大碗足晒料，味精飲落唔多。牛尾燜得好淋好入味，個汁撈飯好正。豬扒個汁就唔辣，只係有香黑椒味，不過塊豬扒就好似落多咗鬆肉粉，因為食落淋得滯。以前呢度仲有粉麵，今日去見到個位吉咗。除咗飯正，個人推介呢度嘅早餐同特餐，豬扒公仔麵固之然正，有個沙嗲牛肉奄列都極正。通常前一晚玩得夜嘅sunday morning都會嚟食返個。

試過呢到的時菜牛腩湯飯,唔錯,牛腩入味同”淋",份量亦頗大,幾抵食.只試過叫外賣,唔知店內環境,但看門面已知是舊式茶餐廳格局,煙氣燻天,叫外賣適合d.