影片
以上資料只供參考, 請與餐廳確認詳情
食評 (72)
因為見到明星晚飯做海鮮優惠，就想去試一試。沙巴龍躉兩味不錯，大份，煮得好味，但有少少重口味，而且多油。乳鴿抵食好味，只需28蚊一隻。蒜蓉蒸聖子都算新鮮，而且大隻，70蚊有4隻，抵食。薑蔥桶蠔煲，蠔係炸左先，再同薑蔥一齊落煲，所以一上菜係好香，有六隻，但蠔有大有細，細好乾。最失望既係澳洲鮑魚，28蚊一隻，一上枱已經好意外鮑魚點解可以甘乾淨，一拎上手發現係離殻，重點唔鮮甜，就知係雪藏。好難接受酒樓俾雪藏貨。
繼續閱讀
假日同屋企人飲茶，食量不大所以三個人叫三樣嘢就夠我好鍾意芝士又鍾意伊麵，所以如果間酒樓有芝士伊麵我通常都會叫😋 明星嘅芝士伊麵係配蝦而唔係龍蝦，不過由於我唔食蝦亦唔食龍蝦，所以對我嚟講冇分別😂😂 芝士汁水準穩定，芝士味香濃，唔會有騷味，質地稠身，好容易就掛滿喺伊麵👍🏽🤤 而伊麵就水準冇咁穩定有時彈牙啲有時淋身啲，今次就略微太淋，不過撈埋芝士汁都好好食，推介👍🏽🤤另外叫咗燒汁煎釀茄子同家鄉甜薄罉，茄子走油/炸過，外脆內軟，配燒汁好夾，但燒汁水準唔穩定，有時味濃啲有時淡啲，撞手神😂家鄉甜薄罉好味，煎完嘅薄罉捲成一條切件，再灑上香脆花生碎，我特別鍾意食頭尾，因為多邊位脆啲，而花生碎就似平時糯米糍啲餡，都同薄罉夾嘅👍🏽總結：呢間酒樓水準唔太穩定，但差極有個譜，由其推介芝士伊麵👍🏽
繼續閱讀
好多人都會發現朝早食個早餐愈來愈貴，而家其實*平日*食早餐，自己一支公都可以試下去飲早茶，明星朝早孖寶雙拼都係二十幾蚊，計埋茶錢加埋一，四十蚊有找，可以揀粥、腸粉，炒米等等。我食左佢個皮蛋粥加米粉，坦白說，沒有什麼特別，只是朝早可以有個茶餐廳以外的選擇。
繼續閱讀
家有囍事 一家五口！慶祝父親節 兼 六月有兩位壽星一心一意黎明星食長腳蟹本身伯母想嗌啲翅食 但比我阻止左因為我地唔多食 反而我地中意食啲粟米魚肚（跟）😌小朋友口味好多魚肚呀 仲好大煲添呀🤤佢唔係加左好多水 或者坎咁架係真材實料 我同男友都飲左兩碗以上再黎個北京填鴨脆卜卜既烤鴨片 配上軟綿綿既春皮😍再加大量青瓜絲 唔即刻放落口都對唔住自己呀 凍左唔好食架嘛 襯熱食🖤🖤🖤佢切到啲鴨片係岩岩好厚度既鴨肉 1:1比例咁呀 咬落去啲油 正呀媽咪再來既係清蒸東星斑 去親酒樓都要食好嫩口呀啲肉 又煮到岩岩好 唔會太老太硬重頭戲黎喇 長腳蟹呀 成千蚊架！😎平時係酒店食buffet既松葉長腳蟹棒多真係未試過食成隻 auntie 佢地強力推薦話好食 佢地之前大時大節都有黎食過嘩 大過我隻手掌✋🏽我隻手都算大架喇✋🏽✋🏽啲蟹肉好鬼鮮甜 啖啖肉 又熱辣辣同酒店個啲凍食係兩回事！😱😱😱😱食極都仲有架 請原諒我掛住食 無再影落去 哈哈😝
繼續閱讀
轉眼半年第 2 季比賽完結，再到明星出席頒獎典禮。每次都係替其他鏢隊高興，終於可以上頒奬台領奬喇！坐低即時細閱餐牌，期望伙食比往年更好，最後菜單都係一模一樣！乳豬大併盤、上湯焗海蝦伊麵、翡翠花枝珊瑚、百花釀蟹拑、花膠筒螺頭燉雞湯、清蒸大海斑、鮑螺片扒生菜、極品脆皮燒雞、鮮蝦荷葉飯、奶皇流沙包、紅豆沙。本來隊友們聚餐食得開開心心，無啦啦走個醉酒婆過黎發神經鬧事，極為掃興！撻晒朵撩交打，自誇係大埔由細到大有幾惡有幾橫行無忌，聽到都打幾火！大家都係斯文有智慧，息事寧人寒暄幾句，無奈被敬幾杯啤酒侷住要飲，不同市井流氓計較，算數。參加幾年鏢賽，今屆最多隊友能夠完成比賽由頭掟到尾，無中途退出放棄，辛苦大家。初期分數包尾，掟到最後勇奪亞軍，得來不易呢！多謝各隊友出每一分力，大家都捱過好多激烈既飲酒排頭先有今日。首年有鏢隊衫就得亞軍，真巧合！戰鬥力 +5 防禦 +3 速度 +1 魅力 +5 會心 +5。除奬牌外，還有紀念座呢。我正式退役，留返機會比其他青年男女吧。經過演講、掟鏢、寒暄一輪，等到 9 點終於開飯，大家都非常肚餓，食左先講，殺呀！講到食我真係沒半點客氣，還要係我最饑餓既狀態下添。乳豬大併盤，乳豬微脆略肥咸味濃。燒鴨消失的鴨髀，只有胸脊位肉少細件咸咸的。叉燒鬆化，乾乾有趙口，微弱的甜突出的咸。豉油雞白肉滑滑嫩嫩，皮薄脆彈點點肥膏黏著，豉油味強勁。滷水鵝，鵝胸濕潤幼嫩淡淡肉，清香滷水甜美不濁。燒鵝，鵝皮肥騰騰食到滿口油，幸好鵝胸啖啖肉滲出甜美肉汁，醃味清香。白滷水豬腳仔，不是想有的佳餚，爽脆肉皮，彈滑瘦肉，滷水芳香肉多骨少無投訴。白滷水鵝掌翼，幼齒細細隻，黏滑外皮當然好味道。燻碲味道平平，皮彈肉韌。上湯焗海蝦伊麵，那些濕滑的師傅，粗心大意的伊麵！碎濕濕腍劈劈無味多汁水汪汪伊麵，加豆瓣醬直接拿起碗掃入口快靚正，基本上用筷子夾起都十分困難，要雙手羹筷並用。海蝦份量足夠每位有一雙，蝦甜肉霉不爽彈。鏢局宴會一貫作風第 2 道菜要來個伊麵填填肚，大家都攰喇，要盡快補充一下。翡翠花枝珊瑚，蚌還蚌、枝還枝、花還花，似乎沒怎麼交流。西蘭花非常爽脆，淨食清甜，配豆瓣醬蒜辣惹味，驅使我連食幾舊。爽爽珊瑚蚌滲著湯汁，軟滑花枝片不脆腍腍，三種食材齊齊食更繽紛多彩。蜜桃炸蝦球，硬掘掘的炸粉，咸咸假爽蝦球，讓清甜蜜桃夾著吃較舒服。炸海鮮卷，隊友們稱有異味，但我食落係完全無味沒有問題，酒樓經理都不厭其煩重新炸過一碟，感謝。我一向最憎食海鮮卷，因為從來未食過一間好食。炸得金黃鬆脆，完全無味，餡少醬少食緊乾皮一樣。無味蝦仔、無味帶子、無味蟹柳，咩黎架？百花釀蟹拑，其中一道我最愛的佳餚，望到雙眼即發光！每位只得一件，真係唔夠喉呢！外層幼細麵包糠炸得金黃鬆化，不硬不粗不刮嘴。狠狠咬啖，應聲爆裂！趙到索索聲，悅耳興奮萬分！蝦膠超級彈牙鮮味出眾，蟹肉藏於最中心位置保存肉汁，蝦蟹共融更加滋味，淋上酸咪咪浙醋更生動！花膠筒螺頭燉雞湯，超級無敵美味醇厚，連飲兩碗都仍想添飲。味道一絕無得頂，晶瑩透亮足料濃稠，螺味非凡，雞甜味隨後趕上，只是火喉削一點點。湯渣都無一幸免，除了乾鞋瘦肉被遺棄。爽滑花膠，濃味雞肉，膠黏雞腳，嚥韌螺頭，清得乾乾淨淨。鮑參翅肚紅燒翅，花膠絲海蔘絲鮑魚絲豬肉絲伴排翅，高湯四絲羹。厚厚稠密高湯底，醇美濃郁，原味精華盡顯，呷醋醒胃提神，忍不住連飲三碗！清蒸大海斑，各戰友有點飽半停手，到我發揮的時候，無需客氣。整隻魚頭歸我，夾舊膠滑魚肚，再多舊結實魚背，淋上魚汁豉油吊出鮮味，魚味濃啖啖肉，夫復何求。挑出大堆淨肉連汁，如果有碗炒飯就不得了！鮑螺片扒生菜，灼好生菜放底，鮑汁螺片芡鋪面，簡單易做，禮成！生菜鮮爽水潤配香濃鮑汁捲著螺片塞入口，暖暖的難得一讚！蠔汁扣冬菇鴨掌扒生菜，難得有道菜食得過，可以免強一讚。爽脆鴨腳皮入味甜美，損得高興暢快。厚厚冬菇一咬黏彈噴汁，菇汁清新可口，跟鮮味蠔汁爽甜生菜合併品嚐，味道更豐富更多姿多彩。極品脆皮燒雞，隻雞已炸好一段時間，不香不脆不熱，髀肉乾鞋硬，胸肉更地獄，失敗！白肉極咸，韌韌雞皮更咸，可怕！臘味糯米飯，甜豉油蒸糯米飯，撈得均勻每粒飯都有豉油香，夾雜蝦米及臘腸味道，欠缺臘肉油氣使得味道大打折扣，濕度太高影響味道質感，麻麻地唔難食。鮮蝦荷葉飯，萬分驚嚇！蝦仁腍劈劈軟賴賴，大家輕咬一下即掉。隔夜飯濕淋淋，飯香欠奉，難食！流沙包，只看外觀大家都非常疑惑，到底係豆沙包、蓮蓉包，還是麻蓉包呢？搣開原來係奶皇黎喎。我對包點或甜品都麻麻地，不過咬啖無妨。包皮軟塾好揸手，手感一流愛不釋手。流沙幼滑滴滴熱辣辣，咸蛋味出眾不太甜，失控地連食三個，真係唔好意思。紅棗糕，不愛甜的我都覺得此糕點有其美妙之處，淡淡紅棗甜，熱燙燙黏黏像年糕，質地味道均吸引。
繼續閱讀