泰壹泰 (已結業)

（１）馬拉盏炒芥蘭：略鹹（２）黃咖哩豬扒飯：豬扒炸得好，唔會乾〔真〕－〔真〕　　　而且咖哩汁鹹淡適中，撈飯食一流（３）炸蝦餅：好彈牙，好好味r ＊＊＊必提：侍應姐姐超nice ＊

但個個都叫, 我唯有改2食泰式黃咖哩雞飯啦.另叫了個青檸冰, 唔洗加錢架跟餐有個東瓜湯, 幾清, 喝一口, 有少許雞味.事實上也有少許油在湯面, 相信是雞油吧.好快有得食.中辣倒啦, 個姐姐之前話係小辣. 看來我的食辣能力減少了幾濃. 送飯一流~朋友的去了骨的海南雞也好夠雞味, 點些辣汁, 冇得頂~我搶了兩舊一試, 雞唔韌, 真的推介.4人食了130蚊.

Lunch時段一個人來到, 循例望下個有飯, 湯同汽水(可以加錢轉特飲)的是日午餐餐牌, 我選擇左泰式海南雞飯套餐($30)亞姐好快手咁放低枝細樽裝可樂同碗冬瓜湯, 湯應該用上煮雞的清加上冬瓜粒同蔥花, 有淡淡的雞湯味道, 都幾清甜, 但唔點解係加左香料定胡椒粉, 碗湯好似有些少辛辣味??!!等左5分鐘左右雞飯送到, 配上辣味比酸味重的泰式酸辣醬, 聞落去就對辦, 雞大概有7-8件, 已去骨, 但今次的雞熱騰騰的, 好似剛剛煮好咁, 頗特別, 同其他泰國食店唔同, 老實講我都未食過熱的海南雞, 但係d雞食落去都算係滑, 而且皮脆肉嫩, 雖然明知唔係新鮮雞, 但係雞味都幾濃, 算係喜出望外飯應該用雞汁煮過, 有淡淡的雞味, 但係並沒有平時食到的黃黃的雞油飯效果呢度的泰式海南雞飯做得唔錯, 煮價亦合理, 可以encore, 下次要試下滷水豬手飯

首先須更正一下，這間店的前身其實是『泰壹泰』，裝修后更名為金銀泰國美食，但Openrice上的『金銀』并非這間店。下面簡評兩餸：蝦球粉絲炒蛋$48，蝦球絕不是“球”，不過尙算彈牙；炒蛋亦孤寒，但$48一個餸又不收加一，也無理由期待太多。難得是味道意外的好，油雖然不少，但同場的番茄、青椒同芽菜又中和了不少油膩，再加上我個人喜歡粉絲，對這個餸印象頗好。泰式炒金邊粉$45，金邊粉韌韌的十分彈牙，椰菜很多，整體偏甜。但店家落了太多蝦醬，味道都幾濃，有少少的腥味，食不慣蝦醬的食客一定不會喜歡。間食肆雖然默默無聞，但試過的兩個小菜水準都不錯，又是經濟抵食，日后可以繼續幫襯。

午餐本想去亞呂吃遠遠的竟然看到它下了閘不知是摺了還是未開店還是是日休息？希望不是摺了．．同行的友人就提議來泰壹泰雖然他推薦海南雞飯，但今天食力實在麻麻就挑了泰式雞絲金邊粉（＄２０）雖然只收二十大元但雞絲份量很足，金邊粉也不會過軟味道淡淡的，倒是很對我今天的胃口但喜歡濃味的朋友可能會大呼救命；友人的海南雞飯餐（＄３０）看上去挺吸引的但因為沒試吃就不亂評了。但他加＄７換的泰式椰汁冰卻是令人眼前一亮！濃濃的椰沐味加上凍冰冰的，正！只是略嫌稍甜了一點點店內可以看到不少泰文連「請勿吸引煙」的牌也是泰文．．不禁想起前些天看的「四條大路通陰間」．．．＝　＝

食過了漢堡包, 仍未飽.記得約三年前, 因 "有事要辨", 和朋友來到紅磡; 找晚餐食, 行行 o下, 見到個泰國國旗, 原來是餐廳, 內進才知係 "無間道"泰國毒梟 果間.早幾日在電視見到森哥已轉型做獎門人, 但仍鉤起我的回憶, 心血來潮, 又想看看毒梟, 走了過去 老龍坑街 果邊, 但原來已執了....回程卻見到這 "one thai one", 也有些明星相, 雖無森哥, 但好奇駒使之下, 入了去... 地方幾好, 很乾淨. 又有電視看;午餐只有三樣野食, 海南雞飯, 豬扒 阿華田, 第三樣忘記了.menu 是我見過最細的 !也好, 不用煩...咁當然係海南雞啦!豬扒 阿華田都不知係乜東東... 再問個好友善既姐姐, 她話係滷水豬扒再加華田粉, 會係甜的, 算了...湯先上, 好鮮甜.之後到碟雞飯, 嘩, 已去骨, 正宗.啖啖肉, 正~碟汁也是正宗泰式的. 回想去過另外餐廳自稱泰式海南雞, 但上檯係俾碟薑蔥你, 不知所謂...30蚊, 很好了. 仲有凍檸茶.朋友以前話, 掛滿明星相的要小心, 可能是對的, 但總有例外既~ *廁所勁乾淨, 一讚~

天寒地凍應該食番D熱辣辣地野,行過又想試o下佢地D海南雞飯.叫左3個午餐($28),分別係海南雞飯,脾飯同咖喱雞飯.海南雞飯D雞好滑,己經去骨,啖啖肉但係無雞味,不過都預左,見佢成隻雞都只係賣$90就知係乜野貨啦.個脾飯有好多梅菜,味道都似梅菜扣肉飯,加上皮爽肉滑,好正.最普通係咖喱雞飯,唔係好特出.午餐包湯同飲品,都好抵食.

21號同女朋黎食...因為聽聞幾好..叫左泰式無骨雞...滑+少少鹹..sauce幾得意少少spicy~泰皇泰炒飯...仲諗住好特別...點知係香腸+炸雞翼...個飯炒得唔夠乾...味道又無乜+唔特別...雖然雞翼好脆..但味唔夠...唔夠飽呢..

昨晚我地一行三人原本去食牛腩麵, 剛剛途經路口見到有間舖頭門口貼左幾張老闆同明星影D相, 一定有D野, 於是大家睇睇間舖食D咩, 原來食海南雞飯, 大家便轉移食海南雞, 坐底齊齊叫了海南雞飯同一碟泰式鳳爪沙律, 好快便有得食, 先試食件海南雞, 嘩!件雞暖暖地好滑, 而且D雞皮好爽, 雖然D碟飯細碟左, 但好夠味好好食, 跟住食碟泰式鳳爪沙律, 好夠辣都好好味....大家經過紅磡, 不防去試試.....

主人與奴隸獸在店前望著那些黃油雞，看似非常美味。主人又要趕著回家看電視。只好決定外賣。1. 招牌海南雞飯（HK$28）：海南雞，皮爽肉滑，皮下少脂肪，食落不油膩，有雞味。油飯有淡淡的香茅味道，果然好味。2. 炸蝦餅（HK$38）：有五大件蝦餅。食落香脆爽口，有蝦味。如果堂食相信味道更好。下次可以再試此店的其它菜式。

同一條街，相隔幾個舖位，有兩間泰菜，先試了「金香茅」，是日再試埋這一間「泰一泰」。比較起那邊，這裡是光猛很多，同樣有電視看，而菜色方面，其實也大同小異。見午餐的頭兩項是海南雞飯及泰式豬腿飯，懶得諗就要這兩樣。是日想吃想酸酸辣辣的去吊吊胃口，所以就捨青木瓜沙律，而取青芒果沙律。比較起兩碟飯，青芒果沙律才是是日重點。青芒果刨絲，酸酸的，亦隱隱的透出芒果香。囑其「加辣」，所以加上大量辣椒及花生碎，吃起來是夠酸又夠辣。際此大暑天時，吃此味就最能引出胃口，不吃青木瓜，吃青芒果也十分適合；至於海南雞飯，這裡的飯跟隔離金香茅一般是雞汁飯，沒有什麼香料的味道，好處是原汁原味，壞處是有點兒腥味，未必人人喜歡。比較之下，在雞汁飯一項，是比較喜歡鄰舖多一點。雞件全去骨，肉質嫩滑，沒甚雞味，不過也不介意，海南雞也就是這樣子。這個包湯及飲品的海南雞飯套餐，只賣26蚊，相當經濟抵食；鹵豬腿也做得很入味，尤其是外皮的部份，口感軟滑，甘香豐腴，醬汁味又香濃，人間美味。但廋肉的部份又韌了一點，像煲過湯的豬肉般，還好配上濃香的醬汁，下飯也適宜。飲品就相當求其，凍奶茶是熱熱的，加了冰塊，才變成暖暖的，完全不凍。咖啡是即溶的

是晚本想去大光燈光顧她們的雲吞麵，居然因換水渠而全店休息一天，在差不多年終無休的情況下唯一一天的休假都踫上，都幾失落。無奈晚餐仍未著落，就從曲街行到這裡，見這裡廚房師傅在舖面玻璃裡正為海南雞起骨斬件，細心之餘亦大膽以海南雞作招來，以一間標榜泰菜的食肆用一道風馬牛不相及的菜式來招來，怎樣都入來試試！已經九時多，一個客人都沒有，問清仍未收舖後就坐下，一客海南雞飯走翼。這裡的海南雞飯是去骨的，是脾上位置，啖啖肉之外而這裡的雞味頗濃，不是冰鮮雞之餘亦不是滿佈脂肪，都幾滋味，而用來粘點的醬汁是泰式酸辣醬，當然跟正宗的海南雞飯醬汁不同，但這裡的海南雞粘上這泰式酸辣醬，亦是另一種滋味。附送的雞湯放了泰式香草，清清的雞湯味道配上香草的辛辣味道及加上白蘿蔔一同煲製，頗為獨特。雖然進餐過程中沒有其他食客來光顧，但反而看到起碼三至四個顧客來外賣海南雞飯，似乎這菜式幾出名。廿八元一客的價錢，都算起值，而店員都禮禮貌貌，客客氣氣，連非本土的泰籍仕應都笑容滿面的招待，難以溝通的情況下都盡量幫忙，故招呼方面絕對不錯。

大英倫敦有條Baker Street,我們亦有條Baker Street - 必嘉街在紅墈,沒有福爾摩斯這個街坊,但有這間賣海南雞飯馳名的"泰壹泰".午市套餐的海南雞飯賣$26,有湯有凍飲,差不多每人也叫一客.可見這店的主力是誰.先嘗其湯,用冬瓜加雞去煲,在夏天來一碗,的確下了不少火,事實上,這個湯味道亦清甜.海南雞飯為泰式,上桌時雞肉排得公整,靚靚仔仔.雞肉除雞翼之外全去骨,嫩滑到吹得彈破,雞肉亦濃郁.如果雞肉同雞皮之間有皮下脂連著的話,就更好了.雞油飯香而不膩,可是不夠均勻,有些飯粒上色不夠.是否小弟近年吃過最有水準的泰式海南雞飯?不敢說,但一定比那些吹捧過度的名店好得多.