深涌農莊

營業中

休息中

已經不是第一次食深涌農莊客家菜。因為行山多次途經深涌，次次都叫蔥油農家雞，今次訂了南乳炆鴨試吓。鴨肉夠腍，南乳入味，推介！其他菜式都具水準，有足料揚州炒飯、砂窩香滑雞粥、煎蠔餅、客家釀豆腐。深涌當然要食埋個環境！對住大草地一嚐美食，一樂也！

呢間戶外餐廳是呢度唯一一間餐廳，大排檔嘅格局，大圓枱鋪上紅白格仔膠枱布和膠椅，供應港式茶餐廳食物和客家菜 (需要提前3日whatsapp預訂)。坐喺度可以對住美麗的大草原和水池食午餐。煎蠔餅 (HK$100)．好香好大碟呀🤤．幾多蠔，仲要係大大隻，脹卜卜的，正．蛋煎得好香，好有鑊氣，但不會過熟，仲配有好多蔥和入味蒜頭乾炒牛河 (HK$90)．我好耐冇食過啦 (10年有多!)．同樣好有鑊氣，炒得每條河粉一條條的，不會一pat嘢，幾多軟腍的牛柳，味道不錯👌🏻

放假去開附近魚排玩朋友就介紹左我哋嚟食呢間隱世農莊落船之後要行一段路，但好易搵的～沿途風景都好靚老闆係美國回流返香港嘅華僑因為我嫲嫲都係客家人佢哋煮嘅客家茶真係有返我嫲嫲煮果啲味一定要試嘅係蔥油雞！！！（啲雞係新鮮係沙頭角入貨，所以要提早預訂先有～walk in係食唔到架！）佢啲蔥油炒到好香！！送飯一流！雞好多肉但唔太肥，岩我口味！！睇返想又想再食呢隻雞！！蠔餅、豆腐、同牛河都好出色其實餐牌嘅客家餸都要訂定因為老細係要特登買餸架！！鋪頭仲有兩飯得意店貓～食下嘢又同老細吹下水遠離市區煩囂過下慢活嘅下午好正～加上嘢食係超水準！！就算出長水遠嚟食都好值得

今日叫咗兩樣嘢，一個客家釀豆腐，外脆內軟，值得一試，另外一個沙窩香滑雞粥，雖然份量唔係太多，但係有屋企嘅味道，再叫左一支烏龍茶同埋一支蜂蜜綠茶，環境綠油油超級靚

早一排去咗西貢深涌行山，跟住行到差唔多五點準備等搭船走，就去咗呢一間士多食野，補充下體力。本身都冇乜期望，叫咗一碟乾炒牛河，一碟都大概一百蚊左右，但好大碟，兩個人食剛剛好，而且相當夠鑊氣。另外我仲叫咗一罐啤酒，佢嘅杯係用雪冰過，所以好冰涼，夏天飲嘅話將啤酒到入去杯，可以維持一段時間都凍冰冰，飲落透心涼，而且望住無敵大草原，有一刻覺得好似去咗外國咁，所以如果經過做補給，去呢度食都係一個唔錯嘅選擇，淨係睇個景都已經值呢個價。

秋高氣爽去深涌行山，按資料顯示係無餐廳，預備咗小食同水果，諗住去深涌大草地野餐架啦，點知深涌草地居然有農莊茶室，全部人即刻衝過去，都係諗住食碗餐蛋麵，但係一見到個餐牌有小菜，即刻舉晒手要食。首先介紹呢道唔book未必食到嘅南乳鴨，係眾多菜式中最最最好食嘅一味菜👍👍👍👍 南乳味濃得黎完全唔會蓋過晒尐鴨味，而尐鴨肉更加係嫩滑到唔識講，一咬落去有少少油香，超級juicy!!! 為左呢隻鴨，可以行多幾次深涌😀非常實在嘅蠔餅，啖啖都食到蠔，十分充料，又夠香口，媲美大排檔嘅水準👍推介非常夠鑊氣嘅揚州炒飯，蝦仁爽口彈牙，蛋絲均勻，肉粒同蔥花都好新鮮，好好味～炒時菜係另一必食推介，叫左兩碟，差尐追加第三碟，好甜好爽好新鮮，唔知係咪自己種😆 必須一提嘅係，係呢度飲野，全部都會附冰杯。行左信零兩個鐘，飲到一杯冰杯可樂，真係人生一大樂事。唔食飯齋飲野都夠開心一日啦！（唔記得咗影相）

行山行到熱辣辣，抖下醫肚！飲返罐啤酒爽下😌，重有冰杯，老闆真貼心！肉絲炒麵幾足料，麵夠脆😋客家釀豆腐好滑，炸蠔餅好脆口，食埋乾炒牛河，飽晒！下次約多幾個朋友行山再試埋其他客家餸菜先！

深涌農莊 (士多) 位處深涌露營熱點的大草地一旁，負責管理營地，亦為營友提供食水食品補給。對於未有準備食物的朋友，更可於士多點選炒粉麵飯，頗為方便。週末於好友到深涌露營，抵達後的午餐就是在士多享用。 由於地點偏僻，亦屬獨市生意，食品定價當然較高。楊州炒飯是筆者喜愛的飯款，味道不俗，但有團友投訴飯粒稍硬。相比之下，乾炒牛河出品無投訴，雖然少不免有點油膩，但足味牛肉與香口炒河能取回分數。 整體而言， 深涌農莊的炒粉麵飯在出品上有交代，作為營地補給站更存在一個明顯優勢。

陽光普照, 最好不過郊外健行吸收吓大自然靈氣, 人都健康啲。從馬料水坐船到深涌馬頭, 沿指示牌行約45分鐘便到深涌農莊。今次黎郊外食傳統客家菜……….深涌農莊對住一片綠油油的大草地, 身心舒暢。終於黎到 lunch 食店 ~~~~ 深涌農莊價錢大眾化熱屎辣辣…..老板娘係冰箱攞隻冰杯出黎, 冰杯加凍啤, 渴一口, 涼透心, 真窩心。南乳炆齋跟平時食的不同, 我覺得味道怪怪地, 但同台2位姊妹卻不覺有異, 還食得津津有味。煎蠔餅這裡的招牌食品, 薄薄的蠔餅煎得味道香而也脆口, 蠔餅加入了鴨蛋, 蛋味較濃, 蠔仔雖細也鮮味十足, 還加入了大量芫茜蔥, 好鬼香口。客家炆豬肉傳統客家菜又點少得最靚既猪腩肉, 五花腩肥瘦相間, 肥肉爽口, 豬皮黏口而軟糯, 瘦肉的部份也炆得入味鬆軟, 味道濃郁而帶醬油及南乳香, 叫人不停的一件一件往咀裡送。