盈海四季中日火鍋料理 (已結業)

呢度好Chill，對住海，雖然唔算近，但又好多樹，春夏季黎就係一流，冬天可能好凍！呢度個帳篷似足泰國華欣，令人不禁想去旅行🧳影相或者周年紀念一流😍🍴雖說今次晚餐只係普通晚聚呢XD我地叫咗拉絲咕嚕肉，但係發現……佢菠蘿同咕嚕肉分開煮，好好笑😆但菠蘿係新鮮的，不是罐頭🥫都算有誠意！青椒好辣啊😖另外，我地叫了沙嗲雞串、牛串，但上台係冷的，十分可憐🥺魚餅就普通，不過不失，埋單$547/2人最好笑係個菜，張圖明明係白菜苗，但佢上菜心，個侍應仲傻，話係咁的，但見佢後生仔，廢事投訴，搞到佢無份工。仲要第二台都問另一個侍應，女侍應較年長，居然倒食物！好浪費，其實可以問下客人介唔介意或者叫廚房小心謹慎，台台都錯菜單！唔知係侍應問題定廚房問題了！

極不推薦的餐廳！四眼阿伯態度惡劣！初來白石角，看見這餐廳有海景，平日下午茶有折扣，於是嘗試。食物的質素尚可，結賬時，光頭四眼阿伯忘記打折，我便提一提他我們是2pm後入座的。阿伯話：「我唔知呀！我點知你幾點入黎呀！」一邊語氣極差一邊void單，重新打單。我問阿伯攞番張void單，佢話：「攞去啦，垃圾黎啫。」第二次是假日帶父母去光顧午餐，落order職員話跟餐+$6有凍飲，結果結賬時又係四眼阿伯，收了4杯凍飲正價。幸好我們搵番個職員對質，該職員再講一次熱飲加3蚊，凍飲加6蚊。阿伯話個職員新黎嘅，對唔住，照收正價。爭辯一番後，佢極不願意地做番個跟餐餐飲價，仲不停重覆大聲講：「對唔住！！」我阿爸要返張單做泊車優惠，佢又諸多留難，話張單改過唔知泊唔泊到車架，又話佢要keep呀畀唔到單你etc. 這兩次的光顧，實在是不愉快的經歷。觀乎四眼阿伯的態度，就算食物再好，都不過如此。

白石角lunch一向無啖好食，食得科學園其他野多就想試下新野，咁啱行海濱見到呢間就試下買外賣食下，佢個入口要係tom bar & grill再入先揾到，平時仲以為佢到tom bar & grill 同一間野黎。見食評寫到服務好差，但我買兩次外賣都正常。之前食過焗豬同肉骨茶已覺得好唔錯，d豬扒好好食芝士係爆多，肉骨茶好夠味又足料，入面d排骨會夾雜豬軟骨，軟諗好味！！ 今次第二次叫肉骨茶+蜜味豬扒，肉骨茶一樣咁掂，豬扒今次呢隻整法無焗豬咁膩，睇黎呢間所有有豬扒的午餐都值得一食！

星期日瞓醒食完早餐諗住去中大遊未圓湖，遊咗一陣就散步到科學園 lunch，經過呢間見有檯就坐底，叫咗個午餐茄子炆伊麵加個泰式沙律，然後再叫 xo 醬炒蘿蔔糕同腐皮卷。蘿蔔糕好味但份量好少，腐皮卷比較油，伊麵上檯時睇落好淋但食落又 ok，泰式木瓜沙律幾開胃好味，但用個邊爐醬料兜上，個兜已經細，仲要用塊生菜墊高，木瓜沙律成本唔高，收 $18 都要咁𠱓啲客就唔好。對住個靚景環境空礦食嘢人都舒暢啲，見其他食評講到服務態度差我又唔覺，有機會都會再幫襯，食完浴吐露港散步去大埔都好舒服。

見到comment大家都話呢間野服務態度好差，咁我就講句公道說話。呢間野唔係好差咁簡單，而係好！鬼！差！係科學園食過兩次呢間野，講真價錢已經比其他餐廳貴，野食水準又唔係特別好，試過兩次係呢到食飯，結果都係有唔愉快經歷發生。特別係個四眼阿伯員工，懷疑同老細有仇，專係幫餐廳倒米。我話拎四個人嘅位，佢就話“兩個人請量體溫”以為佢聽唔到重覆多次講咩點知個阿伯員工嗌到成餐廳都聽到講野大大聲小弟心臟一向唔係大好，差啲比佢吓到心臟病發，幸好咁啱有帶救心丹，如果唔係真係要叫白車食左兩次得出的結論，真係無下次我都叫老細們千萬唔好來呢間野食比咗錢仲要受氣，野唔係咁好食科學園有更好的選擇希望間野好好改變下

週末好鍾意去科學園踩單車Hea吓❤️，呢間餐廳地點好方便，約埋三五知己中午睇住靚景食點心😉好鍾意佢嘅鮑汁鳳爪、酥炸魷魚鬚同埋鹹蛋黃炸魚皮😋食完飯在餐廳外已經可以租到單車👍

2021年10月1晚上在科學園盈海四季打邊爐，坐係外面帳篷度，點左餐坐了好耐無人來上菜開爐，零服務，無服務員招待，咁唯有自己入去order 野飲和點個炒飯，當初無咩野，第二入去問要唔凍的可樂，有位負責收錢的啊伯就話你要咩，態度極不友善，好似煩住佢咁﹗炒飯等左大半個鐘，係一pat 屎咁，用菜心頭來炒菜，又硬又有根，收$108；另外問個啊伯攞罐唔凍的可樂，條友就將凍的放入熱水度，再攞起來卑你﹗小朋友去睇魚，卑啊伯教訓，「d魚唔嚇得的，唔好咁做。」埋時問啊伯要手寫單，啊伯突然殺出一句，下次早d響啦⋯⋯盈海四季係出垃圾食物﹗千萬不要去光顧，令佢在科學園消失可以換上新店。

先唔評論呢度既服務態度...例如舉手極耐啲侍應都好似當你透明咁，問佢哋攞杯熱水，佢會叫你自己出去斟啦⋯⋯今日叫咗個梅菜扣肉飯。首先佢一上枱其實我已經覺得心知不妙，點解啲顏色完全唔對板嘅。食落去更加大鑊...點解可以完全冇味嘅？！ 究竟我食緊啲乜嘢呢？ 好明顯地佢係落漏咗某啲調味料....我深信。

呢啲天氣近海地方打邊爐，聽到都覺得凍上加凍😆但呢到好好啊，加左一個個帳篷又加左膠圍住，開住個爐都唔凍啊，又唔怕大風😚食物方面都唔錯，隻蠔好似隻手咁大隻啊，大少表示好正好滿足😆每人平均$400左右，呢個環境加上呢到嘅侍應都好有禮貌，所以呢個價錢唔算貴啊😚加上呢個可以帶埋小狗一齊坐，令我更加開心會緊嚟幫襯，因為係香港真係好少地方可以同狗仔一齊食飯仲要係打邊爐嘅就更加少😔所以要好好Mark低每一個可以同小狗一齊食飯嘅地方😚

其實不是第一次來，因為有小朋友爬架，所以都會同朋友來食飯。今日實在太經典亦太受氣了！ 話說我們一家來食午餐，點餐後經理過來解釋西式及泰式午餐今日沒有，只有中式的，剛巧我們都點了西和泰式，於是經理於點餐紙上刪了所有沒有的餐。本身已經覺得有點失望，因為點餐紙無了一半選擇，然後有一位阿姐又行過話 “無鰻魚架啦” 我哋覆返佢我哋知架啦。到選好之後，就俾點餐紙阿姐，佢就忽然話 “哇，俾小朋友畫到咁花嘅”, 真係火到嚟，於是覆佢 “唔係我個女畫嘅，係頭先個阿叔刪嘅，你落單吧啦” 然後佢忽然就發難彈返一句 “使唔使咁悪呀” 我即刻呆左，心諗你無餐，然後屈個小朋友畫花，我同返你講係你同事畫可以有幾悪。於是同佢講咁唔使落啦，我哋走啦，佢又再話 “你二公婆做乜咁勞氣啫” 我哋再話俾你你會點？我哋無講粗口只係同返你講唔係小朋友畫嘅仲可以點？就係哩個時候佢就話 “得啦，唔食就算 x數” 我哋一家真心呆左，有無必要用粗口鬧人先。我都識講粗口，唔係驚奇你識講，而係你客人一家大細，又無對你做過乜，都要用粗口鬧客人嗎？真係咁唔憂做？咁不如直接唔好做吧啦。。。。

今日個天氣好正 😎 氣候清爽怡人，又有太陽又有風，最適合就係黎海邊既餐廳食 lunch 😋 我地坐喺室外，面對著海，有膠簾擋著啲風，好似提早放假咁 🏖我地叫左凍檬豬頸肉、肥牛石鍋飯同福健炒飯，賣相同味道都好 😋 呢間野，喺科學園食 lunch 黎講，算係性價比唔錯 😄👍🏻 個肥牛石鍋飯尤其驚喜 😎 個鍋好夠熱，不斷冒煙。我最鍾意食飯焦，呢個鍋就岩晒 😋 個凍檬都正，大大塊豬頸肉同札肉，夠味又夠多，好滿足既一個 Friday lunch ⛱

呢間食店位於海邊 風景都幾優美。裡面空間都幾大，可以容納都幾多台。有d台可以坐到十個人，多人都唔洗怕。裡面食物種類都幾多，有粉面 有炒飯 有西餐，都幾多野揀，來到唔洗驚無野arm食。食物味道都唔錯ga，炒飯都幾香。想食平d可以揀粉面，最多可以選三送，唔貴，50$有找。午餐時間店員比較忙，食物來既速度唔係特別快，不過都可以接受。另外，落單個陣可以講清楚d，如果唔係有機會落漏or落錯單，我今次來就試過，不過朋友都照食。飲品都係，漏左，不過後補都幾快既。

全因為環境，所以走入科學園。因為科學園，所以走入盈海四季。一個閒日嘅晚上，所以園內人不多，非常寧靜👍🏻隨便走入一間試試。盈海嘅姐姐都好殷勤，招呼也好！室內環境一般，相信秋冬室外進餐相當舒服😌講返食物，隨便點咗幾樣啫啫芥蘭煲～香味四溢，味道亦很濃👍🏻正椒鹽牛仔骨～牛仔骨有D靭，不合格海南雞飯～雞香滑、油飯強差人意但整體而言係不錯的，等天氣涼D會去試吓食火鍋！

上星期到科學園一家日本餐廳晚餐，覺得不錯，走的時候途經這家火鍋店，今晚專程和太太到這家店吃火鍋，點了一個蕃茄薯仔豬骨鍋，這個可以說是我吃過最差的蕃茄鍋，一鍋超級味精清湯，三條大豬筒骨，小量蕃茄，幾片薯仔，連蕃茄醬也沒有加，整鍋只是味精一點蕃茄味肉味也沒有，另外那個所謂中份的特級手切本地肥牛$300，覺得只是幾十元的貨色，桂花蚌切的碎碎的，桶蠔的size是我吃過最小的,感覺這家店真的是貨不對辨，非常失望，本人以後也不會再光顧

與同事在科學園跟客戶開完會，天氣又夠乾，趁此良機，二人就在園內吃個火鍋晚餐。當晚的火鍋湯底極之清淡，介紹食材更有興趣。蠔大隻得誇張，涮過之後也沒有縮水，一隻要分三口來咬，蠔肉帶汁一同在口裡彈奏著交響樂！魚蛋呈不規則形狀，明顯是手打的。咬下彈到飛起，魚味十足，而且很大粒，嚼勁十足。雲吞和水餃都勁足料，肉餡甚為鮮美；同樣很大顆，滑溜入口卻又極其豐富。爽甜的蓮藕片切得厚薄適中，涮完之後仍有咬口，吃到蓮藕的清甜，不用只是涮肉那麼單調。豆卜自是火鍋的不二之選，難得的是豆卜絕不油膩，好像是出過水的……總之是好味。還有的是不同肉丸，雖然不俗，可是質地較實，比起之前滑嘟嘟的蠔及雲吞水餃，難免比了下去。環境清幽，竟還有陣陣清風送爽，加兩支啤酒，一日的疲累盡消，二人大樂也。