聚寶海南雞

營業中

休息中

今日又係悠閒星期日，好彩好天左成日先落大雨😆男人今日放得晏，之前食左野，但做完家務又餓，所以同佢再食😂新蒲崗可能主力做工廠區同學生，好多鋪都唔憂做，星期日實休息，原本想食韓國野都冇開，改食呢間，平時行過都多人，但男人話唔抵所以冇試過，今次食完佢讚不絕口呀（佢份人勁高要求，都好少聽佢讚人好食要翻炒😂）其實都唔貴丫，外賣成隻都係$120之嘛，呢個時間黎咁岩下午茶，都係$35仲包野飲。落左單好快就送到，睇落都唔細碟，同出面咁上下，醬汁有3種，我地一致覺得3種都好食，不過同其他鋪一樣，通常比勁少汁。講番主角，無骨雞真係一入口就滑入我喉嚨，滑到冇朋友，好有雞味，加埋醬汁真係停唔到口，花生同酸菜都好正，至於飯方面就一般啦，軟硬適中既，不過就唔係特別香，但整體都好好，我諗呢間已經成為男人新寵，佢實日日食😂PS:夜晚先打番食評，一路打一路諗起碟飯，而家好想食，哈哈，下次都係唔半夜打😆

屋企好忙，今年冇時間發魚翅整乾鮑，淨係發咗豬婆參、用澳洲冰鮮鮑煲雞、茄汁蝦碌、煎帆立貝等。團年飯加料，區內可選嘅有限，“得龍”燒鵝過時過節次次都燒得差幾分冇收油勁肥，已經唔想搞到食到發脾氣。諗起“聚寶”海南雞，之前一日已經問定年三十晚收16:00，於是阿媽就中午時份買定留番夜晚。呢度嘅海南雞次次都冇失手，全部骨去得好乾淨碎都冇，雞肉滑有油香，附送嘅薑蓉係我最鍾意嘅醬，細佬就鍾意點另一款豉油。有時落街食晚飯都會去“聚寶”，貪佢幾十蚊有湯有餸有飯，個湯都唔錯，成個煲仔上。