茶理史 (已結業)

女人對於奶茶，總沒有抵抗力。特別在熱辣辣既30+度高溫下，特別需要呢一杯冰涼既飲品黎解暑。咁岩經過，就行唔郁步。睇menu選擇都好多。我order左一個士多啤梨鮮乳地瓜小芋圓,望落好靚，好有層次感。最上一層紅色係鮮榨既士多啤梨汁（有果粒）。酸酸甜甜。下邊白色既部分係鮮乳，比市面上普通牛奶更加濃稠，但我嫌佢太甜。雖然飲既時候已經將紅白兩個部分攞飲筒攪均，但還是覺得太甜。下次可能半糖就可。地瓜小芋圓係屬於地瓜既偏黃色。原本我以為口感會十分煙韌。but並不是，佢既口感偏淋，而且可能粉可能猜得唔夠，所以有D散，試唔出有地瓜既味道。若知道係咁，我會選擇珍珠。應該會好d.好在佢都非常實在係用新鮮水果榨汁，為左呢樣，下次可以試下其它。

今晚食完晚飯唔夠喉走去旺中食左個雞蛋仔食完好口渴🤣要搵野飲出左旺中就見到呢間「茶理史」係對面哈哈～今次我唔想飲奶茶咁漏我就買左「京都八重櫻花白茶 $28」先講包裝呢款茶用樽裝都幾方便飲唔哂可以放返落袋度一陣再飲又得味道好清唔會太濃茶底有d花瓣係度都幾特別食完雞蛋仔咁漏既野再飲呢款茶都幾解油膩佢仲標注呢款茶係無糖添今次整體黎講係ok既👏🏻5⭐️為最高味道：⭐️⭐️⭐️推薦：⭐️⭐️⭐️回頭：⭐️⭐️⭐️

黎到旺角嘅茶理史，好多款唔同口味可供選擇，簡左牛油果🥑鮮乳小芋圓，大失望的說。之前係葵廣飲過同款，牛油果味濃郁，同奶味balance到，唔會話邊個蓋過邊個。但旺角呢間，衝出黎個味好失望，好大陣奶味，完全冇牛油果味，雖然杯野都見到係綠色，但係好差，飲落去等於飲奶。唯一可以讚嘅係店員沖得快，唔需要等咁耐。價錢3x，同出面飲品舖差唔多。朋友簡左抺茶鮮乳果個都係同樣感覺，奶味比較重。如果改善到呢個問題，會好好飲。

呢間茶理史非常多分店，我今日都係第一次試，每次經過都見到好多人，今日喺旺角中心行街，行到一半見到竟然冇人，加上行咗咁耐都已經口渴又有少少肚餓，所以忍唔住去幫襯一下。好有中國風嘅格調，文字都係用書法。鋪頭外面仲張貼左好多好評，另外仲有推廣佢哋嘅網頁。草莓鮮乳地瓜小芋圓$32飲品嘅漸層做得非常靚，明顯地睇得出草莓🍓鮮牛奶🥛地瓜小芋圓，三種不同類型。鮮奶非常香濃加上草莓嘅味道真係絕配，地瓜小芋圓口感比較特別，偏淋身， 有地瓜嘅味道，又唔會好大粒卡住飲筒，煙煙韌韌，又真係幾得意喎！飲完一杯解渴得黎，開始有啲飽肚，又充滿力量去行街。下次叫第二杯野都要加呢個地瓜小芋圓～因為我真係好鍾意呢個口感～

夜晚叫左杯熱木瓜鮮乳地瓜小芋圓。飲果陣已經覺得怪怪地，唔好飲兼個喉嚨越飲越唔舒服。飲完15-30分鐘開始胃痛，痛左成晚，完全瞓唔到，食左藥都冇用。第二日工都唔駛返。打死唔再幫襯。

木瓜 有苦味！！ 一般般 但非無法入口 木瓜成為敗筆可能諗住加糖 加奶唔覺微糖的話 即使與奶混合 苦味依然在無咩奶味芋圓大大粒 都幾多唔知係依款飲品問題 定係咁啱水果唔靚不太推薦

叫左杯琥珀白玉奶茶同薑黑糖奶茶白玉戈杯茶底直頭係泰式奶茶加左白玉珍珠以為茶底會出自家野特別啲 點知係泰式奶茶略有小失望 叫左半糖都係偏甜 大家下次可以試下微甜 但珍珠有點硬 味道認真一般..另一杯黑糖唔錯 薑咪重 一入口已經有一陣辣味湧出 黑糖味都夠. 如果你唔抗拒薑味 可以試下呢款 熱飲既話應該會更加暖身🤔但我戈杯就唔洗叫了🤷🏻‍♀️

旺角不嬲多台式野飲，黑糖珍珠奶茶都唔少。但我又想試試芋圓做既珍珠，所以就揀咗茶理史🤓我見餐牌都有唔少特色嘅嘢飲，好似玫瑰、薑汁黑糖珍珠都有，好多都想試😍最後揀咗宇治抹茶芋圓第一啖佢超濃嘅奶味係勁鍾意！再加上啲芋圓一啲都唔淋，而且好彈牙，本身以試伏嘅態度去買，結果超級驚喜飲飲下就決定撈勻佢上面啲抹茶係超濃，而且一啲都唔會話好甜，鍾意抹茶嘅朋友係一定一定會鍾意呢隻味❤️❤️呢啲天氣我就叫咗微冰啦，如果叫咗常溫就會係熱杯裝，就冇咁靚喇😆

我叫左宇治抹茶鮮乳地瓜小芋圓$30一飲落口飲到粒粒抹茶粉未沖得勻，所以口感怪怪地，而且味道有啲似去日本餐廳自己加果隻抹茶粉，不太香我叫左微糖，所以飲落真係甘甘地一般般，建議大家唔好叫少甜，應該會好味啲小芋圓真係大力推介，原來芋圓可以頂替珍珠既位，而且比珍珠更好食喎小芋圓佢比既份量都足夠，飲落真係啖啖芋圓，好煙un,我特別鐘意食紫色芋頭圓，愈咬愈有芋頭香，所以呢到既芋圓係幾出色下次會試下其他味，但係今次試宇治抹茶就認真麻麻啦

旺角商場新開咗老虎堂，倖存者口痕想飲杯珍珠奶茶，點知老虎堂排到不見天日，反而佢對面號茶理史空無一人。一心趕時間嘅倖存者退而求其次，一戰茶理史！見佢新出咗玫瑰白玉奶茶，粉紅色嘅poster成功虜走倖存者嘅心，加試玫紅味奶茶又唔係常見，點可以唔試！玫瑰白雲珍珠奶茶 $30飲落去陣玫瑰味似香薰，唔知倖存者飲唔慣定點，覺得陣味有啲假。珍珠除咗白色無咩特別，口感偏硬，就算叫咗微糖都仲係好甜，如果叫正常糖份會幾甜？

最近香港真係越開越多台式飲品店鋪，款式都大同小異，黑糖珍珠奶茶啦，芝士奶蓋啦，水果茶啦... 終於有間唔係珍珠奶茶咁簡單，就係 “茶理史”!! 主打賣冷泡茶，燒麻糬，仲有小芋圓飲品!! 佢唔同嘅地方就係將珍珠變左芋圓粒粒今次點左芋香鮮乳地瓜小芋圓($26)，小芋圓粒粒分明，煙煙韌韌，好好味呀!! 另外仲有芋頭，令到成杯飲品無論口感定係味道都更加豐富，正!!! 顏色有漸變層次效果，都幾靚嫁!如果飲嫌左珍珠奶茶嘅話可以去試下 “茶理史”

路經 旺角，本見手做芋圓 想試下，但我唔飲鮮奶，所以無試 水果鮮乳系列，見食評有人話奶茶有茶香，試最普通的 《琥珀白玉奶茶》$20外在： 顏色橙色，初初都覺得好奇怪，配白色透明珍珠味道： 差透了....本來忘記了 微糖，果然甜到一個點🙁、都不能怪佢，但整杯奶茶，無茶香，無奶香，好似飲緊 盒裝飲品咁......😑😑加上太甜，我飲到一半，好有放棄感覺。唯一可讚，白玉珍珠質感 軟軟 又有咬口，似手做感覺

香港地開左好多臺灣飲料，好飲的就見人見智，今日係見到旺角中心食完lunch順便買幾杯台式飲料請同事飲，我飲果杯係蜜瓜鮮乳地瓜小芋圓，味道不太甜，芋圓有咬口，奶味重，過下口癮就足夠！價錢適中！

喺旺角T.O.P. 行街，一出就見到呢個茶店，見有啲口渴就買左杯蘋果翠芽綠茶（微糖）試一試，一開始見到杯野以為有啲玫瑰花瓣咁有趣，飲落原來啲一粒粒粉粉紅紅嘅係蘋果皮，口感幾特別，如果佢係蘋果肉會開心啲😝不過都無咩可能，因為會容易氧化，蘋果皮無乜咬口，對於我而言有無都無所謂，係外表美觀啲，影相會靚啲😂茶味方面都香，不會苦澀，好在我哋叫微糖，味道啱啱好👍🏻其實佢啲小芋圓都幾吸引，下次會試埋😋👍🏻

👁‍🗨 宇治抹茶鮮乳地瓜小芋圓💲30呢晚係旺角食完飯好口渴，想飲野之際見到附近有間茶理史🤔排隊既時候見有好幾個人攞呢杯，隻漸變綠夠曬吸引，所以又跟風叫左呢杯🤤但係飲落就出事，入口卡住卡住，味道好淡，無抹茶味，亦都無奶香，整體黎講係好多洁埋一舊舊既抹茶粉末同奶水😭🤢配芋圓的確好有創意，不過芋圓煙韌度不足，芋頭味尚算可接受，但地瓜味就唔多覺🙈好努力飲左半杯就同佢講掰掰👋🏻🔛 整體評分（5.5/10）