陶源酒家 (已結業)

在呢度擺一圍同師傅慶祝，選這裡不為其他，純為近便，因為佢老人家就住在附近。星期日人客不算少，侍應服務態度都好好，招呼笑容做齊，值得一讚。先來六小碟，其中以豬手仔最好吃，有咬口又整得入味，好有水準，我們幾下手勢就搶吃一空；炸豆腐都唔錯，三件切件，豆腐本身有質數，炸得外脆內軟，是師傅最喜歡的一碟；其餘薰蹄、燒肉等俱一般。再來就是酒席的那幾個例牌菜，菜色賣相精緻，味味都用隻大靚碟上，碟頭幾大，夠份量，十一個人食一圍食到飽一飽。芝士焗龍蝦伊麵底，係眾人都喜歡的菜色，但縑味略鹹及汁太杰，有點膩，所以只吃了兩舊龍蝦就算；兩斤左右的東星斑蒸得火侯剛好，值得一讚；蟹皇翅味濃，師傅亦下了不少；蒜香雞只是炸子雞加炸蒜蓉，眾人說是這裡的出名菜式，我是不以為然，雞肉嫩滑而欠雞味。食到飯麵已停手，反而之後的甜品又不錯，美點雙輝是蓮蓉酥拼綠茶餡糯米滋，兩者皆不錯，另外還有楊枝金露，亦隹。少不了的是壽包，不是很大個，比東海的遜色。非常均真，食唔完的菜會全數幫人客包走，連飲不完的啤酒氣水亦然，服務又加一分。埋單是四千全包，以地方、水準及份量計，唔算太貴。但食完都幾口渴，如無意外是重手味精作怪。

慶祝母親節, 屋企人book 左呢間餐廳, 裝修唔錯, 地方幾整潔, order 左一個母親節精選套餐, 約二千幾蚊, 約十度菜足十二人食用. 其實十度菜中大部份都唔錯, 難得大時大節都有呢個水準, 其中印象深刻係1.黃金蒜香雞(見圖):似炸子雞皮脆肉滑, 而且有蒜香. 整晚最欣賞.2.飄香荷葉飯:荷葉香味唔錯, 不過多油左d3.生炆班翅: 班肉十分滑而覺得一般菜的式都有3個1.蠔皇花菇, 花菇基本上無咩味2.花膠紅燒龍皇翅: 似乎魚翅唔係好夠3.碧綠炒球:似乎魚肉比較鬆散左d其他菜方式不過不失.服務態度幾好, 幾有禮貌, 不過真係人手不足, 幾乎一個人睇3張台, 而且上菜快而亂, 碟又大隻, 只可同時上4度菜, 其他菜又上得快, 只可放在旁邊灘涷, 而侍應心急時又錯漏百出, 十分攪笑~ 不過食物服務態度幾好, 相信只係人手不足, 一時handle 唔到大時大節o既場面.有機會平日都會再黎試多一次!ps.呢間酒樓唔收開酒費^__^"

約了幾個朋友一聚，有個朋友推介呢度，所以成班傻佬拖男帶女的專誠搭車來幫襯。假期第二日，人客不算多，我們一行十人訂了十二點，十一點九來到有好多位，食到一點都未滿座，我估平時週末放假唔會咁少人的。總括來說點心賣相好精緻，味道雖不似外表咁正，但都不差。都吃了十多個點心，一般的點心如蝦春卷、叉燒包及煎腸粉都唔錯。幾個「廚師長推介」有好有唔好，錦鹵雲吞的汁好酸，炸雲吞中間有蝦粒，幾好，18蚊食得過；冰燒脆腩仔是五花腩走油再用燒，並非如一般燒肉的成隻豬燒，肉質肥廋相間，味道不錯，但48蚊有點貴；鮑汁花生炆鳳爪，花生同鳳爪都炆得唔夠腍，所以亦唔係好入味，38蚊唔係好抵；銀蘿金錢肚即蘿蔔牛肚，普通貨色，38蚊，可以食其他點心。茶是不錯，比一般酒樓好；招呼亦週到，食到一半會幫人客換碟。埋單八百幾，唔算好貴。