陸號

營業中

休息中

經過平台有新餐廳開張，就同朋友入左呢度食，睇完餐牌見到黑柳牛柳意粉同咖哩吉列豬，就叫左呢2個餐試下，天氣熱叫左凍飲，野飲好快送到，同朋友飲左一啖就覺得杯野勁甜，淨係得糖水味⋯⋯黑椒牛柳意粉啲意粉係碎上，好難夾起，之後吉列豬扒係炸到好燶，近乎黑啡色咁滯，好難食，無下次⋯！

樂富啱啱新開，有新嘢一班同事梗係一齊試吓啦。不過大家都覺得唔會有下次。因為啲食物質素真係幾差下。同事嗌咗一個鹹魚雞粒炒飯，見唔到雞粒，最多係蛋炒飯，而且啲飯炒到濕粒粒。而我就嗌咗一個蔥油叉燒蛋包飯。啲叉燒柴咁硬，啲蛋淡而無味，唔知佢用咗咩米啲飯都係濕粒粒，夾硬吞咗落去。不過杯奶茶都唔太差。但係我唔會再為咗佢杯奶茶再去食佢啲劣食囉

樂富新開咗一間茶餐廳（陸號）今日 4月16號去試下午茶餐， 叫咗一個乾炒豬扒出前一丁同埋一個瑞士汁乾炒牛河，等咗20分鐘先剧豬扒出前一丁，妹妹話味重，多鹽花，鹽花都未溶，同埋碟麵係唔熱嘅，我等多5分鐘先到乾炒牛河，味道可以， 同埋炒得唔太油， 但系真系唔熱（系暖）， 今次寫食評係希望餐廳可以改善，點解食物唔熱！

新開見坐左咁多人打算試下，叫左3個餐，第一個沙茶牛肉麵，湯底麻麻，牛肉亦唔出色；第二個雪菜肉絲米只有一個咸字，冇特別，腸仔先係重點，勁難食，咬落去係淋晒，好cheap既腸仔；第三個蕃茄餐肉麵個茄湯都係好難食，湯底好似係水開茄膏咁既味，難得叫左3個餐都咁難食，真心唔駛再有下次。

樂富新開茶餐廳，諗住入去試吓晚餐，睇吓有冇驚喜，食完真係有驚無喜，差啲想報海關！本來想叫個辛辣麵餐，個阿姐話冇辛辣麵，跟住想叫個星洲炒米，阿姐又話冇米粉，頂，759就係樓上，買啲辛辣麵擺下門口都得啩！席間叫咗幾份鐵板餐，先上一份有鐵板，但其餘嘅就用普通碟上，想問上菜啊叔點解，佢就淨係話廚房冇鐵板，用碟上，跟住阿叔就轉頭即走！本人就叫咗份「香草燒羊架」，真係想講粗口！嗰三件羊係炸到全熟！完全冇咗羊架個形狀，好似中咗輻射咁！啲薯條同伴菜係凍嘅！最奇妙係杯凍檸茶，係無茶味嘅！成份餐，四個字：不知所謂！朋友叫咗份鐵板牛柳，當然又係無鐵板喇，切開舊牛，舊牛入邊全部係血紅色！只有表面嗰層係熟，好明顯係廚房將舊牛求其炸一陣就上碟！另一朋友叫咗個焗豬扒飯，個份量仲少過其他茶餐廳嘅下午茶份量，朋友話味道只是一般，絕對不值！最離譜係個蔥油滑蛋叉燒蓋飯，真係有冇搞錯，啲蛋係炒到全熟一粒粒，你個餐牌係滑蛋嚟㗎！啲叉燒就濕濕碎碎，仲要炸過，啲叉燒仲硬過條命！好似食啲超硬豬肉乾咁！坐低喺呢間茶餐廳食嘢，好似得罪入邊啲侍應咁，完全冇禮貌！Black list, 無下次！