食味道小廚

營業中

休息中

農曆年前約朋友在大埔街市食晚飯, 當晚街市大部份大排檔都滿座, 無訂檯的要等位, 晚餐期間上洗手間時行經一個大排檔，發覺呢檔食客唔多, 於是同樓面阿姐吹水, 問下點解無乜客嘅？阿姐話由於大排檔剛開無耐，仲未有太多熟客, 叫我有時間試試, 佢哋招牌燒鵝, 乳鴿。於是年初七就約埋一班朋友去食晚飯，之前已經預訂一只燒鵝，老板問我幾多點鐘人齊，原來佢要預早40分鐘放只鵝入爐燒，燒好之後要等5-10分鐘先至斬得。碟鵝送到來，未放低已經聞到鵝香撲鼻，食落皮脆，肉質結實，味道適中. 當晚另外叫了一些小菜，造得也不錯。昨晚和朋友再去試試老板推介的`黃金狗肚魚', 心想狗肚魚有乜咁特別呀, 碟魚送來時聞到蛋黃香味，賣相吸引，原來先將狗肚魚起骨, 炸完之後再上咸蛋黃, 用來送酒一流。老板話想食呢個菜一定要早，因為工夫多，客多就唔整. 原本想試埋乳鴿，點知手慢,被另一檯客將全部乳鴿要晒，唯有下一次啦。