影片
呢個星期二，即6月6日，時間唔係魔鬼組合嘅6點，而係點紅點綠嘅13點，正值上古賢君出巡，即大雨（諧音大禹），從地鐵站步出，想起網友介紹話位於觀塘廣場，有間好食嘅車仔麵店，於是嚟到呢間已轉手逾年嘅車仔麵檔試食，呢間麵店未轉手之前，我久不久會買串魚蛋同司華力腸止心癮，轉手之後就未試過，今次係第一次。叫咗我至愛嘅豬皮，廚師推介嘅豬大腸，豬紅同埋紅腸，麵就揀咗車仔麵店少有但都開始多出現而且比較健康嘅紅薯粉，再配一支烏龍茶，承惠$60。先講支茶，原來只係細支裝津路烏龍茶，附近地區只買$8咋，早知嘅話，我就唔買，等食完抵住口渴先至買啦！加上支茶唔係非常凍，起咁熱嘅天氣下，更加唔值。豬皮爽口，無沙無毛，基本功做足，但燜得個味雖然唔係淡，但我嫌唔夠濃；豬紅，有部份比較硬身，做唔到軟滑嘅效果，呢方面要扣分；豬腸，非常乾淨，算係燜得腍，但少咗個靈魂：豬腸內壁嘅豬油，所以唔夠順滑，質感偏硬；紅腸，表皮顏色鮮明，終於食到無酸餿味嘅加工醃肉製品啦（之前試過兩間食店嘅醃製加工肉，包括火腿同紅腸都有酸餿味），滿足；紅薯粉，煮得夠透夠滑，合格；湯底，我會多飲幾啖，原因係飲完唔會口渴，而且偏濃味，但又唔似係腩汁或沙嗲汁嘅味。整體嚟講，碗麵無驚喜，唔似間舖頭掛住個電視播片所講嘅好食，可能我要求高啦，我只能夠講係合格，不過不失，唔算得上係好食，但份量足係事實，以我坦克車嘅身型都夠飽就知道份量有幾足。（想起肥公車仔麵如果唔係食到成口豬毛嘅話，真係好食）最後有件趣事要講嘅，店舖嘅牆上貼滿要客人用餐完畢，自行收拾嘅字貼，但我巡完整間舖頭（間舖堂食座位只容納最多12人），都搵唔到放置食完嘅托盤及餐具位置，只係見到有一個大垃圾桶，於是我迫於無奈咁，同上一手一樣，食完就走。
繼續閱讀
落觀塘做完野咁岩見到就想食車仔面，叫左個兩餸米線再加$9加左份豬扒，total$44。咁佢整好我就拎走，因為係湯面冇專登打開check。坐車返到屋企發現佢比漏份豬扒，打返去舖頭，其實佢都知，就叫我返去拎。我表示已經坐車返左屋企，叫佢一係payme過返錢比我，佢就話佢地冇Payme。問佢咁仲有咩方法退錢，佢叫我下次過去同佢地講。但問題係佢收咗我張單。個職員就話佢地會信客，有客話佢漏野就會退錢/補返。如果係咁，即係間舖根本就慣性漏野。收左線就食面啦，個面我叫BB辣，但根本辣到食唔到，我要倒晒d湯換左熱水落去。要食就自己睇路啦。下面係未倒湯食左兩啖
繼續閱讀
麫底可免費轉菜底，今日有菜心苗同生菜可供選擇十分適合唔食澱粉質人士臨尾仲會加一羹蝦皮，增加湯底鮮味如果唔食蝦皮，記得落單前講明位置尚算易搵，扶手梯對出就可以見到
繼續閱讀
最近發現 #觀塘廣場 有間超抵食車仔麵，4個餸都係 $44 ，#CP值超高，係我呢排既新寵兒，有好多款餸不再話，每款餸都好多量，擺到成個碗都超Full，仲要啲餸唔只一件，超抵食 ，仲要麵底都超多，男仔食都會夠飽☺️另外，不得不讚真係最正係個湯底，有好多料，有櫻蝦皮，蝦籽等唔同配料，一啲都唔味精，食完絕對唔口渴，真係湯都可以飲埋，仲有，老細好記性會記得我食乜，有時會係我落單前溫提我邊樣餸無貨 ，係人情味呀♥️，絕對推介， 行過觀廣必定要試�🌻🌻🌻🌻🌻
繼續閱讀
由於呢間餐廳喺公司附近，所以都幫襯左5次左右，其中兩次係俾少一個餸，一次俾錯麵，而今日又係俾錯麵！首先我點左個撈麵，餐牌上冇寫要加錢，點餐紙上亦冇寫，但付款時就話要收多1蚊。ok，唔係問題，1蚊姐。當野食ready la，我見係湯麵，就緊係同佢講返我係叫撈麵。但個煮麵呀姐態度勁差，懷疑我講大話咁，叫收銀睇吓我係咪真係落左撈麵，check呢樣嗰樣，當佢發現我冇落錯時，佢當堂黑口黑面，我心入面真係超嬲，佢仲要一句唔好意思都冇。事後同同事講返件事，原來佢之前都試過俾少左餸，呼籲大家幫襯呢間舖記得check清楚。講真咁多甩漏，冇心做就不如唔好做啦。
繼續閱讀