80後味道 (已結業)

岩岩開，諗住試下，叫個碗仔翅同埋燒賣，燒賣就平平庸庸，同平時喺街食嘅差唔多，碗仔翅就非常之稀，見到都有啲奇怪，而且個碗個size都好細，不過又唔係好貴。個老闆解釋就話因為佢哋係做懷舊風味，咁所以碗仔翅就冇雲耳同埋剩係得好簡單嘅材料係入邊，因為懷舊嘅碗仔翅係冇咁多材料。我就覺得呢一款碗仔翅唔係好啱我口味，始終可能同平時食開有雲耳同埋冬菇等等材料嘅碗仔翅唔同，同埋個人覺得應該要杰少少先似返平時食嘅碗仔翅，碗仔翅太稀好似飲緊一碗中湯咁。

今日出屯門搵朋友仔，經過呢度試咗個冬瓜茶，好好飲，消暑解渴。每日都有自家製涼茶，如果我住屯門就好喇！好想飲薏米水，最好日日有得飲。仲試埋佢個碗仔翅同酸齋，正！個翅十幾蚊大大碗，食完已經飽哂！最近由於疫情嚴重，沒有了堂食，所以都係買返屋企，早知就買多幾枝冬瓜茶啦，可以飲多幾日，而家想飲又懶得煲，冇得飲。好掛住佢嘅自家製涼茶同碗仔翅。題外話，最好笑嘅係聽到有個客話呢間舖啲碗仔翅好細碗，唔夠三個人食，嗰刻真係想問個師奶喺邊度可以用廿蚊買三人份量嘅碗仔翅。