影片
港鐵旺角站 E1 出口, 步行約3分鐘
繼續閱讀
電話號碼
26776680
26776690
營業時間
今日營業
11:30 - 00:00
星期一至日
11:30 - 00:00
以上資料只供參考, 請與餐廳確認詳情
食家推介
放工同朋友出咗嚟旺角，經過一個叫GOGO為食坊嘅地方，見好多人上去食嘢，我哋又上去試下先。樓上舖地方十分大，有圓枱、方枱、卡坐等，店員示意隨便坐。⭐滋潤湯水任何小菜都可以加廿蚊轉套餐，包括餐湯、白飯同熱飲，餐湯唔係一般例湯，是晚嘅滋潤湯水係雪梨生魚湯，滋陰潤肺啱曬秋天飲。⭐招牌燒鵝下庄叫咗一份燒鵝下莊，上枱時閃令令十分誘人，燒鵝皮脆肉嫩，鵝油甘香，連骨都入曬味真係好正喎🤤⭐蝦醬豚肉蒸豆腐另一樣點左蝦醬豚肉蒸豆腐，豆腐超嫩滑，蝦醬鹹香鮮味，勁好下飯。⭐白飯白飯大大碗，有飯香👍⭐綠茶紅豆冰 & ⭐台式波霸珍珠奶茶跟餐熱飲轉做特飲都係加八蚊，叫咗一杯綠茶紅豆冰同一杯珍珠奶茶，綠茶香甜但紅豆唔夠軟腍，扣分😌珍珠奶茶唔錯，珍珠煙韌有咬口，茶香奶滑。小店唔使加一👍除咗小菜仲有西式鐵板餐、日式魚生飯、台式牛肉麵、甜品、小吃等，款式十分多選擇，總有一款啱口味😆
繼續閱讀
當晚放工想去睇新電話, 就去左旺角彌敦道某知名電話品牌店鋪參觀, 朋友因為要加班, 要晏晏少少到, 所有就近近地去左電話店後的GOGO 為食坊等我佢哋食飯，地點位於旺角砵蘭街180號砵蘭180+商場1樓, 由港鐵旺角站 E1 出口, 步行約3分鐘就到, 非常方便., 而且環境寛敞乾淨, 有2-4人卡座, 又有圓枱可以一家大細, 服務員就安排左我同朋友在卡位用餐🍽️。🍲我們點左個細的招牌沙鍋雲吞雞, 內有雲吞八大粒, 半隻上湯雞及菜底, 份量十足. 而且沙鍋上熱辣辣, 雞湯很濃郁很香滑清甜, 而且唔油膩, 雲吞皮薄餡靚, 用料十足, 雞肉鮮甜多汁, 肉質鮮嫩。🍢🍢小食叫了惹味沙嗲三色串 – 分別有雞, 豬及牛各兩串, 濃郁的沙爹醬有花生香味、各種香料: 例如香茅、薑黃、椰漿等等, 而且帶有微微的香辣，慢慢釋出香氣, 再蘸些醬一齊食, 口味十分多層次呢!主菜就叫了GOGO黃牌雜扒 - 一次過歎齊雞扒、豬扒、司華力腸、煙肉和太陽蛋，份量十足，趁熱倒下黑椒醬汁，即是喳喳聲, 超治癒, 而且再配以餐湯、意粉, 絕對稱得上是「大件夾抵食」🍴再叫多個什錦滷水拼盤 – 有豆腐, 牛肚, 牛𦟌, 豬大腸，滷水汁好惹味, 而且炆得好淋好入味, 送飯一流!🧋最後甜品點了咖啡紅豆冰 – 因我又想食糖水，朋友又想飲咖啡，所以why not both, 就叫左咖啡紅豆冰兩份，兩者出奇地夾, 紅豆份量都幾多又大粒, 呢餐簡直完美啊！
繼續閱讀
響朗豪坊睇完戲搵地方食野, 但係商場好多餐廳都差唔多LAST CALL, 所以都係出出面睇下有咩食. 行後一條街見到呢間為食坊開到成十二點, 啱晒心水.扶手梯一上到去, 環境幾大, 好多卡位但唔迫, 而且地下好乾淨.兩個人諗住隨意食少少, 所以要個沙鍋雲吞雞. 一上枱好大個鍋, 數一數雲吞有八粒, 細大約係細雞既半隻, 仲有少少菜, 份量非常十足.先飲啖湯, 熱辣辣飲左個胃暖粒粒, 好濃既雞香味, 唔油膩, 好順口.食粒雲吞, 皮夠薄, 皮無煮到爛晒. 餡料好足, 夠彈牙. 如果唔夠雲吞仲可以追加八蚊隻.雞肉唔老, 皮滑肉嫩, 好容易撕出黎食.跟住叫左牛肉餅, 有分大細, 細都係十六蚊, 個皮煎到好香口又夠薄, 一分開啲肉汁係咁湧出黎, 啖啖牛肉餡, 真係好味.原本食完呢兩樣都飽飽地, 但係見到呢度原來仲有甜品, 中西式都有, 又忍唔住要個芝麻糊, 仲可以另加湯丸.芝麻糊入口好滑, 侍應話係佢地餐廳生磨, 唔怪得好味啲, 而且甜度剛剛好, 食完好滿足.另外呢度好多侍應, 幾乎未舉起手就已經行左過黎問你要咩, 反應快又禮貌.
繼續閱讀
喺朗豪坊買完聖誕禮物，過左嚟砵蘭街搵食。見到有間「GOGO 為食坊」，位於商場 1 樓，入面地方好大，設有大量座位，環境寬敞舒服✨ 今晚就一於喺度開餐。餐廳集齊中、西、日、台等多地美食，種類非常多元化，照顧到唔同口味嘅朋友仔👥點左個古法羊腩煲 ($328)，羊腩鮮嫩肥美，大大嚿又厚身，肉質腍滑多汁，入味之餘又唔會有好重羊羶味～再配埋清甜馬蹄、鮮香冬菇、吸汁枝竹、鮮爽無渣嘅冬筍同贈送嘅茼蒿，非常惹味，食完成身暖笠笠，絕對係秋冬「滋」選！+$12 可以轉套餐，配白飯及熱飲。甜品點左碗薑茶芝麻湯圓 ($28)，湯圓大大粒，渾圓飽滿，內藏流沙芝麻餡，一咬爆漿，加上薑茶夠「薑」，味道一流！另外呢碗南北杏雪耳燉木瓜 ($32) 水準亦唔錯，木瓜香甜軟糯，入口即化；南北杏生津開胃，雪耳充滿膠原蛋白，滋陰潤肺，絕對係秋冬養顏聖品！
繼續閱讀
今晚同D朋友去旺角玩下夾公仔, 最後洗左幾百蚊, 公仔又夾唔到, 又餓…..一出門口見到對面就係餐廳, 就試下囉！門面幾得意。 有D卡位好似茶餐廳， 係入少少又有幾張大圓台，茶餐廳＋酒店混合體。睇餐牌仲得意， 有餃， 有壽司， 有小炒， 有糖水真係想食咩都有。見到人地叫左個古法羊腩煲， 好香好豐富， 同埋個川芎白芷天麻燉魚頭， 好似好正。可惜，幾個朋友一個唔食羊， 一個唔食魚， 無緣了。雲吞雞呢味餸係老闆娘極力推介, 就信佢試下,而且有菜有蛋白質 又有啖湯飲，轉涼天氣岩哂。一上台, 好香雞味, 上台果下煲邊仲滾緊, 有輕輕一層雞油係面, 飲入口好香濃雞味, 似無味精, 好好飲, 煲過湯既雞肉, 輕輕一夾就鬆開哂, 好林, 雲吞都唔錯。招牌咕嚕肉咕嚕肉大人小朋友都岩食既一味菜，屋企少整, 出街食必叫。大大舊, 啖啖肉, 豬肉彈牙帶少少肥肉，我估係梅頭肉，咕嚕肉皮炸到酥脆唔乾身，而汁醬甜酸度剛剛好。啫啫芥蘭煲啫啫煲係一道有聲有色的「響菜」。啫啫係指個茶”時li沙拿”果個熱辣辣既聲音。GOGO為食坊呢個啫啫芥蘭煲完全做到啫啫個效果，而家個芥蘭無OVER COOK, 仲好脆口,正。生炒臘味糯米飯唔太油, 飯既軟硬度適中, 色水靚而且唔會過咸, 有原粒花生增加咬口, 初初大家怕滯只食少少, 但係, 食下食下, 成碟清哂, 咀巴係最誠實。杞子紅棗桂元茶, 養顏蛋白杏仁茶,蓮子百合燉海底椰食飽坐係度傾傾傾, 傾左好耐, 真係好而家好少餐廳唔限時之餘仲唔趕人走。我地就叫左D糖水試下。呢幾款都好好食, 唔會過甜, 最出色係個養顏蛋白杏仁茶, 個蛋白係即時加生蛋白落去靠熱力將佢整諒, 半熟, 好滑, 杏仁味好香。好滿意既一餐飯, 雖然唔係咩大酒樓名貴茶, 但地點方便坐位闊落, 最重要係唔限時又唔趕人走, D待應仲好好傾添。一定要搵日黎試下佢個古法羊腩煲， 同埋個川芎白芷天麻燉魚頭湯。
繼續閱讀