Green Common (屯門鄉事會路) (已結業)

同朋友去VCITY行街，想去附近一間餐廳食野，點知發覺執左笠，眼見方圓十里以內有間新開食店，店面吸引，於是就被吸引左入去啦。去到係星期五大概八點幾到，新店比較多人試，但都唔使等位。一睇個MENU，發現呢間食店「掛羊頭賣狗肉」，全部都係仿肉食既素食。之前聽過好多仿肉既素食，一路都無試過，覺得味道一定無咁好。點知今次竟然比食物圖片吸引左而試，果然人都係鍾意外觀吸引既野，哈哈。焗葡汁植物雞飯($79)整體黎講就係一個葡汁飯，完全食唔出邊舊係仿雞，我估應該係舊椰菜花，味道唔差，不過不失。焗素豬扒黃薑米飯($82)呢個飯個蕃茄有D酸，但係素豬扒整得口感味道都好似，仲好食過真正豬扒，有意外驚喜。新豬肉餃(跟主菜+$28)呢個新豬肉都係好出色，簡直同食緊真豬肉無分別，除左價錢之外。不過MENU上有講，呢隻「新豬肉」係成份上都比較健康。小麥草檸檬蘋果汁(跟主菜+$28)飲唔出蘋果味同檸檬味，又唔知小麥草係咩味，但飲落去幾特別，都幾好飲。呢間店性價比方面的確唔係太高，但係勝在有創意，味道都唔差，整間店用左淺藍色做主調，光線充足，環境黎講真係好舒服，有機會都會再試埋其他款式。

呢間有唔少分店，而呢間係屯門新開既，主打健康素食，係藝人陳貝兒同朋友合資經營既。餐牌選擇唔多，對比出面同樣食物，但唔係素食，呢度價錢相對貴。 叫左個未來熱狗試試，味道雖然冇咩特別，份量都相對細，但食落質感同味道，同食肉食既熱狗差唔多，唔講都唔知係素食。而佢個包都係自家制架，素食既朋友可以放心食用。雖然貴就貴左d, 但勝在食得健康，食少d肉，對地球都算出左一分力呀而且仲可以影相呃like添。順帶一提，每食滿一百蚊，憑收據可以係佢個便利店corner 買野當10蚊用架。

今次已經是第二次嚟幫襯，由於前兩日食過覺得唔錯所以再嚟試埋佢其他食物,本來我們打算叫88元有兩個漢堡包，店員話下午3點後才有，之後我們叫了兩個Set lunch由於張枱位置好近收銀處所以好多人出入，經常比其他人踢到我們櫈腳甚至撞到我的手，坐得非常之唔舒服好有壓迫感好騷擾，其實明明有好多吉枱冇人坐，店員見我們二人就要share4人枱(隔離有客人的)，我們眼見一位的客人就一個人坐晒四人枱，之後我們要求轉枱(店員話問完再覆)。員工圍埋傾偈，落單時沒有人理會(第一次來時已是這樣)，過了一段時間終於有人理會，我們話要落單，那位同事又叫另一位同事幫忙落單，證明這間餐廳員工處理事情不夠靈活欠缺彈性, 一個推一個根本就浪費客人時間，令客人更加憤怒沒有解決問題，員工互相嚴重缺乏溝通，店員又嚴重誤導客人。到我們食了午餐後大概兩點幾，眼見其他客人有88元兩個漢堡包已上枱，再問另一個店員，原來根本冇分時段可任何時候叫，這餐廳員工誤導我們，好明顯她們沒有溝通，其實這餐廳食物今次質素好一般，因為午餐上枱時食物不是熱的，係偏凍，所以以上種種跡象，我們以後都不會再幫襯，令我們非常之失望和不滿><🤬😡😰