魂燒 (已結業)

今日放工既時候好想食串燒，平時食開個間休息，咁岩行過太子站附近見到有間睇落幾有情調既串燒店居酒屋睇完價錢都幾合理，諗住應該會幾好食。一上到去見到個環境其實已經想走，啲枱係勁污糟，上手似係唔知幾多日前食完仲未抹枱咁！我地2個人叫左個兩人餐同小食拼盤加飲品，埋單總數$381，本來已經好肚餓勁期待啲食物黎到大食一餐，結果等左接近25分鐘終於上左兩個小食小丸子加墨魚咀，見到個墨魚咀個下已經呆左$38只得6粒，而且食落去係無味道，跟住再上左碗炸豬排滑蛋丼，見到上面塊蛋已經係完全熟同煎蛋無分別，豬排叫做比較抵食係原塊，但已經炸到燶燶地。之後再上一碗蜜汁豬頸肉丼，一開始我仲誤會黎左碗叉燒飯，碗飯絕對係無汁，乾爭爭，仲要超細碗，令願攞$68摲盒叉燒返屋企食。再黎一碟串燒，金菇肥牛卷可以話係睇唔到金菇咁濟，似係拎左啲切淨既金菇碎黎包，雞軟骨食落有啲未熟，最後係萬眾期待半殼蠔，個隻蠔同手指尾第一節差唔多大粒，係個殼入面你少啲眼力都搵佢唔到。基本上比左差唔多$400，同無食過飯係無分別，絕對唔推介食，同等價錢可以係其他地方食到好飽