響 - Hibiki 日本燒肉 (已結業)

屈悶家中已久，都係時候出去擦餐好，所以揀咗放題放縱一下。食店的放題價錢按時段劃分，我揀非黃金I時段所以平少少，信用卡有折再平少少，只要食多幾碟和牛燒肉就回本，不過主要係約朋友一敘，絕對遵守限聚令。一入內見到大大隻「響」字招牌，食店裝修大路日式風，牆上壁畫印象深刻。食物方面，分為落單叫刺身、炸物、天婦羅等，而出面bar枱主要放了飲品、熱湯、甜品，主食有喜之次確係難得，平時食一條都唔平，今次四人會奉送一條，此外，燒物質素唔錯，串燒同炸物亦OK，大蝦大大隻不欺場，仲有我鍾意嘅榴槤炸蛋，外脆一口咬落流出榴槤蓉，啱啱炸起香噴噴啱晒我。雪糕就有Movenpick同Dreyers，啱我雪糕狂熱分子。食飽飽後，飲番杯熱綠茶消滯一下，再同朋友傾多陣先，因為下次又唔知幾時見面，希望疫情過後香港全面解封及解令，咁就成大班friend食過。