上海真真豆漿大王 (已結業)

【九龍城區】【上海真真豆漿大王】去到蕪湖街呢邊，其實都幾有盡頭 feel，我所講嘅盡頭係講緊 1am紅館 系列同紅館十五分鐘腳程嘅盡頭，我自己親自測試過，的確係行 15 分鐘先到紅館。所以如果係食完飯過去睇 Show 嗰隻，就真係自己諗諗喇。之前同大家介紹過附近嘅滿堂樂，印象相當好，大家睇過嗰篇嘅話，應該都會喺字裡行間感受到嗰份喜悅。所以見到呢邊都有上海嘢，誠然都幾期待。加上睇咗啲資料話佢都算老字號，更加令我覺得要試吓。去到都幾多人，要攝攝吓先搵到個位。主菜就叫個「雙拼上海麵」C 餐，有兩個餸，配上海麵。我揀咗「上海燻魚」同埋「五香牛肉」，前者冇汁真係好乾，食落亦都非常一般。後者其實係牛腱嚟，食落都唔錯，可能食燻魚先，覺得呢個都算 okay，配埋「雪菜」先 $45，算係咁。嚟食上海嘢唔知點解覺得硬係要配返杯「凍豆漿」先安樂，質素都 okay，不過吹到係「大王」又覺得好似未到呢個 level，$12 嘅價錢唔算平。而我一場嚟到當然唔會就咁走，搵一碗好好食嘅「鹹豆漿」一直係我嘅任務，可惜 $16 嘅呢碗唔算係。食完以上嘅嘢之後，其實仲有空間食嘢，我覺得自己未必會再嚟，所以叫多樣嘢睇睇佢啦。