展興餐廳

營業中

休息中

【九龍城區】【展興餐廳】一個人喺紅磡百無聊賴搵嘢食，碌咗去紅磡廣場嗰頭。突然見到呢間「展興餐廳」四粒大字喺我眼簾裡面出現，我當堂打咗個突，畢竟呢間嘢都係土瓜灣名物。記得以前少年時代，冇乜錢而又想鋸扒，就會走嚟呢間「吊癮」。咁我而家個位置又好似同當年嗰個位有啲距離，我估係分店啦，呢啲本區名物，都係喺返嗰區開分店好啲嘅。見到簡樸嘅格局，我估同土瓜灣嗰間應該係同一個老細掛，如果同區開一間同名嘅餐廳應該會引起一啲問題出現。入到去，就梗係搵扒鋸，叫咗個 $72 嘅「鐵板美式什扒」，乜都有得食咁好似啱我啲，佢就有豬扒、牛扒、雞翼、火腿、腸仔配個薯條咁，有得揀飯或者意粉嘅，我冇揀咁解啫。佢啲薯條係另上嘅，浸落啲汁或者唔浸都得。而啲餸方面，七十幾蚊都預咗係嗰啲嘢，唔可能要求太好，有塊薄牛扒嚼吓已經好好。而呢啲汁醬嘢食到後面都係偏鹹，已經唔係後生狂風掃落葉咁喇。餐湯我揀「中湯」就係茶記例水啦，加 $2 要埋「凍奶茶」就 $74 埋單。。。（地址：土瓜灣土瓜灣道237號益豐大廈地下B號舖）#1amfoodie #foodie #hkfoodie #thatfoodiething #hkfood #food