成發咖啡餅店

營業中

休息中

【北區】【成發咖啡餅店】每一次去上水嘅感覺都好似返咗大陸咁，不過有時如果想買啲大陸嘢嘅話，去嗰度睇吓就真係會有收穫。都係嗰樣嘢啦，去得一個地方嘅，就梗係去嗰頭食埋嘢。我見到呢間舊式茶餐廳，即刻 bling bling 眼，即刻衝入去食嘢。用到個衝字一啲都冇誇張，因為當時唔止係下午茶時段就嚟完，而且距離佢哋收舖時間都不遠矣，吖佢哋好似唔做晚市咁喎。唔緊要啦，就叫佢哋嘅精選下午茶餐，我叫咗 $33 嘅「牛油多士配火腿奄列」，係呀，就係呢份。感覺呢個組合爭個主食就係一個常餐喇，幾有趣。味道上塊油多幾好食，牛油味勁香。而個奄列過熟，落咗紅汁有啲畫蛇添足，因為我唔中意紅汁。而個下午茶嘅嘢飲我飲「熱奶茶」，果然係老牌茶記，係好有水準，好好飲嘅。除咗茶記本身嘅嘢食之外，佢哋仲有粉麵，不過我就唔想食麵，就叫碗 $42 嘅「淨雲呑」嚟食。啲味道就正正常常冇乜特別，有七粒，唔需要特登去食。最後埋單價係 $75，食到後尾已經撞正佢哋收舖，都估唔到佢哋收六點咁早。。。（地址：上水新康街24號地舖）#1amfoodie #hkig #foodiehkgirl #hk #hongkong #topcitybite