大爺燒鵝 (香港仔大道)

營業中

休息中

【南區】【大爺燒鵝】我作為一個十八區 foodie，有時都覺得自己頗為失德敗行，因為好多時都寫唔足十八區。但係當我寫得匀啲嘅時候，如果想睇某一區食物嘅讀者，可能要等成個月先等到一篇，一陣寫咗間都幾大路嘅餐廳時，想再睇就又要等。理論上，最完美嘅做法好似係梗咗十八區嘅次序，然後順序推出，咁樣就即係十八日後就點都有一篇。不過難度就係我都好難平均咁去晒十八區，都要顧及返現實生活嘅情況，加上餐廳都唔係平均分佈喺各區，好難搞嘛。自己當然有千百個理由說服自己，但係泥水佬造門，過到自己過到人，都要去多啲區食吓唔同嘅餐廳嘅。呢晚適逢打風打到呼呼作響，大家都匿晒喺安全地方嘅時候，我就去咗南區搵嘢食，咁啱見到呢間仲開門，就用你啦。咁佢係燒鵝飯店就梗係要叫燒鵝，叫咗個「燒鵝燒腩仔飯」轉「鵝髀」加「鹹蛋」，送「例湯」，飲「凍檸茶」少甜。兩款燒味我覺得都燒得幾好，味道好而啲皮又脆，送飯一流，本身唔多想食米飯嘅我都乖乖哋扒晒佢哋。價錢方面，啱啱好齊頭 $100，價錢合理。本身話冇鵝髀，爭啲搞出人命，被啲阿姐笑死，打過張單啫，唔使殺人掛，哈哈。事後搵資料先知佢都有分店，就算南區都有兩間，所以都寫返清楚呢間係香港仔大道