吉氏

營業中

休息中

【屯門區】【吉氏】同啲屯門牛傾開屯門飲食文化，好多朋友都話雖然多咗人會返內地食飯，但係其實喺屯門，有質素嘅餐廳依然喺度，例如置樂花園後面嗰幾條街，儼然已經隱約有「食街」嘅雛型走咗出嚟。老讀者就知我好耐之前都喺附近覓過吓食，今次就試吓啲新嘢。同皮蛋哥嚟到呢間開張大半年嘅「吉氏」，覺得可以一戰就入咗去。大家都叫咗午餐，前菜嘅「蕃茄湯」非常濃香，好足料。主菜試「肉醬手工薄餅」，都好正，係我中意嘅薄餅類型。另外試埋「西班牙燒乳豬伴薯蓉及燴煙肉椰菜」，招牌菜之一，好好食。佢特別分開咗兩個位嚟整，一邊係食鮮嫩感，一邊食肉香，配埋勁脆嘅豬皮真心掂。試個屯門獨家嘅「巴伐洛娃蛋白餅」做甜品，係用蛋白同糖以長時間慢慢焗成嘅蛋糕，口感特別，味道豐盈，好食。好似上環都有間西餐係食類似呢樣嘢，但屯門就真係冇見過。餐飲我哋飲埋凍嘅「Americano」同「Mocha」，都係水準之作。之後老闆娘仲出嚟吹吓水，講到佢哋晚市仲有道都好受歡迎嘅「鴿子批」，我都心思思想下次試埋佢哋個晚市呀。皮蛋哥都好欣賞呢度啲菜式，而老闆娘就笑笑口咁，歡迎我哋下次再嚟咁話。。。（地址：屯門青善街28號康景花園地下1號舖）#1amfoodi