功夫點心

營業中

休息中

星期五放工去深水埗食晚飯，好耐無食過點心，同埋唔洗等位就入左去試。menu都幾多選擇，平時酒樓有嘅依到都有。鮮蝦腐皮卷($22)，新鮮炸起，加埋喼汁好滋味，不過太油膩，食得多好濟。功夫蝦餃王($9隻，兩隻起)，皮唔會太厚恰到好處，加埋爽口嘅蝦肉，整體好食。蟹籽香菇燒賣王($9隻，兩隻起)，豬肉唔會攪到太碎，食得岀好足料，加上冬菇嘅香味，兩者絕配。黃金流沙包($9個，兩個起)，一籠一個，可想而知係比平時岀面食嘅大，入面keep到超流心，要小心食唔好辣親。不過味道方面，奶味偏重，食唔到鹹蛋黃嘅鹹香味同沙沙嘅口味。懷舊綿香馬拉糕 ($20)，濃郁黑糖味但唔會過甜，口感軟綿有彈性翡翠叉燒腸 ($24)，叉燒好足料，外皮非常煙韌，配埋甜豉油，令人想encore。秘制牛腩腸粉煲 ($34)，味道普通，只係牛腩加上齋腸，腸粉口感過軟，並不推薦。兩個人連埋茶位食左$182，每人$100都唔洗好抵食，大部分點心都值得推薦，下次夜晚想食點心可以再試！