+886 台味飯桌仔 (已結業)

【沙田區】【+886台味飯桌仔】好耐冇同震華哥食飯，唔講以為佢嬲咗我呀。大家都係沙田友，嚟到大圍搵嘢食就見到呢間好似開咗唔係好耐嘅台灣嘢，二話不說就入去試吓佢。佢試碗 $68 嘅「川味牛肉麵」，要正常麵量嘅拉麵，我都要咗少少嚟試，係有啲辣，不過牛肉同埋麵都可以嘅。我就試 $40 嘅「招牌米糕」，佢係源自台灣地攤、夜市嘅地道美食，係由台灣嘅糯米、鴨肉同薑片蒸煮而成。店家仲預備埋台灣人中意加入嘅地道甜辣椒醬嚟提升糯米嘅味道，令到米糕好食而不辛辣，達至接近台灣本土風味，食落我都覺得加咗醬係好食啲嘅。我哋試埋 $25 一碗嘅湯，我試「地瓜雞湯」，佢試「麻油雞湯」，都幾女好飲嘅。小食方面就試各 $28 嘅「香滷米血」同「無骨鹽酥雞」，前者幾特別，後者鮮嫩又好味。試埋 $34 嘅「吮指鴨翅」同 $13 嘅「小愛文芒」，前者香濃，後者清甜，都係可以嘅。跟住講吓啲嘢飲，我試加 $13 嘅凍「日式烤奶」少甜少冰，佢係奶茶嚟，點都會再加要埋波霸珍珠，幾好飲嘅。震華哥就試加 $9 嘅凍「炭焙烏龍茶」少甜正常冰，佢都話唔錯，同埋佢都有再加 $4 試埋波霸珍珠。埋單 $291，咁食法都唔使三百，唔貴。。。（地址