裕泰牛什越南河

營業中

休息中

【深水埗區】【裕泰牛什】中咗武肺之後，獨留家中寫返啲之前做咗但又未有機會寫嘅嘢。睇咗之前兩回嘅朋友都應該了解到今日呢篇將會係 社交平台牛腩牛雜群組提及到嘅大埔道二百米三間粉麵店嘅調查特輯嘅第三篇，即係最後一篇。咁大家可以放心，講咩調查嗰啲都只係嘩眾取寵嘅誇張用詞，我未去到做嗰啲著住緊身皮衣嘅潛入調查官嘅。自己武肺嘅情況已略有好轉，唔需要太擔心之下，我就順勢講埋呢間最近先喺大埔道開張「插旗」嘅「裕泰」。第一次去都幾期待，因為群組對佢評價幾高，不過大家知我對「打手」係「免疫」，所以半信半疑咁叫咗碗「招牌牛雜河」。喂，真係新鮮牛雜，係好食啲冇錯，唔係打手呀吓，加埋杯「凍檸茶」夾埋 $30 都係自費。三草嘢真心抵食，胃口大開，叫多碗「牛三寶粗」，有「牛筋」、「牛肚」、「牛腩」，味道都 okay，本身諗住食少啲麵但最後都食晒，呢碗 $40 都係送嘢飲，我都係要「凍檸茶」費事撞，都係正常味道，不過不失。我之後仲去咗兩次，有次冇影相，再之後呢次就同家慈去，我叫咗碗「胡椒豬肚撈粗」配「凍檸茶走甜」，成件事比較一般。家慈叫「牛雜麵」，佢唔太熱衷但都食得出啲牛雜唔同啲，佢係飲「熱奶茶」嘅，夾埋就 $70。