影片
更多
2023-05-05
675 瀏覽
【西貢區】【Fifty Fifty】之前因為成日入將軍澳做義工，所以都會喺嗰邊食吓嘢。之不過因為疫情關係，個 project 停咗，我亦都少咗好多機會入去。據我所知，我幾中意食嘅 Say Cheese 都執埋笠，其實我都真係唔係好熟將軍澳，遲啲有機會等大家指教。咁今次嚟嘅呢間精品咖啡店正正就係喺 UNY 裡面，佢個名叫「Fifty Fifty」。我第一時間諗起十幾年前紅極一時嘅「Millionaire」電視節目，香港亦都有「百萬富翁」，一度拯救咗陳啟泰同埋亞洲電視，都幾犀利，我知外國仲有玩但係香港已經冇。其實「Millionaire」嗰種模式簡單易明，無線之後買咗幾款問答遊戲都紅唔過佢就知，亞視仲出過一個叫「知識就是力量」嘅青少年版，不過算啦都係。三年前啲阿根廷朋友話我聽佢哋嗰邊仲有電視節目做緊，仲展示咗一題我都識嘅題目，搞笑。咁呢間 Fifty Fifty 個名又係咩意思呢？我就唔知嘅，不過拎啲資訊估吓先，我就摷到佢就除咗有賣啲精品咖啡之外，仲有全新創意口味嘅「牛角包窩夫」。唔好問我住，我就真係唔知咩嚟，我都想知係咪就係 50% 嘅牛角包配上 50% 嘅窩夫。睇到呢度我都知冇理由咁單
咁今次嚟嘅呢間精品咖啡店正正就係喺 UNY 裡面，佢個名叫「Fifty Fifty」。我第一時間諗起十幾年前紅極一時嘅「Millionaire」電視節目，香港亦都有「百萬富翁」，一度拯救咗陳啟泰同埋亞洲電視，都幾犀利，我知外國仲有玩但係香港已經冇。
其實「Millionaire」嗰種模式簡單易明，無線之後買咗幾款問答遊戲都紅唔過佢就知，亞視仲出過一個叫「知識就是力量」嘅青少年版，不過算啦都係。三年前啲阿根廷朋友話我聽佢哋嗰邊仲有電視節目做緊，仲展示咗一題我都識嘅題目，搞笑。
咁呢間 Fifty Fifty 個名又係咩意思呢？我就唔知嘅，不過拎啲資訊估吓先，我就摷到佢就除咗有賣啲精品咖啡之外，仲有全新創意口味嘅「牛角包窩夫」。唔好問我住，我就真係唔知咩嚟，我都想知係咪就係 50% 嘅牛角包配上 50% 嘅窩夫。
睇到呢度我都知冇理由咁單調嘅，果然係有得揀味，例如「港式奶醬」、「抹茶紅豆」、「柚子蜜糖」同埋「斑蘭咖央」、「奶皇紫薯」味，後兩者仲係期間限定咁話。呢樣咁 signature 嘅嘢當然要試，不過我係同朋友一齊去，梗係佢揀味先。
朋友食「斑蘭咖央牛角包窩夫」，價錢 $34，我偷咗一啖，喂係幾好食喎。反而我件 $38 嘅「奧利奧焦糖脆餅牛角包窩夫」我覺得個味平庸咗啲，周圍都食到咁。其實佢食落係牛角包嚟，不過整到個樣好似窩夫咁，係幾得意，我覺得一試無妨。
飲品方面，呢度主打咖啡，分咗三大類，分別係咖啡、手打拿鐵，同埋氣泡咖啡。經過店員詳盡嘅介紹，我哋都係叫氣泡咖啡。我朋友飲嘅「玫瑰荔枝氣泡咖啡」，佢未係好慣飲有汽嘅咖啡，唔係咁推薦，我嗰杯「蝶豆椰子氣泡咖啡」就反而唔係好飲到咖啡以外嘅味咁。
兩杯氣泡咖啡都係 $42，我哋都唔係好慣呢啲咁特別嘅有汽飲法，不過見其他人飲熱飲個樣係 okay。店內仲見到店員喺度炒咖啡豆，今日係用雲南嘅咖啡豆。聽講仲可以自訂個人化嘅咖啡豆，更定期舉辦工作坊，專人睇住混豆以至烘焙嘅過程。
趁呢個機會行埋 UNY 生活創庫，朋友話呢個位之前係百佳，我冇乜點聽，反而回味緊究竟點樣寫呢篇嘢。所謂「一念天堂，一念地獄」，我就真係處於 fifty fifty 嘅情況，再經過一次舖頭嘅時候竟然仲有衝動想再坐低試埋佢熱嘅咖啡，不過都係下次先啦。
特別多謝相識（就快）十六年朋友今日嘅陪伴，大家都面對不同嘅困難，只係幼稚嘅我真係唔識點處理。另外都順便祝埋呢位朋友過幾日嘅生日快樂，我未有時間去好好慶祝，不過我會盡快安排。總之就係感激啦，長氣得嚟又盡在不言中咁。。。
（地址：將軍澳欣景路8號MCP CENTRAL (新都城中心2期) UNY 生活創庫 20 號店）
#1amfoodie #foodie #hkfoodie #thatfoodiething #food #instafood #1ambackup #1am0502 #globaleats #tastyfood #foodpics #followforfollowback #love #eat #1am西貢區 #將軍澳 #fiftyfifty #coffeeshop #thecuptheiron #brewandchew #coffee #coffeeaddict #牛角包窩夫 #咖啡 #斑蘭咖央牛角包窩夫 #奧利奧焦糖脆餅牛角包窩夫 #咖啡店 #玫瑰荔枝氣泡咖啡 #蝶豆椰子氣泡咖啡 #氣泡咖啡
36 瀏覽
0 讚好
0 留言
張貼
