小神燈新派飯館 (已結業)

【西貢區】【小神燈新派飯館】經過呢頭都好幾次，但係一直都冇機會入去食嘢，今次終於的起心肝、鼓起勇氣入去食嘢。一向存在感都極低嘅我，見到係 QR Code 落單就心情舒暢，但係飲茶嚟講冇人幫手開茶位都係證明到我確實係存在感低，唔係亂吹。仲睇緊 menu 時突然進入下午茶時段，攪到我都措手不及，不過重新快速擬定作戰方略都係我嘅強項嚟。所以各 $13.8 嘅「經典魚翅餃」同「家鄉鹹水角」就係因此而叫嘅嘢，味道正常但幾抵食，十零蚊碟點心仲去邊度搵呀。之後到 $28 嘅「懷舊棉花雞」，近年雞扎少咗落魚肚之後唔錯嘅替代選擇，好味。而 $29 嘅「小神燈蝦餃」就好普通，可叫可不叫。仲叫咗 $29 嘅「懷舊瑤柱灌湯餃」，呢個要自己飲茶先敢叫，費事要人夾錢，味道都可以嘅。跟住 $25 嘅「懷舊麻蓉包」都係近年少咗茶樓整嘅點心嚟，幾好。下午茶茶位 $10 一位，我叫咗壽眉，好飲。呢度係有加一嘅，不過由於係下午茶時段，我一條友食咁多嘢都只係 $164 落樓，我覺得一啲都唔貴呀，幾抵添。。。（地址：將軍澳調景嶺彩明街1號彩明商場2樓251-252號舖）#1amfoodie #foodie #hkfoodie