壹玖陸零 (已結業)

【觀塘區】【壹玖陸零】交代少少近況，除咗大家見到我又將 post 嘅文字內容縮短之外，就係出 post 唔再局限於十八區用餐體驗。只不過最近真係忙到諗唔到有咩題材可以搬出嚟寫吓，因此先拎住啲舊稿出嚟，照做住老本行先，畀啲時間我先得。嚟到觀塘做嘢，唔知食乜好就自然諗到要向高空發展，見到呢間好似幾好就去食吓。佢係食西餐嘅，不過大攪文青工業懷舊木系風格咁，都幾吸睛。午餐餐牌有飯意粉嗰啲，見到個特別貴嘅係牛扒嚟，咁好啦，就叫呢個啦。大拿拿 $148 嘅「美國 CAB 安格斯西冷牛扒伴薯菜」，塊扒都可以，對得住個價錢有餘，我唔記得我有冇揀生熟度，不過以我習慣同標準我會覺得佢有啲熟，味道上佢係唔差嘅。嘢飲我加 $18 要「Dirty」，呢杯只能講係正常。佢呢度仲有甜品供應，我用多 $18 食埋佢哋嘅「白兔糖奶凍」，喺第二度未見過類似嘅產品，都幾得意。味道上佢係有啲白兔糖味，不過都係傾向純奶味多啲咁。咁樣食咗 $184，其實有扒鋸有甜品都好合理，冇咩好抱怨嘅。。。（地址：觀塘成業街19-21號成業工業大廈1樓26號舖）#1amfoodie #foodie #hkfoodie #thatfoodiet