8鍋臭臭鍋 (金巴利道) (已結業)

一人鍋呢樣野，除咗食吉野家，基本上我係好少食。今次鍾意打邊爐、食鍋物嘅朋友又帶我認識多啲餐廳，帶我去呢間8鍋臭臭鍋食lunch。與其話係lunch，嚴格而言係brunch先岩。星期六一起身就食鍋物，其實真係有點重口味。不過如果味道不俗，就會覺得無咩所謂啦，哈哈。餐廳離地鐵站都有少少距離，要行一段路先到，所幸唔使等就可以直接入座。地方唔算大，枱與枱之間稍嫌逼狹。特別對於食鍋物呢類危險性高啲嘅食物，我覺得空間係需要闊落啲。我叫咗臺式麻辣鍋，因為佢集齊咗我想要嘅元素：麻辣、海鮮、牛肉。為免辣到飛天，我都係叫咗小辣。印象中麻辣餃係長條形，同平時食嘅餃子幾唔同。牛肉片味道都不錯，牛味可以再突出啲就更好。豬紅有點韌，味道正常。米血糕稍嫌有點乾身，口感唔太好。沙白嘅肉有啲細，不過都好食嘅。唔好睇佢鍋細細，其實一個女仔都未必食得哂成個。飲品方面，跟餐點咗茉香綠茶。味道比較清淡，綠茶味都係淡，茉莉香有少少但唔太明顯。