煮道 (已結業)

叫得一人一鍋，當然要順應獨身潮流一個人去食。平日夜晚八九點抵達，人去樓空，得番幾枱食緊。侍應服務欠佳，企咗嚮道兩分鐘都冇個理我，唯有自己搵位坐，坐落點知張枱未抹乾淨，整污糟咗個銀包。點咗個精選鍋配安格斯牛肉，湯選四川麻辣，加點奶茶(珍珠賣晒！)。機械人送餐，其實只係送到路邊，仲要只講普通話，大扣分。先講奶茶：完全係台式奶茶，中規中舉，冇乜得別，唔好太大期待。到麻辣鍋。初時飲落啲湯好似冇乜味，但係煮煮下愈嚟愈有味，香味有少少唔夠，但係麻味夠晒，唔止得個辣字，算係好食嘅麻辣鍋。附送嘅安格斯牛肉，切得厚薄適中，而且肉質甚高，有口感，唔會韌。不過份量唔算多。另外附送嘅丸都各有特色，全部都會爆醬，請期待。結論：算係好食嘅火鍋店，而且價錢公道，無論單人多人都值得一試。