牛摩+ (沙田中心) (已結業)

難得放假，同媽咪去沙田行街，行行吓見到間任食日式火鍋，仲要一人一鍋，百幾蚊一個人，唔係貴，就同佢嘆返個lunch。揀咗牛頸脊套餐，除咗有牛頸脊仲有其他部位嘅牛、羊肉、海鮮同鴨血，仲有自助區任拎蔬菜丸類豆腐甜品同埋飲品。叫咗個壽喜燒湯底，清清甜甜，有埋日本生蛋點牛肉；媽咪就叫咗港式沙嗲湯，貪佢夠味。牛頸脊色水好靚，油脂分布平均，個人覺得牛肉點壽喜燒湯底係絕配。另外Encore咗5碟牛肩肉，超濃牛味，仲要牛肉好滑身、軟熟。媽咪食咗五碟羊肉，佢話唔羶，好食！佢啲海鮮都唔差，最鍾意食元貝大大粒。青口都好新鮮，魷魚筒更加唔使講，一啲都唔韌，好軟腍。極力推介溫泉蛋，碗烏冬超級好食，滑溜嘅蛋汁再加清甜嘅湯底，超正！最後自製咗杯凍咖啡做甜品，呢度嘅飲品好出色，咖啡好香濃，奶味香，加冰底就整到杯凍啡！