富臨皇宮 (已結業)

今晚媽咪冇煮飯，所以我哋決定去附近嘅酒樓食晚飯，門口見到富臨皇宮酒樓推介嘅精選小菜咁平，就入去試吓。隨即坐低即刻睇下有乜嘢食，見到餐牌上嘅食物圖片非常吸引，忍唔住即刻叫六隻生煎菜肉包食下先。估唔到生煎菜肉包咬落去口感鬆軟，包底下香煎得非常香脆，而且內饀有好多生菜豬肉碎，食落去非常滿足。平時媽咪好少煲金銀菜燉白肺，所以叫咗四個人Share飲，飲落去好清甜嘅湯，食埋入面嘅拗湯配料，例如金銀菜同埋豬肉，更加滋潤。由於想試多啲菜式，所以淨係叫咗半隻BB乳豬、花膠北菇鵝掌煲、豉汁蒸大鱔同埋香薯一口牛。女人最滋補就係食花膠，花膠鵝掌煲得好林，食落去質感軟綿綿，好黏口。其他食物都炒得好有鑊氣，味道非常滋味。甜品方面都有好多選擇，我哋分別叫咗香芒糯米糍卷、養顏紅棗糕同埋大良雙皮奶。朋友都讚好香芒糯米卷，食落去好有質感同埋芒果肉好甜，而我就比較喜歡雙皮奶，食落去啖啖滑溜。總括而言，食物質素高，而且價錢合理，最適合一家人共進晚餐嘅好地方。