真心泰國菜館 (已結業)

今日成班朋友提起去食泰國野，我就搵左呢間地道泰國菜，7點到步，已經無乜位，等左15分鐘就已經可以入座，我地望左餐牌好耐，實在太多野想食，但最後我地就叫左兩個套餐，因為包含既款式都有齊大家想食既，包括明爐蒸烏頭、泰式通菜、串燒(雞、豬)、菠蘿炒飯、喇沙雞柳米粉！烏頭算係大條，重有好多肉碎，個湯酸得黎好好飲，魚肉吸收左湯既精華，簡直無得彈，而且條魚一D都唔腥！之後黎左串燒，燒得香之餘，配搭既醬汁都好惹味，菠蘿炒飯係我既至愛，一上枱，炒飯既香味已經深深吸引住我啦，飯中有菠蘿、提子乾、臘肉、雞柳，而通菜真係值得一讚，好惹味而且只係帶小小辣，而喇沙米粉個湯就有好多花生粒，米粉分量都幾多！