壹蒸鍋

想食海鮮，就openrice咗呢間蒸氣海鮮粥底火鍋食下，揀呢間因為位置夠方便，喺兆萬入面。一共有三款海鮮窩鍋揀，有：海鮮蒸鍋、龍蝦海鮮蒸鍋、刺身海鮮蒸鍋；我哋揀咗最基本嗰款海鮮蒸鍋，每人$209。海鮮以貝殼類為主，有蜆、鮑魚、象拔蚌、扇貝⋯⋯加咗蒜蓉同粉絲蒸，好入味，海鮮未去到驚為天人嘅味道，但都食到有鮮味，好爽口。有好多粉絲呢點加分！食完海鮮鍋後，仲可以加其他蒸品，我食咗紫薯淮山、小籠包、清酒蒸蜆、水蛋都好好食，而金錢肚就麻麻地。食完蒸品就食個粥，個粥用豬骨同蜆熬，滲入海鮮嘅味道。個粥好綿，唔洗加調味料都好夠味，有豐富嘅海鮮同豬骨味，正！👍🏻三個人食，每人食咗兩碗粥。啲員工好細心，會定時定候幫你攪下鍋粥，較埋計時器，肯定唔怕煲到痴底！食完兩碗粥都飽咗七成，但點都要試埋佢個邊爐🤣，舀晒啲粥直接加清湯落個煲。邊爐料都有好多，不過真係好飽，所以就叫咗雪花肥牛同娃娃菜。啲牛真係好靚好好食，仲好大碟，鍾意打邊爐嘅可以食少啲蒸品留肚打邊爐。呢間餐廳嘅員工服務都好好，成日都走嚟幫我哋睇下個爐，又唔會嫌我哋成日加單好煩；雖然佢限時兩個鐘，但食咗兩個幾鐘都冇趕我哋走，啲位係卡位，好好坐。