肉餅哥小炒料理 (已結業)

之前肉餅哥喺荃灣打響名堂嘅時候已經好想去食，但一直未有機會，而家居然嚟到大圍開分店，咁我再無藉口唔去試啦！今日就試左 金沙蛋黃肉餅(蒸)+$2配菜飯。肉餅嘅造型設計我覺得都幾可以吸引到人嘅食慾，金黃色嘅咸蛋黃令人馬上諗到香口，可口； 肉餅蒸得啱啱好，入口仲有一種軟滑嘅感覺豬肉夠香，再配上撈飯食一流嘅金沙（咸蛋），的確唔錯，如果d咸蛋可以再咸d香d就更正喇 另外，我試咗幾啖友人點嘅流心芝士肉餅(煎)，我哋兩個食完第一啖之後，即時望住對方咦！有驚喜喎！肉餅煎得好香脆，芝士仍然係軟心，真係估唔到中式肉餅同西方嚟嘅芝士都可以咁夾，無遺和感，讚！呢個肉餅餐我加左$2配菜飯，我覺得選擇配菜飯係會食得舒服d，始終食咁大塊肉，有返d菜落肚平衡下係好事，會更容易食晒個餐，避免做大嘥鬼 （講真，店家比嘅飯量一d都唔少，甚至乎可以話係偏多 ，我諗呢個份量係相當適合從事勞動工作量大嘅朋友去食，一定夠飽肚！）P.S雖然我今次就無試到網上有負評嘅肉餅款式，唔知道係咩味道，但係我自己個人都好佩服老闆咁勇敢嘅創意，將一樣食材融會貫通，製作成變化萬千嘅款式，繼續努力吧