泰海鮮 (已結業)

最鍾意就係同班水友食飯，做運動之餘，可以食好嘢，又可以聯誼一舉兩得。每個月頭就會搵一間餐廳食飯，以屯門三聖邨係熱門海鮮嘅選擇，係因為平靚正又抵食所以次次都會去。每一次我都會選擇一至四平日夜晚來食飯，因為貪人少，可以傾偈，而且坐得舒服。好似今日一班人浩浩蕩蕩去街市掃下貨買下嘢，跟住選擇餐廳。平日都成日去大排檔式嘅中菜館，今日有人想話食泰式嘢，於是順理成章揀咗泰海鮮。先整隻上湯龍蝦伊麵，食完點會唔滿足，揀咗隻本地龍蝦，平靚正。呢度處理龍蝦真係有一手。我自己就選擇左最鍾意食嘅東風螺，加上辣醬，好得。我仲特登將個辣汁拎走，外賣返去俾女婿煮麵食。點了鮑魚煲，個鮑魚煲好重白胡椒味，香噴噴而且剛剛好。另外都叫咗奄仔蟹，仲以為過咗時間冇得食，但係蟹膏依然咁精彩。仲有又係叫咗白汁蜆烏冬，有個朋友基本上次次都會點，佢話從未失手，我自己就喜歡食飯多一點，頭先鮑魚煲嗰啲薑蔥，送飯一流。跟住最後有非常大隻嘅瀨尿蝦，用避風塘咁嘅炒法，再加埋炸腰果-一流，最緊耍啲瀨尿蝦好大隻又有膏。埋單每人都係$500 ，絕對係超值水準，食完再過去龍門食甜品。