三多麵食

營業中

休息中

雲吞麵雲吞超大粒，可能未煑時係一層疊一層，雲吞出嚟個樣係有啲四四方方，唔係圓軲轆形狀，感覺真係怪怪。一口咬落去瞞口係彈牙雲吞，蝦味同肉味都淡，比超鹹嘅湯底搶晒味道，試咗幾啖雲吞湯之後好口渴，蛋麵size較為粗大，麵質夠煙靭，整碗雲吞麵算係可以，屬於粗獷霸道型！豬潤雲吞粗麵豬潤有驚喜，厚切爽脆彈牙，灼熟得啱啱好兼唔嚡口，但係粗麵就煮得過咗龍，成碗麵腍啤啤，食咗兩啖就留返低俾店家。鯪魚球米嘅魚肉彈牙，魚球帶魚香同埋果皮味，味道簡單但配搭得啱啱好，傳統嘅制法非常有水準，好耐冇食過咁好味嘅鯪魚球，值得去食多幾次！雲吞墨魚丸麵嘅墨魚丸似係街市買返嚟嗰種口感味道，下次可以唔使再試。白灼鵝腸牛柏葉爽脆，一啲都唔韌，口感雖好，但係鵝腸及牛柏葉味道淡淡，都可以一試。凍檸檬茶茶味薄，檸檬味足夠，水準一般。下午飯時間都好多人排隊等候，而裝修屬於舊式雲吞麵檔茶餐廳，座位非常狹窄，張枱擺多幾杯咖啡或茶都要將就一下。衛生環境算合格，而服務就唔好有咁多嘅要求，算係禮貌勤快型。