平靚正西餐 (已結業)

呢一日屋企唔想煮飯，想買啲唔同嘅嘢做外賣， 漫無目的周圍行嘅時候，見到平靚正餐西餐， 價錢相宜，畀個機會佢啦。本身支持環保，因為預咗外賣，所以我帶定幾個盒。見到店舖都有宣傳：如果自備餐盒、餐具等所有嘢，可以減兩蚊！欣賞佢哋鼓勵環保！叫咗好多小食，包括香脆雞翼、宜蘭蔥肉餡餅、黑松露薯角、蛋餅（芝士+肉鬆），唔夠盒所以佢哋張幾樣小食同我裝落一個盒到，都幾好呀咁樣。雞翼好大隻！脆卜卜，黑椒味為主，今次小食s中我最鐘意佢~ 餡餅係其他地方都未食過，似煎迷你菜肉包，餡料整得幾惹味；薯角會伴隨沙律醬同黑松露醬，好香；蛋餅嘅份量好適合做下午茶，做正餐又細件咗，做小食又多咗啲，芝士肉鬆量平均。主菜就叫咗卡邦尼帶子轉大通粉、肉醬雞扒扁意粉，另外加忌廉湯同蒜蓉包。 要重點提及蒜蓉包，超香！我忍唔住係舖頭就即刻食咗件，應該係用長條法包整，切開四件，外層微脆，中間軟熟，蒜蓉醬厚厚一層，推薦大家必order！蒜蓉迷一定很滿意！ 卡邦尼嗰碟我就冇試，不過屋企人話帶子幾好食。我自己就滿意肉醬，酸甜度正好。總括黎講對得住餐廳名，又平又幾靚！