木船 (已結業)

大陸出差回港，順道同老朋友食個飯。揀左嚟「木船」，太和港鐵站行過嚟，都只係過一條馬路，幾分鐘就到，好方便。餐廳門口同內牆都用左全木條做裝飾，完全符合「木船」呢個主題，好有特色。泰式柚子沙律睇相就唔覺大份，但實物就真係好誇張，個碗係好深，食來食去都食唔晒架！好多柚子肉同炸椰絲，連紅菜頭都有，顏色更加靚。忌廉芝士磨菇雞翼雞翼拆左骨，再釀滿芝士同磨菇，一大啖咁食，方便又滋味。泰式椰汁雞湯多料好飲，雞肉夠滑，不過冇個火㷫住就爭左啲啲。MEGA咖哩虎蝦可以揀四隻或六隻。我地揀左四隻，又未算係MEGA級數嘅，不過就好彈牙。咖哩味香濃，配埋薄餅，連啲咖喱汁都唔可以放過。薄餅用透明杯仔裝住，靚之餘又幾保溫，唔錯。泰式鹽焗烏頭個肚仔塞滿香茅粒，離遠都聞都好香。配搭左兩款泰式醬汁，一紅一綠，綠色主要係芫茜青檸汁，紅色係酸辣汁，兩款都同個魚幾夾。朋友話食泰菜指定飲品定係椰青喎，啲椰青水多到滿瀉。我就要左杯熱香茅特飲，好暖胃，啱晒秋涼天氣。仲有成支香茅俾我攪攪，夠晒濃味，又有少少似薑茶味添。整體味道唔錯，份量好足，都幾抵食。唯獨欠左泰式甜品，有埋甜品就更完美~