蒲東小館 (彌敦道) (已結業)

食上海菜一定要叫小籠包啦，而呢道菜都可以知道間餐廳掂唔掂。蒲東小館既小籠包皮簿餡靚，超多湯汁，合格！牛肉生煎包都一樣好多湯汁，咬開時仲彈到去對面位添，最正係佢超熱，如果上枱時即刻食會辣親架。小食仲有五小碟，非常欣賞呢個做法，可以自己拼夠五樣小食為一道菜，滿足曬貪心既我地，而鍾意食素鵝既我地仲叫咗兩份，香脆好食，雞絲粉皮又係必叫既，淆肉就正常水平啦。河蝦三鮮炒年糕既蝦夠新鮮，年糕夠煙靭。韭黃鱔糊炒得好香，鱔香脆爽口。酸辣湯好大鍋飲極都飲唔曬。但令我失望既係擔擔麵，上枱時完全無賣相，好似一碗比人食過既麵咁。食落更差，湯好似溝水咁浠，麵好淋。甜品我地都叫咗三樣，高力豆沙好香蛋味好鬆軟，豆沙鍋餅紅豆好香。而我最鍾意係心太軟，紅棗好香，配埋麻薯 煙煙靭靭好好食，加上桂花糖香香甜甜，真係好好食！份量仲幾多，可以係咁食大滿足！