馬德里餐廳 (已結業)

今日去左荔枝角做嘢，過左午飯時間先落到去食嘢，但係呢一帶有九成以上的食店都係茶餐廳，真係好悶……行左一陣見到呢間馬德里，睇裝修擺設應該唔係一般的茶餐廳，咁我哋三個人就坐底左，雖然係下午茶時段但係都全場爆滿，利害！利害！睇黎啲出品應該幾好食我哋叫左三個都係下午茶餐，吉列豬扒蕃茄醬意粉、豬頸肉炒螺絲粉同埋會沙嗲雞扒麵。個吉列豬扒炸得啱啱好，咬落個豬扒度重有啲肉汁流出黎，意粉同蕃茄醬配合必定冇問題，重點係個醬好夠蕃茄味，一啲都唔馬虎。豬頸肉炒螺絲粉就一般般，個汁唔夠味之餘啲豬頸肉只得幾片，啲螺絲粉就炒得ok 但都係食唔哂，事關真係麻麻哋 好彩個會沙嗲雞扒麵有番啲驚喜，啲麵係炸脆左的生麵再响上面加上沙嗲汁同埋雞扒，呢個就極之好味，似咁嘅價錢食到呢個會沙嗲雞扒麵就真係超值。其實佢下午茶都有成20-30個選擇，真係從來未去過有咁多 choice 的餐廳，不過就唔係個個都得，我估都係揀啲個名正常啲的食物會好味啲。下次都會再試過第二啲餐。