生記飯店 (已搬遷) 新店位置

約左朋友喺灣仔附近食飯，獲推介去食生記飯店。一共兩層，傳統中菜/茶樓咁上下嘅格局。由於朋友前後腳到場，於是叫左個醉香鵝掌翼食住等，酒香味濃，帶有少少藥材味。之後叫左菠蘿生炒骨、家鄉煎釀鯪魚、鹹魚茸煎肉餅、椒鹽鮮魷及懷舊白糖糕。生炒骨香脆有肉汁，不會太厚粉，甜酸度亦適中（對我黎講）坊間好多時都係偏酸。煎釀鯪魚以為要預訂先有，點知原來walk in都有得食，咁就梗係唔可以錯過，傳統巧手功夫菜式，食落啖啖肉又香口。本身諗住叫比較多人推介嘅煎藕餅，但係我哋覺得食唔到10件咁多，所以叫左鹹魚茸煎肉餅（8件）。拿，唔係一個pizza切10件食唔曬，切8件就食得曬嘅意思，係同樣體積嘅餅，10件同8件嘅分別。煎肉餅咸香有嚼勁，質感相當有層次。事後覺得10件煎藕餅應該都食得曬。唔好意思，大家太快開動嘅緣故，椒鹽鮮魷及白糖糕就無影相。兩樣都好食嘅，白糖糕切到可以一啖一件無酸味。